Փաստ ինֆո

Քննարկվում է «Քաղաքացիական գիտակցություն» ՀԿ խորհրդի անդամ Աստղիկ Մաթևոսյանի ֆեյսբուքյան էջը կոտրելու դեպքի առթիվ հանցագործության մասին հաղորդում ներկայացնելու հարցը։ Այս մասին «Փաստինֆո»-ի հետ զրույցում ասաց Աստղիկ Մաթևոսյանը։

«Խնդիրը կայանում է նրանում, որ ուղղվածությունը գալիս է հենց իշխանական շրջանակներից և իրավապահ մարմիններն այսպես, թե այնպես չեն աշխատելու։

Ամեն դեպքում քննարկում ենք իրավապահ մարմիններին դիմելու անհրաժեշտությունը, դրա հետևանքները։ Առայժմ քայլեր չենք ձեռնարկել, բայց հնարավոր է, որ առաջիկայում ինչ-որ որոշում ունենանք»,- ասաց Մաթևոսյանը։

Նրա խոսքով՝ թիրախը Antifake.am-ի հրապարակումներն են, որոնք վերաբերում են Նիկոլ Փաշինյանին և նրա ընտանիքին։

«Հարձակումը հաջորդել է Վլադիմիր Կարապետյանի պաշտոնանկության հետ կապված հրապարակմանը, որտեղ մի շարք բացահայտումներ էին արված՝ կապված Վլադիմիր Կարապետյանի պաշտոնանկությանը։ Այդ հրապարակման հենց գիշերը տեղի է ունեցել հարձակումը։ Կապում եմ սա հենց այդ հրապարակման հետ, ինչպես նաև բոլոր նախորդ հրապարակումների հետ, որոնք վերաբերում են Նիկոլ Փաշինյանի ընտանիքին »,- ասաց Մաթևոսյանը։

Վերջինս վստահեցնում է, որ ճնշում է իրականացվում բոլոր այն ԶԼՄ-ների նկատմամբ, որոնք համարձակվում են որևէ բան գրել Նիկոլ Փաշինյանի կամ նրա ընտանիքի անդամների մասին։

Հարցին, թե արդյո՞ք նախկինում եղել են նմանատիպ դեպքեր՝ Մաթևոսյանը պատասխանեց, որ կոնկրետ ֆեյսբուքյան էջը կոտրելու միջոցով ինչ-որ տեղեկություններ ստանալու և աղբյուրներ բացահայտելու փորձ առաջին անգամ է եղել, բայց իրենց գործունեությանը միջամտելու փորձեր պարբերաբար եղել են։

Հիշեցնենք, որ Աստղիկ Մաթևոսյանի ֆեյսբուքյան էջը կոտրելու մասին հայտնի դարձավ երեկ։

«Հունվարի 10-ին գիշերը ժամը 4:30 հարձակում է տեղի ունեցել իմ ֆեյսբուքյան էջի վրա, և չնայած ֆեյսբուքի՝ իմ էջ ապօրինի մուտք գործելու մասին զգուշացումներին՝ դա իրականացնողներին հաջողվել է, քանի որ արվել է գիշերով՝ քնած ժամանակ, որպեսզի կանխելու հնարավորություն չունենամ։

Այսօր տեղեկացա, որ գիշերով նման հարձակում է տեղի ունեցել նաև politik.am կայքի գլխավոր խմբագրի ֆեյսբուքյան էջի վրա (https://www.facebook.com/boroozman/posts/2699530806791798):

Եթե սկզբում կասկածում էի, որ իմ ֆեյսբուքյան էջը կոտրելու ջանքերը կապված է AntiFake.am-ի հրապարակումների հետ, ապա հիմա կասկած անգամ չունեմ։

Այս միջոցով անմիտ փորձ է արվել տեղեկություններ ստանալ AntiFake.am-ի հրապարակումների աղբյուրների վերաբերյալ, ինչը, ինչ խոսք, չի հաջողվել։

Դա է վկայում նաև ֆեյսբուքյան էջերը կոտրելուց և ապօրինի մուտք գործելուց հետո առավոտ լույսով «ՀԺ»-ում հրապարակված politik.am-ի դեմ գրված քարոզչական բնույթի հոդվածը։

Սա ոչ այլ ինչ է, քան իշխանության և անձամբ Նիկոլ Փաշինյանի կողմից ապօրինի միջամտություն և ոտնձգություն լրատվականների գործունեությանը կոնկրետ գործողություններով՝ ընդհուպ՝ գլխավոր խմբագիրների ֆեյսբուքյան էջերը կոտրելով։ Ընդ որում, ապօրինի մուտք գործելու մեթոդը (նայե՛լ կից նկարները) վկայում է այն մասին, որ դա արվել է Նիկոլ Փաշինյանի անմիջական հրահանգով հատուկ ծառայությունների միջոցով»,- հունվարի 12-ին ֆեյսբուքում գրել է Ա.Մաթեւոսյանը։

Հեղինակ՝ Իզաբել Սահակյան

Աղբյուր` Փաստինֆո