Փաստ ինֆո

Գազի ներքին սակագները բարձրացնելու վերաբերյալ տևական ժամանակ առկա կասկածները կարծես հաստատվում են։ Հանրային ծառայությունները կարգավորող հանձնաժողովի նախագահը չի բացառել, որ «Գազպրոմ Արմենիան» առաջիկայում հայտ կներկայացնի` ներքին սակագները վերանայելու և բարձրացնելու առաջարկությամբ։ 

Հազիվ թե կարելի է կարծել, որ Հանձնաժողովի նախագահը առանց լուրջ հիմքերի կարող էր նման հայտարարություն անել։ Հատկապես այն բանից հետո, երբ անցած տարվա վերջին «Գազպրոմ» ընկերությունը հաղորդագրություն տարածեց այս տարվա հունվարի 1-ից Հայաստանին մատակարարվող ռուսական գազի գինը անփոփոխ թողնելու վերաբերյալ։

Այն ժամանակ դա հիմք տվեց ասելու, որ գազի ներքին սակագները 2020թ. չեն փոխվելու։ Սակայն դատելով Հանձնաժողովն նախագահի մեկնաբանություններից` այդ հիմքերն այնքան էլ հիմնավոր չէին։

Քանի որ արդեն հայտարարվել է, որ մինչև այս տարվա ապրիլ գազի ներքին սակագները չեն բարձրանա, պետք է ենթադրել, որ դա տեղի կունենա ապրիլի 1-ից հետո։ Մինչ այդ էլ հավանաբար գազամատակարար ընկերությունը կներկայացնի իր հայտը։ Ու դա հիմնավորվում է անցած տարվա հունվարի 1-ից

Հայաստանին մատակարարվող ռուսական գազի թանկացմամբ։
Հիշեցնենք, որ այն ժամանակ ներմուծման գինը բարձրացավ 10 տոկոսով կամ 15 դոլարով, բայց դա ներքին սակագների վրա որևէ կերպ չարտահայտվեց։ Թե՛ բնակչությունը, և թե՛ տնտեսությունը շարունակեցին սպառված գազի համար վճարել այն սակագնով, ինչ սակագնով վճարում էին մինչ այդ։ Ներմուծման գնի տարբերությունը փոխհատուցելու պարտավորությունը դրվեց «Գազպրոմ Արմենիայի» վրա։

Հիմա պարզվում է «Գազպրոմ Արմենիան» այլևս ի վիճակի չէ կրել այդ բեռը։ Ու դա, ըստ էության, դրվելու է սպառողների վրա։

«Գազպրոմ Արմենիա» ընկերությունց հայտնել են, որ քննարկվում է գազի սակագնի վերանայման հարցը:

«Չի բացառվում, որ ընկերությունը կդիմի Հանրային ծառայությունները կարգավորող հանձնաժողով համապատասխան հայտով»,-տեղեկացրեցին «Գազպրոմ Արմենիա» ընկերության հասարակայնության և ԶԼՄ-ների հետ կապերի ծառայությունից:

Աղբյուր` Փաստինֆո