Փաստ ինֆո

«Պարզ է, որ այդ տեղեկությունը տարաբնույթ խոսակցությունների ու վարկածների առիթ է տալու՝ սկսած դավադրությունների տեսություններից՝ հաշվի առնելով , թե ինչ պաշտոն էր զբաղեցնում նա։ Ի վերջո, նա ԱԱԾ տնօրեն էր, որը, ըստ էության, վերջին ԱԱԾ տնօրենն էր Սերժ Սարգսյանի իշխանության օրոք եւ նրա պաշտոնավարման օրոք տեղի ունեցավ այս իշխանափոխությունը»,-«Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը՝ անդրադառնալով ԱԱԾ նախկին տնօրեն Գեորգի Կուտոյանի մահվանը։

Հիշեցնենք, Գեորգի Կուտոյանը 2016 թ. փետրվարի 12-ին ՀՀ 3-րդ նախագահ Սերժ Սարգսյանի հրամանագրով նշանակվել էր ՀՀ կառավարությանն առընթեր ազգային անվտանգության ծառայության տնօրեն։ 2018 թ. մայիսի 10-ին նա ազատվել էր ԱԱԾ տնօրենի պաշտոնից:

Նշենք, որ ՔԿ-ի փոխանցմամբ, Երևան քաղաքի Պարույր Սևակի փողոցի բնակարաններից մեկում հայտնաբերվել է ԱԱԾ նախկին պետ Գեորգի Կուտոյանի դին՝ հրազենային վիրավորումով։Իրավապահներն այս պահին դեպքի վայրում են։ «Փաստինֆո»-ի տեղեկություններով՝ նրա տան պատերին հայտնաբերվել են կրակոցների հետքեր, իսկ մարմնի վրա՝ դիմածնոտի հատվածում։ Դեպքի վայրում՝ դիակի կողքին եղել է նաեւ ատրճանակ։

«Ցավոք , վերջին շրջանում բարձրաստիճան պաշտոնյաների հետ կապված նման դեպքերը սկսել են պարբերաբար լինել»,-հավելեց քաղտեխնոլոգը։

Հիշեցնենք, 2019 թվականի սեպտեմբերի 23-ին, Բջնի գյուղում գտնվող իր ամառանոցում հրազենով ինքնասպանություն էր կատարել, ՀՀ նախկին ոստիկանապետ Հայկ Հարությունյանը։ Դիակի կողքին հայտնաբերվել էր «ПМС» տեսակի ատրճանակ և պարկուճ։ Դեպքի առթիվ հարուցվել էր քրեական գործ՝ ինքնասպանության հասցնելու հատկանիշներով։

Իսկ նոյեմբերի 28-ին ՌԴ-ում Պյատիգորսկ քաղաքում ինչ-որ շինությունում գազի պայթյունի հետեւանքով մահացել էր ունեցած Ոստիկանության Երևան քաղաքի վարչության նախկին պետ, ոստիկանության գեներալ-մայոր Աշոտ Կարապետյանը։

Աղբյուր` Փաստինֆո