Փաստ ինֆո

Նոր ուղղությունների համար շատ մեծ ազդեցություն ունեցավ օդի տուրքը հանելը։ Լրագրողների հետ հանդիպման ժամանակ ասաց Քաղաքացիական ավիացիայի կոմիտեի նախագահ Տաթևիկ Ռևազյանը։

Վերջինս նկատեց, եթե մինչ օրս դեպի Եվրոպա ունեցել ենք 6- 7 ուղղություն, ապա այդ փոփոխությունից հետո ունենալու ենք 16-17 ուղղություն. «Շատ լուրջ ազդեցություն է ունեցել և 2020-ի ընթացքում լուրջ հոսքեր ենք սպասում։ Դա նաև փոխկապակցված է նրա հետ, թե որքան են Հայաստանին անդրադառնում միջազգային մամուլում։ Շատ լավ կլինի, որ որպես ՀՀ քաղաքացիներ կարողանանք ուղիղ չվերթներով, ավելի հարմար ժամերով և հնարավոր է ավելի էժան տոմսերով այցելել Եվրոպա։ Սա դրական կարող է ազդել նաև տուրիզմի վրա, քանի որ երբ Իտալիայի ուղղությունը բացվի, Իտալիայից էլ կգան»,-հավելեց Տաթևիկ Ռևազյանը։

Վաղը՝ հունվարի 14-ին Հայաստանից Ryanair-ի առաջին չվերթն է, սակայն Տաթևիկ Ռևազյանը նշեց, որ մի փոքր խնդիր կարող է առաջանալ. «Մեր բախտն է էլի։ Որոշել են Իտալիայում կարգավարները գործադուլ անել։ Դա ազդելու է Ryanair-ի վրա։ Այսինքն դա Ryanair-ի մեղքը չէ, մեզ հետ էլ կապ չունի։ Այսօր օրվա ընթացքում ավելի պարզ կլինի՝ ինչ է դա նշանակելու Հայաստանի համար։ Ես Ryanair-ի ղեկավարության հետ կապ հաստատել եմ, սկզբում Հայաստանը դրել էին «չեղարկման» ցուցակի մեջ, բայց հիմա հանել են, գործադուլի պատճառով սպասվում են ուշացումներ»,-նշեց Տաթևիկ Ռևազյանը։

Նա հավելեց, եթե գործադուլի հետ կապված փոփոխություններ լինեն, գուցե դա ազդի չվերթի չեղարկման վրա. «Եվրոպայում օրենք կա՝ գործադուլը քանի օր պետք է հայտարարել, դրա համար դժվար փոփոխություններ լինեն։ Մաքսիմում ուշացումներ լինեն, բայց ես չեմ որոշում կայացնողը»,-նշեց քաղավիացիայի կոմիտեի նախագահը։

Աղբյուր` Փաստինֆո