Փաստ ինֆո

 ԵԿՄ նախկին նախագահ, ԱԺ նախկին պատգամավոր Մանվել Գրիգորյանի առողջական վիճակի եւ դատախազության նախաձեռնությամբ այսօր հրավիրված դատական նիստի շուրջ «Փաստինֆո»-ն զրուցել է Մանվել Գրիգորյանի պաշտպան Արսեն Մկրտչյանի հետ։

-Պարոն Մկրտչյան, տեղեկություն ունե՞ք Ձեր պաշտպանյալի առողջական վիճակի մասին։

-Մանվել Գրիգորյանը ծանր վիճակում է, մի քիչ առաջ հետազոտության են տարել, անընդհատ կապի մեջ եմ  հիվանդանոցի հետ, ծանր է վիճակը։

-Կենսական ֆունկցիաների հետ կապված խնդիր ունի՞։

-Ես տեսել եմ ՝ գիտակցություն է ունեցել։

-Խոսե՞լ եք իր հետ։

-Այո, իհարկե խոսել եմ։ Կներեք, հիմա չեմ ուզում հրապարակել։

-Տեսակետ կա, որ Մանվել Գրիգորյանը Մարտի 1-ի  գործով կարեւոր վկա է եւ  նրա խափանման միջոց կալանավորումը չփոխելը հենց այդ հանգամանքով է պայմանավորված՝ որ նա մնա կալանքի տակ։ Կիսո՞ւմ եք այդ մոտեցումը։

-Համենայնդեպս, ես կարծում եմ, որ նման  վարկածը բացառել չի կարելի։

-Պաշտպանական խումբը քանի՞ անգամ է Մանվել Գրիգորյանի խափանման միջոց կալանավորումը փոխելու միջնորդությամբ հանդես եկել եւ մերժվել։

-Քանի անգամ որ նիստ եղել է, այդքան անգամ դիմել ենք,  մի անգամ չենք դիմել երեւի, մնացած  բոլոր նիստերին դիմել ենք։

-Ինչպե՞ս եք գնահատում դատախազության նախաձեռնությունը՝ Մանվել Գրիգորյանի առողջական վիճակի վատթարացման պատճառով նրա խափանման միջոցը փոփոխելու նպատակահարմարության հարցը քննարկելու նպատակով դատական նիստի հրավիրումը։

-Կգնանք՝ կտեսնենք, ցինիզմ է լինելու էլի, ի՞նչ է լինելու։ Շոու։ Ես հիմա էլ չեմ հավատում, որ խափանման միջոցի մասին իրական  խոսք է գնալու։

-Կարծում եք չե՞ն փոխելու խափանման միջոց կալանավորումը։

-Կարծում եմ դրան չի ուղղված դատախազության միջնորդությունը։ Ես  տեղյակ եմ, որ խափանման միջոցի հետ կապված է նիստը հրավիրվում, բայց չեմ հավատում, որ այդքան կամք կա, էդպիսի հանձնարարություն կա, որ խափանման միջոցը փոխվի։ Ես տեղեկություն չունեմ, որ դատարանը թույլտվություն ունի արդար դատաքննություն իրականացնելու։

-Ումի՞ց թույլտվություն, պարոն Մկրտչյան։

-Չգիտե՞ք մեր երկրում ով է թույլտվություն տալիս։

Հեղինակ՝ Մ. Ղ.

Աղբյուր` Փաստինֆո