Փաստ ինֆո

ԱԺ «Իմ քայլը» խմբակցության պատգամավոր Սիսակ Գաբրիելյանն ու խմբակցության ղեկավար Լիլիթ Մակունցը առաջարկում են «Հարկային օրենսգրքում» լրացումներ կատարել և մագիստրատուրայում սովորող ուսանողներին որոշ արտոնություններ տալ։

«Կառավարության և «Իմ քայլը» դաշինքի ծրագրով խրախուսում ենք աղքատության հաղթահարումը կրթության և աշխատանքի միջոցով, և հենց այս երկու գաղափարներն էլ ներառվում են մեր նախագծում։ Մենք կարծում ենք, որ խրախուսելով կրթությունն ու աշխատանքը, երկու կոմպոնենտ կա. բոլոր այն քաղաքացիներն, ովքեր ուսմանը զուգահեռ կաշխատեն, իրենց եկամտային հարկը կվերադարձվի ուսման վարձի չափով։ Սկզբնական մասով, սա նաև բակալավրի մասով էինք նախատեսել, բայց քանի որ «Կրթության մասին» օրենքը այժմ չի ընդունվել, այս փուլում սա նախատեսում ենք կիրառել մագիստրատուրայի, օրդինատուրայի դեպքում»,-ասաց նախագծի հեղինակներից Սիսակ Գաբրիելյանը։

Նա նշեց, որպեսզի բյուջեի հետ կապված ռիսկերը կանխատեսելի լինեն, ապա սկզբնական փուլում նախատեսվում է՝ արտոնությունները կգործեն Կառավարության կողմից սահմանաված մասնագիտությունների դեպքում. «Ինչպես գիտեք, այսօր կան մի շարք ոլորտներ, մասնագիտություններ, որոնց դեպքում պահանջարկը շատ մեծ է, բայց չկան մասնագետներ»։

Լիլիթ Մակունցն էլ ավելացրեց, որ այս նախագծով խրախուսվում է աշխատանքը. «Մենք ունենք այսպիսի մոտեցում, որ ուսանողների վարձավճարը նաև մագիստրատուրայում հոգում են ծնողները, ընտանիքները։ Եվ մենք գտնում ենք, որ մագիստրատուրայում սովորող ուսանողներն այն կարգավիճակում են, որ կարող են և՛ աշխատել, և՛ հոգալ իրենց ուսման վարձը։ Այստեղ նաև հոգեբանություն, մոտեցում է ձևավորվում, որը կարող է նաև վարակիչ լինել մյուս ոլորտների համար»։

Աղբյուր` Փաստինֆո