Փաստ ինֆո

ԱԺ «Իմ քայլը» խմբակցության ղեկավար Լիլիթ Մակունցը զրուցել է խմբակցության պատգամավոր Սոֆիա Հովսեփյանի հետ և հայտնել իր դիրքորոշումն այն մասին, որ Կարեն Սուրախանյանի կողմից արված արտահայտությունները ընդունելի չեն։

«Դրա կապակցությամբ պարոն Սարուխանյանն արդեն հրապարակային ներողություն հայտնել է, իսկ մնացյալ հարցերը խմբակցության, կուսակցության ներքին կարգապահական հարցերն են, որոնք լուծում ստացել են հենց կուսակցության ներսում։ Մենք պարոն Սարուխանյանի հետ խոսել ենք և այդ հարցերը քննարկել ենք կուսակցության կարգապահական հարցերի շրջանակներում»,-այս մասին այսօր լրագրողների հետ ճեպազրույցում ասաց Մակունցը։

Հարցին, այդ ներողությունը հավուր պատշաճի էր, խմբակցության ղեկավարը պատասխանեց. «Երբ ինչ-որ մեկը ներողություն է խնդրում...լավ, մենք ի՞նչ ենք ուզում։ Մարդը ինչ-որ սխալ խոսք է արտահայտել, որը ունեցել է բուռն արձագանք և իսկապես ինձ համար անընդունելի էր, դրա մասին ասել եմ և՛ տիկին Հովսեփյանին, և՛ պարոն Սարուխանյանին»։

Մակունցն ասաց, որ ամռանը մշակել է մի նախագիծ, որով առաջարկվում է էթիկայի մշտական հանձնաժողով ստեղծել ԱԺ-ում։ Խմբակցության ղեկավարը նշեց՝ հետամուտ է լինելու, որպեսզի առաջիկայում այդ հարցը քննարկվի ԱԺ նիստերի դահլիճում. «Դա կարող է տեղի ունենալ միայն սահմանադրական փոփոխությամբ, բայց դրան պետք է գնալ, որպեսզի ցանկացած դեպք, որն առնչվում է այնպիսի հարցերին, որը կարծում ենք՝ էթիկայի հանձնաժողովը պետք է քննության առնի, ուրեմն պետք է հատուկ որոշում ընդունվի և քննարկվի»։

Պատասխանելով հարցին՝ որն է նպատակը մշտական հանձնաժողով ստեղծել, եթե օրենքը թույլ է տալիս ժամանակավոր հանձնաժողով ձևավորել անհրաժեշտության դեպքում, Մակունցն ասաց, որ իրենք ընդդիմության խմբակցությունների պատգամավորների պարագայում գործընթաց չեն սկսում, որպեսզի քաղաքական հետապնդում չհամարվի։

«Որպեսզի որևէ կերպ ո՛չ հետապնդվի որպես հետապնդում, ո՛չ մեկնաբանվի որպես կողմնակալ վերաբերմունք, անհրաժեշտություն է առաջանում էթիկայի հանձնաժողով ստեղծել, եթե անգամ դա պահանջում է սահմանադրական փոփոխություն, որը կարող է առաջարկել ԱԺ-ն»,-ասաց Լիլիթ Մակունցը։

Հիշեցնենք, որ ԱԺ «Իմ քայլը» խմբակցության պատգամավոր Սոֆիա Հովսեփյանը ֆեյսբուքյան գրառում էր կատարել, թե Առողջապահության նախարարությունը որդեգրել է հիվանդանոցները փակելու վարքագիծ։ Այս գրառմանն արձագանքել էր Արսեն Թորոսյանի խորհրդական Աշոտ Սարգսյանն ու գրել. «Տիկին Սոֆյա Հովսեփյան, երբ դուք դեռ փոխմարզպետ էիք, կարող էիք զբաղվել բժիշկների կադրային քաղաքականությամբ, հագեցնեիք մասնագետներով Մարալիկի ծննդատունը, նրանց շնորհիվ ծնունդները կշատանային և բնականաբար աշխատավարձերն էլ կբարձրանար։ Շուտվանից գիտեիք նման խնդրի մասին, զբաղվեիք։ Ի վերջո` ծննդատունը մարզպետարանի ենթակայության տակ է գտնվում և մարզպետարանը ունի բուժվարչություն։ Կա պատճառ և կա հետևանք։ Այսօրվա առաջացած խնդիրը նաև ձեր չարածի հետևանք է»։

Գրառմանը արձագանքել է Սոֆյա Հովսեփյանը, մասնավորապես, նշելով․ «Այո, դուք ճիշտ եք՝ ես զբաղվել եմ, հիմա, քանի որ բաց, ապա բաց խոսեմ։ 18 աշխատակիցներին տրվեց ծանուցում, որ պետք է ազատվեն, որպեսզի գումար տնտեսեր, քանի որ ուռճացած հաստիքներ էին։ Երկու ամիս անց, երբ պետք է հրամանը լիներ ազատման, գործող մարզպետը կանխեց, քանի որ ըստ տնօրենի հավաստման՝ մի կրճատվողի որդի, որի մայրը ամենատարեցն էր, զանգել էր մարզպետին և գործը կանխվեց, մարզպետն առաջարկել էր գոնե այդ մեկին թողնեն, մնացածին կրճատեն, սակայն տնօրենը չէր արել, բոլորին պահել էր, թեև ես հորդորեցի, որ դա արատավոր երևույթի շարունակություն է, պահանջեցի կրճատել բոլորին ու առաջացավ բախում։ Խնդիրը ներկայացրել եմ թե՛ նախարարին, թե՛ մի շարք այլ անձանց։ Հաստատությունը դրա պատճառով ամսական շուրջ 1 մլն մինուս գնաց, սակայն տնօրենը վախեցած մարզպետի հրահանգից չկրճատեց։ Արդյունքում իմ և մարզպետի հարաբերությունները սրվեց։ Դրանից հետո ընտրվել եմ և եկել ԱԺ։ Այդ նույն հարցով մի քանի անգամ դիմել եմ նախարարի խորհրդականներին, փոխնախարարի, բայց զինվորական տղայի զանգը զորեղ էր։ Արդյունքը սա։ Վերջին հորդորս եղել է տնօրենին մեկ ամիս առաջ, ասեց՝ քննարկում կանեմ, քննարկման արդյունքը ծննդատան փակումն էր, և սա կփաստեն բոլոր աշխատակիցները, քանի որ այն ժամանակ նույնպես իմ ջանքերով պահվեց»։

Նույն գրառման տակ Սոֆյա Հովսեփյանին արձագանքել էր այն ժամանակ Շիրակի մարզպետ, այժմ «Իմ քայլը» խմբակցության պատգամավոր Կարեն Սարուխանյանը։ Նա մանրամասնել էր մարզպետարանի հետ կապված միջադեպը ապա գրել. «Իսկ Սոֆիային երկու խորհուրդ կտամ.

1. Հարգիր քո կարգավիճակը և այսուհետ խոսիր ոչ թե բամբասանքների լեզվով՝ այլ փաստերով և ապացույցներով։

2. Ամուսնացիր՝ կանցնի)))»։

Աղբյուր` Փաստինֆո