Փաստ ինֆո

Եղվարդի ծննդատունն այս պահի դրությամբ չի փակվի և հիմա էլ շարունակում է աշխատանքը։ Այս մասին Առողջապահության նախարարի հետ հանդիպումից հետո հայտարարել է Կոտայքի մարզպետ Ռոմանոս Պետրոսյանը։

«Նաիրի» բկ-ի ծննդօգնության բաժանմունքի պետական ֆինանսավորումը դադարեցնելու մասին գրավոր որոշում չենք ստացել, պարզապես նախարարության մեր գործընկերները, նաև նախարարը, մինչ այս մեզ հայտնել էին, որ նման քաղաքականություն են իրականացնում այն փաստերի հիման վրա, որոնք պարոն Թորոսյանն արդեն հրապարակել է»,- այս մասին այսօր լրագրողների հետ ճեպազրույցում ասաց Ռոմանոս Պետրոսյանը։

Նա հայտնեց, որ տարվա սկզբին պաշտոնական գրությամբ դիմել է Առողջապահության նախարարին ու խնդրել վերանայել որոշումը, նաև հայտնել է իր մտահոգությունները. «Հայտնել եմ, որ «Նաիրի» բուժկենտրոնը դրականորեն տարբերվում է այլ ծննդատներից ու բուժկենտրոնների ծննդօգնության բաժիններից»։

Մարզպետի խոսքով, ինքն այսօր հանդիպել է նախարար Արսեն Թորոսյանի հետ, ներկայացրել մի շարք փաստեր և այժմ նախարարի հետ փոխըմբռնում կա.

«Այս պահին արձանագրում ենք, որ այս րոպեին էլ, եթե ծննդկան մոտենա ծննդատանը, ապա ծննդօգնություն իրականացվելու է։ Ծննդատունը չի փակվում, 2-3 օրվա մեջ նախարարը կառավարությունում, նաև Կառավարության նիստին, կներկայացնի այն բոլոր փաստարկները, որոնք հնչել են իմ կողմից կամ մյուս մարզպետների կողմից իրենց մասով, 2-3 օրվա ընթացքում վերջնական անդրադարձը կունենանք»։

Պետրոսյանն ասաց՝ լիահույս է, որ մասնավորապես Եղվարդի դեպքում կլինի դրական լուծում, նաև ծննդօգնության բաժանմունքը տեխնիկապես կվերազինվի։

«Կարող եմ պաշտոնապես հայտարարել, որ 2022-2024թթ նախատեսվում է Եղվարդում հիվանդանոցային նոր մասնաշենքի կառուցում։ Նաև կարող եմ ասել, որ անցյալ տարի ծննդօգնության բաժանմունքն ավելի վատթար շենքից տեղափոխել ենք հիմնական մասնաշենք։ Այսինքն՝ առնվազն մարզային իշխանության ու մեր քաղաքական թիմի, ինչպես նաև ոլորտը համակարգող նախարարության անունից կարող եմ ասել, որ որևէ միտում չկա քաղաքացու շահը ստորադասելու, քաղաքացու շահին դեմ գնալու, պարզապես հնչել են բավականին մտահոգություններ, որոնք գուցե որոշում կայացնողները հաշվի չէին առել կամ խորապես չէին ուսումնասիրել»,-ասաց մարզպետը։

Հեղինակ՝ Սոնա Գեւորգյան

Աղբյուր` Փաստինֆո