Փաստ ինֆո

«Չի բացառվում, որ կառավարությունը սուբյեկտիվ կերպով իր համար յուրային կազմակերպություններին հարկային արտոնություններ է տալիս եւ հարցադրումներ են հնչում՝ այդ ի՞նչ չափանիշների հիման վրա»,- «Փաստինֆո»-ի հետ զրույցում ասաց սահմանադրագետ Գոհար Մելոյանը՝ անդրադառնալով ՀՀ փոխվարչապետ Տիգրան Ավինյանի որոշմանը, որով Սորոսի գրասենյակից ֆինանսավորվող մի շարք կազմակերպություններ ազատվել են մի շարք հարկերից։

«Նախ, պետք է ուսումնասիրել փաստաթղթում նշված բոլոր կազմակերպությունների կանոնադրություններում կանոնադրական նպատակները, արդյո՞ք նրանց գործունեությունը համապատասխանում է այդ նպատակներին, բայց անգամ առանց այդ ուսումնասիրության , օրինակ մի տարրական դիտարկում՝ «Ֆակտոր» տեղեկատվական կենտրոն կազմակերպության անվանումից բխում է, որ այն տեղեկատվական բնույթի գործունեություն է ծավալում , որովհետեւ կազմակերպության անվանումը, ըստ էության համապատասխանում է տվյալ կազմակերպության գործունեության առարկային ու նպատակին։ Այդ ի՞նչ տեղեկատվական բնույթի բարեգործական գործունեություն կարող է ծավալել «Ֆակտոր»-ը, որը տարբերվի այլ տեղեկատվական կազմակերպությունների գործունեությունից »,-ասաց Գոհար Մելոյանը՝ հավելելով, որ տեղեկատվական բնույթի գործունեությունը գնահատելի է՝ բարեգործակա՞ն է, թե՞՝ ոչ։

Հիշեցնենք, այս մասին Ֆեյսբուքում գրել էր «ՎԵՏՕ» հասարակական-քաղաքական շարժման ղեկավար Նարեկ Մալյանը ՝ կցելով նաեւ որոշումը։

Գոհար Մելոյանը հիշեցրեց Սորոսի հիմնադրամի կողմից ֆինանսավորվող 2 ՀԿ-ների՝ «Իրազեկ քաղաքացիների միավորման Ստեփանակերտի գրասենյակ»-ի և «Թրանսփերենսի ինթերնեյշնլ» հակակոռուպցիոն կենտրոնի օրինակը, որոնք Արցախում 2019թ. սեպտեմբերին կայացած ՏԻՄ ընտրություններին դիտորդական առաքելություն իրականացնելու նպատակով կառավարության կողմից համապատասխանաբար 16 միլիոն 200 հազար և 17 միլիոն 480 հազար ՀՀ դրամ էին ստացել, իսկ

կառավարությունը, ըստ Մելոյանի, խախտել էր «Գնումների մասին» եւ «Բյուջեի մասին» օրենքները ։

«Ես ինքս ունեմ ՀԿ, հնարավոր է, որ իմ գնահատմամբ, իմ ՀԿ-ի գործունեությունն էլ է բարեգործական, ինչո՞ւ ինձ հնարավորություն չի տրվել ինչ-որ կերպ մասնակցել այդ որոշման կայացման սկզբնական փուլին, որպեսզի իմ ՀԿ-ին եւս գնահատեն այդ կազմակերպությունների շրջանակում»,-նկատեց Գոհար Մելոյանը՝ խոստանալով իրավական տեսանկյունից մանրմասն ուսումնասիրությունն առաջիկայում ներկայացնել։

Աղբյուր` Փաստինֆո