Փաստ ինֆո

«Տնտեսագիտությունը գիտություն է, որտեղ մի փոքրիկ ինֆորմացիան որեւէ երեւույթի մասին թույլ չի տալիս համապարփակ պատկերացում կազմել ամբողջ երեւույթի վերաբերյալ եւ միայն դրա վրա հենվելով եզրակացություն անելիս, բնականաբար, կարող ես երկիրը դնել շատ վատ իրավիճակի մեջ»,-«Փաստինֆո»-ի հետ զրույցում նման կարծիք հայտնեց տնտեսագետ, ԱԺ ֆինանսական և բյուջետային հարցերի մշտական հանձնաժողովի նախկին նախագահ Գագիկ Մինասյանը՝ անդրադառնալով վիճակագրական անճշտություններին, որոնք հունվար ամսվա ընթացքում տեղ են գտել ՀՀ վարչապետ Նիկոլ Փաշինյանի հրապարակումներում։

«Եթե մարդը ընդհանրապես չի տիրապետում ոլորտին, շատ լավ կլինի, որ ինքն այդ մասին ավելի քիչ խոսի։ Լավ կլիներ, վարչապետը խոսեր մամուլի ազատության մասին, լրագրողների նկատմամբ ճնշումների մասին, այդ բնագավառից նա, կարծում եմ, քաջատեղյակ է եւ իր վրա չի բերի այնպիսի քննադատություն, որի տակից ոչ միայն ինքը , այլեւ իր շրջապատը չեն կարող դուրս գալ»,-հորդորում է տնտեսագետը։

Ըստ Մինասյանի, այն փաստը, որ վերջին օրերին ՀՀ վարչապետ Նիկոլ Փաշինյանը պարբերաբար տարբեր վիճակագրական տվյալներ է ներկայացնում, ապա դրանք հեռացնում կամ նշում, որ դրանցում անճշտություն կա, հենց վերոնշյալի ճշմարտացիության վկայությունն է։

Թեեւ տնտեսական տարին նոր է սկսվել եւ վերլուծության հարուստ նյութ չունենք, բայց ըստ Մինասյանի, 2019 թվականի արդյունքներն ու 2020 թվականին նկատելի իրողությունները, որոշակի կանխատեսումներ կարող ենք անել։ Նախորդ տարվա հաջողությունների առյուծի բաժինը, ըստ մասնագետի, պայմանավորված էր այն հանգամանքով, որ ԵԱՏՄ-ի շրջանակում Հայաստանն ուներ ավտոներկրման համար արտոնյալ ռեժիմ, որը թույլ էր տալիս 3-րդ երկրներից ներկրված ավտոմեքենաները արտահանել ԵԱՏՄ երկրներ։

Մինասյանի խոսքով, ամենահամեստ հաշվարկներով այն պետբյուջեի համար 115 միլիարդ դրամի հավելյալ եկամուտ ապահովեց, որը թույլ տվեցին իրականացնել ծախսեր, որոնք անհնար կլինեին առանց այդ արտոնյալ ռեժիմի։ Ընթացիկ տարում եկամուտների այդ մեծ աղբյուրը չի լինելու, որը քաղաքացիներին հնարավորություն էր տվել ներգրավվել տնտեսական շրջանառության մեջ, հավելյալ եկամուտներ ու արտարժույթի մեծ ծավալի ներհոսք ապահովել, ինչի շնորհիվ էլ ռեզերվների կտրուկ աճ ու դրամի կայունություն էր արձանագրվել։

«Այս ամենը ավարտվեց դեկտեմբերի 31-ով։ Այն բոլոր դրական երեւույթները, որոնք պայմանավորված էին այս արտոնյալ ռեժիմով, այս տարի չեն լինելու ։ Նախորդ տարվա նկատմամբ պետբյուջեի եկամուտները ավելանալու են ընդամենը 8 տոկոսով, իսկ տնտեսական աճը 4.9 տոկոս է հայտարարվել, որը մեր պետության բնական աճից նույնիսկ ավելի ցածր է, որովհետեւ մեր բնական աճը 5 տոկոս է»,-բացատրեց Գագիկ Մինասյանը։

Ինչ վերաբերում է այսպես ասած ՀԴՄ-ների էֆեկտին, ինչի մասին շատ է սիրում խոսել վարչապետ Փաշինյանը, ըստ Մինասյանի, դա տնտեսական զարգացման հիմք չի կարող հանդիսանալ։ «ՀԴՄ-ների էֆեկտը սպառվող է, մենք արդեն հասել ենք ՀԴՄ-ների բավականին մեծ կիրառման, դա սպառում ունի եւ կավարտվի այն ժամանակ, երբ բոլոր գործարքները ՀԴՄ-ներով կիրականացվեն , բնականաբար, տնտեսական զարգացումը դրա վրա հենվել չի կարող։

Դա միամտություն է, միայն տնտեսագիտությունից հեռու մարդը կարող է այդպիսի բան պնդել»,-շեշտեց Գագիկ Մինասյանը։
Ըստ մասնագետի, տնտեսական զարգացումը հնարավոր է միայն մի դեպքում՝ եթե երկրում ներդրումներ կան։

«Այն քաղաքականությունը, որ այսօր վարվում է Հայաստանում, ներդրումների համար ամենաանբարենպաստ պայմաններն է ստեղծում, որովհետեւ անկանխատեսելի տնտեսական իրավիճակ է, երկրում, ըստ էության, դատարանները չեն գործում կամ գործում են մեկ մարդու կամքով եւ այդ մարդը Փաշինյան Նիկոլն է, որը դրա մասին ուղղակի հայտարարել է»։

Գագիկ Մինասյանը կանխատեսելի իրավիճակ չի տեսնում նաեւ տեւական տնտեսական զարգացման առումով։ Ըստ նրա, բոլորը գիտեն՝ այն ժամանակ, երբ Փաշինյանի կառավարությունը հրաժարական տա, իսկույնեւեթ առաջանալու են բազմաթիվ հարցեր, որոնք թույլ չեն տալու, որ ներդրողը կանխատեսելի տեւական ժամանակում ներդրումներ իրականացնի։

«Մենք ունենք ուղղակի զուտ ներդրումների նվազում , որովհետեւ իրավիճակը ոչ թե պահվում է նույն մակարդակի վրա, այլ նույնիսկ նվազում է»,-նշեց Մինասյանը։

Ինչ վերաբերում է ՀՀ վարչապետ Նիկոլ Փաշինյանի շտապողականությանն ու ակտիվությանը՝ գրեթե ամեն օր վիճակագրական տվյալ հրապարակել, ըստ մասնագետի, այստեղ տնտեսագիտությունն անելիք չունի։

«Կարծում եմ այստեղ հոգեբանի մասնակգիտությունը կարող է օգտակար լինել, մարդը պետք է հասկանա, որ եթե իրողություններ ինչ-որ ձեւի են, ապա դրանց մասին ուռճացված պատկերացումներ երկրի ղեկավարի կողմից ներկաացնելը որեւէ լավ բանի չի կարող բերել»,-«Փաստինֆո»-ի հետ զրույցում եզրափակեց Գագիկ Մինասյանը։

Աղբյուր` Փաստինֆո