Փաստ ինֆո

Հանրային խորհրդի նորանշանակ նախագահ Ստյոպա Սաֆարյանը Կառավարության հետ քննարկումներ է սկսել տարածքների շուրջ, որտեղ Հանրային խորհուրդը պետք է ծավալի իր գործունեությունը։ Ըստ նրա՝ այդ տարածքները պետք է հասանելի լինեն հանրության համար։
Այսօր հրավիրված ասուլիսում ասաց Հանրային խորհրդի նորանշանակ նախագահ Ստյոպա Սաֆարյանը նշեց, որ այս մեկ ամսվա ընթացքում տարբեր հանձնաժողովների անդամների հետ իր զրույցները, քննարկումները հանգեցրել են նրան, որ տարածքը պետք է լինի այնպիսին, որ մարդիկ արագ կարողանան հավաքվել այնտեղ։

Սաֆարյանի խոսքով, հատկացվող տարածքը պետք է ունենա նաև դահլիճ, քանի որ անդամների քանակը հասնում է 150-160-ի։

«Գիտեմ, որ նախկինում Հանրային խորհրդին Կառավարությունն առաջարկել է առնվազն 2 տարբերակ, որոնք չեն ընդունվել, սակայն պատճառների մասին չեմ կարող ոչինչ ասել, բայց գիտեմ, որ առաջարկներից մեկը վերաբերել է Կառավարության շենքերից մեկում մշտական կեցավայր ունենալուն, մյուսը՝ Սարյանի հատվածին, չգիտեմ՝ ինչ պատճառներով չի ընդունվել»,-ասաց Սաֆարյանը։

Հանրային խորհրդի նախագահն ընդգծեց՝ ամենաառաջին անելիքը մշտական, գործող հասցե ունենալն է, իսկ երկրորդը՝ խորհրդի լիազորությունների իրացման համար անհրաժեշտ գործիքների հարցը։

« «Հանրային խորհրդի մասին» ՀՀ օրենքը մեզ տալիս է մի շարք իրավասություններ՝ անցկացնելու հանրային փորձաքննություն, հանրային կարծիքի ուսումնասիրություններ, սակայն ինչպես, ինչ միջոցներով, ինչ հաճախականությամբ դա նույնպես սահմանված չէ։ Ես պարոն վարչապետի հետ հանդիպել եմ և ժամանակ եմ խնդրել, որպեսզի պատրաստվի փաթեթը, թե ինչպես ենք պատկերացնում այդ գործիքների կիրառությունը, որովհետև եթե կա որևէ հանրային հնչեղության հարց կամ օրենսդրական նախաձեռնություն՝ կառավարության կողմից, որի վերաբերյալ պետք է վեր հանվի հանրության կարծիքը, բնականաբար դա չի կարող արվել մոտավորապես, աչքաչափով կամ ենթադրական»,-ասաց Սաֆարյանն ու ավելացրեց, որ Հանրային խորհրդին օրենքով գործիքներ տրված են, սակայն դրանք 10 տարի շարունակ չեն գործածվել։

Նա հայտնեց, որ առաջիկա օրերին հանդիպելու է վարչապետի հետ՝ թվարկված խնդիրները հանգամանորեն քննարկելու համար։

Աղբյուր` Փաստինֆո