Փաստ ինֆո

Չէի կարող այստեղ չխոսել, քանի որ քննարկում ենք մի հարց, անդրադառնում ենք պատմության այն էջին, որի ականատեսն եմ եղել նաև ես՝ Արցախյան ազատամարտի տարիներին։ ԱԺ ամբիոնից այս մասին ասաց ԱԺ «Իմ քայլը» խմբակցության պատգամավոր Սասուն Միքայելյանը։

«Պետք է ասեմ, որ 1990 թվականի հունվարի 13-ից 19-ը Ադրբեջանի իշխանության իմացությամբ իրականացվեց հայկական ջարդ, որը դարասկզբին Օսմանյան կայսրության կողմից իրականացված ցեղասպանության շարունակությունն էր։ Նույն ձեռագիրն էր, նույն գործելաոճը։ Ես տեսել եմ Մարաղայի կոտորածից մազապուրծ եղածներին, շատ դաժանություններ, դժվարություններ, դեպքեր, որոնք անհնար է մոռանալ։ Երբ վիրավոր պառկած էի հիվանդանոցում, մի կնոջ էին բերել Մարաղայից։ Նրան կապել էին մեքենայից, քաշ տվել ու մարմինը մաշվել էր, մնացել էր գրեթե ոսկորները։ Ասեմ, որ շնորհիվ մեր բժիշկների անձնուրաց ջանքերի այդ կինը ողջ մնաց»,-նշեց ԱԺ պատգամավորը։

Վերջինս ընդգծեց՝ այդ տարիներին նման անմարդկային վերաբերմունքի էին արժանանում ոչ միայն կենդանի մարդիկ, այլև նահատակվածները։ Սասուն Միքայելյանը պատմեց՝ եղել են դեպքեր, երբ գերիների փոխանակություն էին կազմակերպում զոհերի դիակների հետ և դիակներն այն աստիճանի հոշոտված էին լինում, որ պատգամավորի խոսքով անհնար էր լինում տարբերակել։

Նշենք, որ ՀՀ Ազգային ժողովի նիստերի դահլիճում այժմ ընթանում է Հայաստանի Հանրապետության և Արցախի Հանրապետության Ազգային ժողովների միջև համագործակցության միջխորհրդարանական հանձնաժողովի համատեղ հատուկ նիստ։ Այն մեկնարկեց մեկ րոպե լռությամբ՝ հարգելով Բաքվի ջարդերի զոհերի հիշատակը։

Աղբյուր` Փաստինֆո