Փաստ ինֆո

Իրականում 150 ծնունդը շատ ցածր թիվ է ծննդօգնության ծառայությունները արդարացված համարելու համար, և ամենասկզբից մենք քննարկում էինք մինիմում 300 ծննդի տարբերակը, սակայն ի սկզբանե ծնունդների վիճակագրությունն ունենալով իջեցրինք շեմը, որ գոնե 2 օրը մեկ ծնունդ լինի։ Այս մասին այսօր հրավիրված ասուլիսում ասաց Առողջապահության նախարար Արսեն Թորոսյանը։

Ըստ նրա՝ եթե ցանկություն կա զբաղվել նորածնային կամ մայրական մահացությամբ, ապա իրենց ընտրած քաղաքականությունը միանշանակ ճիշտ է. «Այն ծննդատներում, որոնք ցանկանում ենք լուծարել, մանկական և մայրական մահացության դեպքեր չեն եղել, որովհետև իրենք ի սկզբանե հղում տալով իրենց մասնագիտական գիտելիքներին և մեր կարգերին, բարձր ռիսկի հղիությամբ հղիներին տեղափոխում են մոտակա ավելի բարձր մակարդակի ծննդատուն։ Բայց պատկերացրեք մի ծննդատուն, որտեղ չկա վիրահատարան։ Ծննդաբերության ժամանակ կեսարյան հատման հրատապ անհրաժեշտություն է առաջանում, ի՞նչ պետք է անեն, փորձելու են հրատապ տեղափոխել ավելի բարձր մակարդակի ծննդատուն։ Ինչու՞ դա անել վտանգելով ծննդկանի և երեխայի կյանքը, եթե կարելի է անել պլանավորված և ավելի քիչ ռիսկի տակ դնելով մեր ապագա քաղաքացիների կյանքը»։

Նախարարը տվյալներ հրապարակեց, որում ներկայացվում են համայնքներն իրենց մոտակա բուժհաստատություններով։

«Աչաջուր-Իջևան հեռավարությունը 17 կմ է, իսկ ժամանակը 19 րոպե է, ճանապարհն էլ շատ լավն է։ Եղվարդից 3 ուղղություն եմ գրել, սա արել եմ մեր բոլոր մտահոգ քաղաքացիների համար։ Եղվարդից Աբովյան՝ 16,6 կմ, որը կտևի 20 րոպե (ի դեպ սրանք շատ դանդաղ արագությամբ ենք հաշվարկել), Եղվարդից Աշտարակ՝ 15,7 կմ, 21 րոպե, Եղվարդից Երևանի «Սուրբ Գրիգոր Լուսավորիչ» ծննդատուն՝ 26,5 կմ, 34 րոպե։ Արտենիմից դեպի Թալին 34 րոպե է և 17,6 կմ,իսկ դեպի Արմավիր 35 րոպե է և 32 կմ։ Մարիկի դեպքում նույնպես ընտրել եմ 3 տարբերակ։ Դեպի Արթիկ 13,5 կմ է, որը կտևի 20 րոպե, դեպի Գյումրու ամենամեծ ծննդատներ, մեկը 30 րոպե է, 26,5 կմ, իսկ մյուսը 32 րոպե։ Դեպի Ծաղկահովիտ 19 րոպե 20 կմ»,-ասաց Թորոսյանը։

Աղբյուր` Փաստինֆո