Փաստ ինֆո

Նախորդ բոլոր նախագահների պաշտոնավարման ժամանակ՝ Տեր-Պետրոսյանից Սերժ Սարգսյան՝ երբևէ այսքան կենցաղային մակարդակի իջեցված պետություն չենք ունեցել, երբեք պետության ղեկավարն իր ընտանեկան, ընդհուպ՝ ներանձնային խնդիրները չի հրապարակայնացրել, կնոջ ու երեխաների միջոցով չի փորձել փնթի ու խոհանոցային հաթաթաներ տալ այս կամ այն, նախկին կամ ներկա պաշտոնյային, քաղաքական գործչին: ՈՒղղակի ազգովի հայտնվել ենք աբսուրդային մի վիճակում, երբ ունենք վարչապետ, որի տարերքը եղել և մնում է դեղին մամուլը: Եվ որն ա՛յդ տրամաբանությամբ էլ երկիր է ղեկավարում: 

Ընդ որում, շարունակ այնպիսի տպավորություն է, թե ներկայիս իշխանությունն իրեն այդպես էլ իշխանություն չի զգում, քանի որ շարունակ կարծես ինչ-որ չեղած-պեղած վհուկների դեմ է պայքարում, որի վերջը, սակայն, չի երևում:

Բայց եկեք՝ տեսեք, ընդդիմություն լինի, թե՝ իշխանություն, կա մի ոլորտ, ուր օրվա իշխանությունն իրեն տեր ու տիրական է զգում: Դա ինտրիգների, բամբասախառն լուրերի, անձնական մոտիվներով դավերի ու դավադրությունների, մի խոսքով՝ դեղին մամուլին հատկանշական թեմաներն ու հորինվածքներն են:

ՈՒրիշ ինչ բացատրություն կարելի է տալ, երբ տարածաշրջանային բարդագույն հանգույցում գտնվող ՀՀ վարչապետը հրապարակ է բերում իր ընտանիքի դեմ ինչ-որ տեղ, ինչ-որ անձանց ձեռքով իբր հյուսվող դավադրությունների մի սցենար:

Իսկ միգուցե այս անհեթությունները հանրայնացնելը նպատակային է, քանզի մի ստվար հատված կա, որի կերակուրը հենց այդօրինակ սյուժեներն են և նրանց իր տիրապետության տակ պահելը: Չէ՞ որ ակնհայտ է, օրեցօր նվազում է իշխանության հանդեպ վստահության տոկոսը:

Հետաքրքիր է՝ ի՞նչ ասել է՝ «Հայկական ժամանակ»-ի ձեռքի տակ են հայտնվել փաստեր, որ վարչապետ Նիկոլ Փաշինյանի ընտանիքի անդամների, մասնավորապես կնոջ` Աննա Հակոբյանի եւ դստեր` Մարիամ Փաշինյանի դեմ քարոզչական արշավը, որ իրականացնում են մի քանի կոնկրետ լրատվամիջոցներ, համակարգվում եւ ներշնչվում է ԱԱԾ նախկին տնօրեն Արթուր Վանեցյանի կողմից»:

Եվ արդյո՞ք Փաշինյանի ընտանիքի հիշյալ անձինք թեկուզ փոքրիկ անցք ու արանք, չնչին մի մանրամասն իրենց կյանքից ու կենցաղից թողնում են: Նրանք հենց սկզբից են իրենց կենցաղային կյանքի մանրամասները պարտադրել են հանրությանը՝ իրենց անհարկի սելֆիներով ու լայվերով:

Սկսած ռեստորանի զուգարանում սելֆիներից, մինչև՝ ամենօրյա սրճախմություն, մինչև ընտանքի անդամների ծննդյան տարեդարձներ և անգամ՝ իրենց ինտիմ ու կենցաղային կյանքը հրապարակայնացնում են Փաշինյանն ու իր ընտանիքի յուրաքանչյուր անդամ: Այնքան մանրամասն, որ ոչ միայն ԱԱԾ ներկա ու նախկին ղեկավարներին, այլև ցանկացած դավադրությունների տեսությանը տեղ անգամ չի թողնվում:

Այնպես որ, լրատվամիջոցներ թիրախավորելու համատեքստում զանազան ոլորտների և ենթամշակույթների պատկանող անձանց անուններ մեջտեղ բերելով, միևնույն է, ազատ խոսքի իրավունքի դեմ իշխանության հարձակումները հնարավոր չէ կոծկել:

Փաստ է, որ հատկապես վերջին շրջանում գնալով ահագնացող է դարձել լրատվամիջոցների դեմ հարձակումները, նրանց հանդեպ ամենատարբեր շինծու մեղադրանքներ մոգոնելը:

Ի դեպ, եթե Վանեցյանն ինչ-որ հարցում մեղավոր է, ապա նրանում, որ չափազանց երկար հանդուրժեց ազգային անվտանգության ծառայությունը որակազրկելու Փաշինյանի քաղաքականությունը:

Իսկ հիմա ամեն ինչ սպասելի է, նույնիսկ՝ ԱԱԾ-ն դեպի ռեստորանների զուգարաններ գործուղելը:

Հեղինակ՝ Արթուր Գահնապետյան

Աղբյուր` Փաստինֆո