Փաստ ինֆո

Ինձ և իմ գործընկերներին ապշահար արեց այս լուրը։ Լրագրողների հետ զրույցում այս մասին հայտարարեց ԱԺ փոխնախագահ Ալեն Սիմոնյանը՝ անդրադառնալով ԱԱԾ նախկին պետ Գեորգի Կուտոյանի մահվան լուրին։

«Անկեղծ ասած լուրը նոր է, և ավելի խորը մեկնաբանություն չեմ կարող անել։ Ուզում եմ իմ ցավակցությունը հայտնել իր բարեկամներին, հարազատներին այս դեպքի հետ կապված։ Չգիտեմ ինչ ասեմ։ Վստահ եմ, որ շատ շուտով, մոտ ապագայում կիմանանք այս ամենի մանրամասները։ Ապշած եմ»,-ասաց Ալեն Սիմոնյանը։

Դիտարկմանը, որ Գեորգի Կուտոյանն ԱԱԾ նախկին ղեկավարն էր և տիրապետում էր որոշակի ինֆորմացիայի և արդյոք այս շրջանում նման դեպքը համարում է զուտ պատահականություն, Ալեն Սիմոնյանն ասաց. «Խոսքը վերաբերում է մարդու կյանքին և անկախ նրանից, թե ինչ պաշտոն է զբաղեցրել չեմ կարծում, որ այնպիսի ժամանակահատվածում է զբաղեցրել կամ այնքան մեծ բեռ է կրել, որ այդ բեռը...չգիտեմ ինքնասպանությունը կամ սպանությունը դրանք տարբեր մեկնաբանությունների և տարբեր հետևությունների առիթ են։ Եկեք սպասենք և տեսնենք, թե ինչ կասի նախաքննական մարմինը և ինչն է պատճառը եղել»,-նշեց ԱԺ փոխնախագահը։

Հարցին՝ արդյոք նախկին ոստիկանապետի, այժմ էլ ԱԱԾ ղեկավարի հետ կատարվածներն արդյոք ահազանգ է իշխանությանը ԱԺ փոխնախագահն արձագանքեց. «Կարծում եմ՝ սա նախկինի արձագանք կարելի է համարել, արձագանքնէ , որ մինչ օրս հնչում է և մեկ-մեկ մեր ականջին հասնում է նման ձևերով։ Ցավալի արձագանք է։ Կարծում եմ՝ հետևություններ պետք է անենք։ Ինձ մեկ-մեկ թվում է՝ ինչ-որ բացասական գործընթաց է տեղի ունենում, որը կողքով անցնում և մենք դրա հետ որևէ առնչություն չունենք։ Շատ ցավում եմ, որ այդ գործընթացը մարդկանց կյանքեր է արժանանում»,-հավելեց Ալեն Սիմոնյանը։

Աղբյուր` Փաստինֆո