Փաստ ինֆո

Արսեն Դավթյանի պաշտպանը միջնորդեց, որ դատական նիստը հետաձգվի՝ մինչև ներքին դիտումը օպերատիվ-հետախուզական աշխատանքների վերաբերյալ ՍԴ դիրքորոշումը։

«Փաստինֆո»-ի թղթակիցը նիստերի դահլիճից հայտնում է, որ պաշտպանը հայտարարել է, թե ՍԴ-ն և Վերաքննիչ քրեական դատարանը դիմումները չեն քննել և չեն հայտնել իրենց դիրքորոշումը ներքին դիտումների իրավաչափության վերաբերյալ։ Նրա խոսքով՝ դա կարևորագույն ապացույց է կաշառք ստանալն ապացուցելու համար և չի կարելի առաջ անցնել՝ առանց դա ապացուցելու դատական նիստ անցկացնել։ Գործով մյուս ամբաստանյալ Ռազմիկ Աբրահամյանի պաշտպան Սամվել Դիլբանդյանը դեմ արտահայտվեց Արսեն Դավթյանի պաշտպանի ներկայացրած միջնորդությանը՝ նշելով, որ չի կարելի դատական նիստը հետաձգել՝ անորոշ ժամկետով և խախտել ողջամիտ ժամկետները։ Մեղադրող կողմը դեմ արտահայտվեց ներկայացված միջնորդությանը՝ նշելով, որ այն անհիմն է։

Մեղադրող դատախազը նշեց, որ օպերատիվ-հետախուզական մարմինները չեն կարող ներկայացնել ապացույցն այն մարմիններին, որոնք հասանելիություն չունեն։ Նրա խոսքով՝ ամբաստանյալի արդար դատաքննության իրավունքը խախտել և սպասել, որ դատական նիստը հետաձգվի անհայտ ժամկետով, անտրամաբանական է։ Ինչպես արդեն հայտնել ենք՝ Արսեն Դավթյանին մեղադրանք է առաջադրվել այն բանի համար, որ ծառայության գծով հովանավորչություն ցուցաբերելու և իր պաշտոնեական դիրքն օգտագործելով որոշակի գործողություններ կատարելուն նպաստելու համար ստացել է առանձնապես խոշոր չափերով կաշառք։ Իսկ մանկաբարձ գինեկոլոգ, ՀՀ վաստակավոր բժիշկ Ռազմիկ Աբրահամյանին մեղադրանք է առաջադրվել, որ ի պաշտոնե մոր ու մանկան առողջության պահպանման կազմակերպման աշխատանքները և առողջապահական համակարգի` նախարարության միջոցով իրականացվող ֆինանսավորման աշխատանքները համակարգող ՀՀ առողջապահության նախարարի տեղակալ Արսեն Դավթյանին տվել է առանձնապես խոշոր չափերով կաշառք։

Նշենք, որ Արսեն Դավթյանի պաշտպանը դիմել էր Վերաքննիչ քրեական դատարան՝ պարզելու, թե արդյո՞ք դատարան ներկայացված նյութերից կարելի է ենթադրել, որ Արսեն Դավթյանը կարող է կասկածվել կաշառք ստանալու մեջ։

Դատարանը մերժեց միջնորդությունը։

Հեղինակ՝ Իզաբել Սահակյան

Աղբյուր` Փաստինֆո