Փաստ ինֆո

Քրեակատարողական հիմնարկներում մահվան դեպքերի թիվը կտրուկ մեծացել է, ինչն անհանգստացնող հանգամանք է։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը՝ նշելով, որ խոսքը գնում է մարդկային կյանքերի մասին։

«Մարդու իրավունքները բոլոր անձանց իրավունքներն են՝ անկախ նրանց սոցիալական իրավունքներից»,-ասաց Լարիսա Ալավերդյանը՝ ընդգծելով, որ Մանվել Գրիգորյանի նկատմամբ վերաբերմունքը որակում է որպես կտտանք։ Բացի այդ՝ առաջին ՄԻՊ-ը մտահոգված է, որ հասարակության մեջ մտցվել է միտք, որ լավ մարդն արժանի է, որ իր իրավունքները պաշտպանված լինեն, իսկ այն մարդիկ, ով հասարակության մեջ ընկալվում է որպես ոչ այդքան լավ մարդ, պետք է տանջվի։

Ըստ նրա՝ Մանվել Գրիգորյանի կալանքն արդեն իսկ պատիժ է՝ մինչ դատավճիռը, ինչի վերաբերյալ բազմաթիվ անգամներ միջազգային տարբեր կազմակերպությունները հայտարարել են, որ չի կարելի այնպես վարվել, որ նախնական կալանքը պատիժ ընկալվի։ Լարիսա Ալավերդյանն ընդգծեց, որ Մանվել Գրիգորյանին ազատ արձակելը նրան անմեղ չի դարձնում և նրան առաջադրված մեղադրանքները կշարունակեն մնալ ուժի մեջ, պարզապես խոսքը գնում է խափանման միջոցը փոխելու մասին.«Ինչքան շուտ, այդքան լավ»։

Դիտարկմանը, որ Մանվել Գրիգորյանի նկատմամբ ընտրված խափանման միջոց կալանավորումը փոխելու մասին պաշտպանների ներկայացրած միջնորդությունները պարբերաբար մերժվել են, Լարիսա Ալավերդյանն ասաց. «Չեն դիտարկում և կարծում եմ, որ լուրջ չեն վերաբերվում այդ միջնորդություններին։ Այդ միջնորդություններին վերաբերվում են ինչպես փորձ՝ անմեղ ճանաչելու Մանվել Գրիգորյանին, այնինչ դա այդպես չէ։ Այդ միջնորդությունների պարբերաբար մերժումներն, ինձ համար առնվազն, նշանակում են, որ իրավապահ և դատաիրավական համակարգի կողմից կալանքը՝ տվյալ դեպքում Մանվել Գրիգորյանի հանդեպ, դիտարկվում են որպես պատիժ, ինչը դատապարտելի է»,- ասաց Լարիսա Ալավերդյանը՝ հավելելով, որ մտահոգիչ է նաև գործի քննության ձգձգումը. «Որ է այդ ողջամիտ ժամկետի պահպանումը։

Պատահական չէ, որ ՀՀ ՄԻՊ-ն առաջարկել է ՀՀ ՔՕ-ում մտցնել այնպիսի հոդվածներ, որոնք ավելի շոշափելի կդարձնեն այդ միջազգային իրավունքի պահանջը, այն է՝ ողջամիտ ժամկետում անցկացնել դատական գործընթացները»։ Անդրադառնալով Մանվել Գրիգորյանի պաշտպանների կողմից ՄԻԵԴ ուղարկված դիմումներին՝ Ալավերդյանն ասաց, որ ՄԻԵԴ-ը բազմաթիվ այդպիսի վճիռներ է կայացրել, ընդ որում այնպիսի անձանց նկատմամբ, ում մեղքն արդեն ապացուցված է եղել։ «Առաջնայինը մարդու կյանքի իրավունքն է, այսինքն՝ նրա առողջական վիճակը և պահվելու պայմանները։ Ինչու՞ ենք սպասում, որ դա արվի ՄԻԵԴ-ի կողմից»,- ասաց Լարիսա Ալավերդյանը՝ նշելով, որ մեր դատական իշխանություններն իրենց տեղում չեն և ամբողջովին չեն կատարում իրենց պարտականությունները, եթե հարկ է լինում դիմել ՄԻԵԴ։

Հեղինակ՝ Իզաբել Սահակյան

Աղբյուր` Փաստինֆո