Փաստ ինֆո

«Հայելի» մամուլի ակումբի գործունեությանը խոչընդոտելու դեպքի առթիվ հարուցված քրեական գործը ՔԿ-ն դատարան դեռևս չի ուղարկել։ Այս մասին «Փաստինֆո»-ն տեղեկացավ ՔԿ դեպարտամենտի տեղեկատվության և հասարակայնության հետ կապերի բաժնից։

Անժելա Թովմասյանի փաստաբան Զարուհի Փոստանջյանը «Փաստինֆո»-ի հետ զրույցում ասաց, որ այդ «պարզունակ» գործն արդեն պետք է լիներ դատարանի վարույթում, մինչդեռ՝ դեռևս նախաքննության ընթացքում է։ Նա գտնում է, որ խախտվել են ողջամիտ ժամկետները։ Բացի այդ՝ փաստաբանը նշեց, որ դեռևս չեն ստացել դեկտեմբերին ներկայացված միջնորդության վերաբերյալ որոշումը։

Նշենք, որ փաստաբանը ներկայացրել էր երեք միջնորդություն՝ Անժելա Թովմասյանի նկատմամբ հատուկ պաշտպանական միջոցներ կիրառելու, «Հայելի» ակումբին որպես տուժող ճանաչելու, գործ հարուցելու նաև խուլիգանության և խտրական վերաբերմունքի համար, քանի որ «Հայելի» ակումբի վրա հարձակման դեպքի առթիվ գործ է հարուցվել միայն ՀՀ քրեական օրենսգրքի 164-րդ հոդվածի 1-ին մասի հատկանիշներով, այն է՝ լրագրողի մասնագիտական աշխատանքը խոչընդոտելը։ «Տեսնում ենք, որ վարույթն իրականացնող մարմինն, ի դեմս ՔԿ քննիչի և Գլխավոր դատախազի, դրսևորում են անգործություն, ուղղակի ձգում են գործը և չեն ուղարկում դատարան՝ ինչ-ինչ պատճառներից ելնելով։ Իհարկե, չեմ կարծում, որ քննիչն ունի իր անձնական մոտիվացիան, բայց չեմ բացառում, որ կարող է կատարել հրահանգներ։ Հասկանալի է, որ հրահանգներն են պատճառը, որ գործը չի գնում դատարան և մեղադրանքը չի լրացվում»,- ասաց Փոստանջյանը՝ շեշտելով, որ ակնհայտ էր խուլիգանությունը և խտրական վերաբերմունքը։

Նա նաև ընդգծեց, որ ակնհայտ է նաև դատարանի նկատմամբ ճնշումը։

«Եթե դատավորին հարց տալու համար են մեղադրանք առաջադրում՝ դատարանի նկատմամբ ճնշում գործադրելու համատեքստում, ապա տվյալ դեպքում ակնհայտ էր, որովհետև նշվում էր, թե ինչու են նրանք այդ հարձակումը կատարում»,- նշեց փաստաբանը։

Հիշեցնենք, որ 2019թ.-ի հոկտեմբերի 5-ին չորս երիտասարդ ձվեր են նետել ակումբի դռներին ու պատերին, պաստառներ փակցրել` պահանջելով փակել լրատվամիջոցը: Որպես ակցիայի պատճառ նշվել է Hayeli.am լրատվական կայքում հրապարակված «Ալիևի ուշացած, բայց հուժկու պատասխանը Փաշինյանին» վերնագրով հրապարակումն էր։

Արձանագրենք, որ ակումբի ղեկավարը՝ Անժելա Թովմասյանը, ՀՀ ՍԴ նախագահ Հրայր Թովմասյանի քույրն է, ում լիազորությունները դադարեցնելու գործընթաց է սկսել իշխող քաղաքական ուժը, հարուցվել է նաեւ քրեական գործ, նրան առաջադրել մեղադրանք։

Դեպքի առթիվ Ոստիկանության կենտրոնական բաժնում հարուցվել է քրեական գործ՝ ՀՀ քրեական օրենսգրքի 164-րդ հոդվածի 1-ին մասով, որը նախաքննություն կատարելու համար ուղարկվել է ՔԿ ԵՔՔՎ Կենտրոն և Նորք-Մարաշ վարչական շրջանների քննչական բաժին և ընդունվել վարույթ:

Հոկտեմբերի 15-ին ՀՀ ՔԿ-ից հայտնեցին, որ 4 երիտասարդներին մեղադրանք է առաջադրվել՝ ՀՀ քրեական օրենսգրքի 164-րդ հոդվածի 1-ին մասով: Նրանց նկատմամբ որպես խափանման միջոց է ընտրվել ստորագրություն չհեռանալու մասին: Նշենք, որ այս գործով Անժելա Թովմասյանը ճանաչվել է տուժող: Անցած երեք ամիսներին քննության ընթացքի մասին հաղորդագրություն որպես այդպիսիք չի տարածվել։

Հեղինակ՝ Իզաբել Սահակյան

Աղբյուր` Փաստինֆո