Փաստ ինֆո

Կառավարության այսօրվա նիստին վարչապետ Նիկոլ Փաշինյանը հայտարարել է, թե այսօր ՀՀ-ում կոռուպցիոներների հեռուստաընկերություններ կան։

«Առնվազն երկու հեռուստաալիքի լոգոյի տեղը կարելի է գրել կոռուպցիա, կամ «Կոռուպցիա գրուպ» ընկերությունը ներկայացնում է լուրերի հրատապ թողարկումը»,- հայտարարել է երկրի վարչապետը:

Ըստ նրա՝ դրանք կոնկրետ անձանց սեփականությունն են։ Փաշինյանը նման հայտարարությամբ հանդես է եկել հեռուստատեսային շուկայում մենաշնորհային դիրքի առկայության մասին խոսելիս ու հայտարարել է, թե հանրային կյանքի կարեւոր ինստիտուտների թափանցիկությունը պետք է բարձրացնել։
Ըստ նրա, Հայաստանում ստեղծվել է երկու կառույց, որոնցից մեկը բաշխում է հեռուստատեսային գովազդի շուկայում գոյացած գումարները, իսկ մյուսը չափում է հեռուստաընկերությունների վարկանիշները ու գումարները բաշխում՝ ըստ վարկանիշների:

«Հեռուստատեսային շուկայում գովազդի բաշխման այս համակարգը մոնոպոլիզացված է»,- ասել է նա։ Նա հայտարարել է, որ երկրում ինֆորմացիոն հոսքերը վերահսկելու հստակ գործառույթ կա եւ պետք չի թաքցնել դա։ «Մենք գիտենք , որ այդ գործառույթը կա , մենք գիտենք, որ այդ գործառույթը գտնվում է հանրապետության նախկին ղեկավարության հետ կապված, ընտանեկան կապեր ունեցող անձանց վերահսկողության ներքո» ։

Փաշինյանն ասել է, թե ՀՀ կառավարությունը վերջին մեկ ու կես տարվա ընթացքում թափանցիկության առումով հսկայական քայլեր է կատարել եւ պետք է կատարի հաջորդ քայլը՝ Հայաստանում հասարակական կազմակերպություններն ու լրատվամիջոցները պետք է լինեն թափանցիկ՝ սկսած իրական սեփականատերերի թափանցիկությունից:

«Էդպիսի հեռուստաընկերության գործունեությունը մեզ համար ոչ միայն հիմնական կոռուպցիոներների շրջանակն է բացահայտում, այլեւ նրանց շոշափուկների ու մետաստազների: Հետագայում կարծում եմ մեր օպերատիվ աշխատանքը կոռուպցիայի դեմ պայքարում բավականին հեշտացնում է եւ երկրորդ, այն լրատվական պատերազմը, որ մեր կառավարության դեմ եւ ժողովրդի դեմ տարվում է, առաջին հերթին կառավարության դեմ, մեզ օգնում է, որ մենք մեր աշխատանքի որակն ավելի ու ավելի բարձրացնենք, բայց մենք պետք է գնանք էն ճանապարհով, որ իրական լոգոները գրվեն իրական հեռուստաընկերությունների վրա: Իմիջիայլոց, հեռուստաալիք կա Հայաստանում, որ արդեն վիճակագրություն ունեմ, որ խաղադրույք եմ անում, ասում եմ, թե պարտադիր որեւէ կոռուպցիոն քրեական գործով անցնող մեղադրյալ այնտեղից շատ ոգեւորված հարցազրույց է տալիս ու բացատրում, թե որտեղ են ձմեռում խեցգետինները»,- հայտարարել է վարչապետը:

Աղբյուր` Փաստինֆո