Փաստ ինֆո

Չեմ կարող վստահ պնդել էջ են կոտրել, թե մուտք են գործել, բայց եթե մուտք են գործել, նշանակում է՝ կոտրել են։ «Փաստինֆո»-ի հետ զրույցում այս մասին ասաց ԱԺ մարդու իրավունքների պաշտպանության մշտական հանձնաժողովի նախագահ Նաիրա Զոհրաբյանը՝ անդրադառնալով իր գրառմանն այն մասին, որ կեսգիշերին մուտք են գործել իր պաշտոնական էլեկտրոնային հասցե։

Պատգամավորը մանրամասնեց՝ Ջեյմս Մայեր ներկայացած մի անձ մեկ այլ հասցեում, պորտելում գրանցվելու հայտ է ներկայացրել իր էլեկտրոնային էջից. «Եթե ինչ-որ մեկը մտածում է իմ օգտահաշիվներում՝ կլինի դա ֆեյսբուք, մեսենջեր, վայբեռ, էլ. հասցե ինչ-որ հետաքրքիր բան կարող են գտնել, ապա դա ժամանակի, ռեսուրսի իզուր վատնում է։ Այդ առումով ես ամենահետաքրքիր քաղաքական գործիչն եմ, որովհետև ինչ մտածում եմ, այդ մասին բարձրաձայնում եմ։ Դավադրությունների տեսություններն էլ իմ սիրած ժանրը չեն»,-նշեց Նաիրա Զոհրաբյանը։

Վերջինս նշեց՝ էլեկտրոնային հասցեին ստանում է նամակներ դատապարտյալներից և բոլոր այն անձանցից, որոնց իրավունքները խախտվել են, պատասխանում է եվրոպական կառույցների նամակներին. «Եթե նրանց այդ գրագրությունը հետաքրքիր է և անպայման ուզում են ծանոթանալ այս կամ այն դատապարտյալի, կալանավորի, քաղաքացու, ում իրավունքները խախտվել են, թող ծանոթանան, ես որևէ խնդիր չունեմ, բայց գլոբալ առումով, իհարկե, սա այլանդակություն է»,-հավելեց Նաիրա Զոհրաբյանը։

Պատգամավորը չցանկացավ խախտել որևէ մեկի անմեղության կանխավարկածը, բայց նկատեց՝ եթե պարզվի վերջին շրջանում տարբեր լրագրողների, խմբագիրների՝ իրենց օգտահաշիվները կոտրելու վերաբերյալ հայտարարությւոններն իրականություն են, ապա դա երկիրը շատ վատ տեղ է տանելու.

«Որովհետև սա բացարձակապես անթույլատրելի գործելաոճ է։ Կրկնում եմ՝ ես գիտեմ իմ դեպքում իրականում ինչ է տեղի ունեցել և անկեղծ ասած դա ինձ բացարձակապես չի հետաքրքրում այն պարզ պատճառով, որ ես մտահոգություն չունեմ՝ կարող են ինչ-որ մի գրագրություն կարդալ»,-ասաց պատգամավորը՝ ընդգծելով, այնուամենայնիվ, դա ներխուժում է իր անձնական տիրույթ։

Նաիրա Զոհրաբյանը նաև տեղեկացրեց՝ պատրաստվում է պաշտոնապես դիմել իրավապահ մարմիններին։

Հեղինակ՝ Հասմիկ Կոշկարյան

Աղբյուր` Փաստինֆո