Փաստ ինֆո

Բոլոր ավիատոմսերը չեն 30 եվրո։ Լոուքոսթեր չի նշանակում էժան գին։ Ինքը նշանակում է, որ ավիաընկերությունը խնայում է իր ծախսերը, որը հնարավորություն է տալիս նվազեցնել ավիատոմսերի գները։ Մամուլի ասուլիսի ժամանակ հայտարարեց Քաղաքացիական ավիացիայի կոմիտեի նախագահ Տաթևիկ Ռևազյանը։

Միաժամանակ 30 եվրոյով տոմս գնելու հնարավորության դեպքում էլ Տաթևիկ Ռևազյանը խորհուրդ է տալիս ուշադիր լինել. «Պետք է ուշադիր լինել, որովհետև Դուք վճարում եք բուն ավիատոմսի համար։ Այսինքն Ryanair-ի պարագայում դա նշանակում է, որ շատ փոքր բեռ է թույլատրվում վերցնել։ Բեռ, որը կարող է տեղավորվել աթոռի տակ։ Կոնկրետ չափսերը չեն գրել, բայց ասում են, որ դա պետք է կարողանա տեղավորվել աթոռի տակ։ Եթե ուզում եք՝ այլ չափսի ճամպրուկ, դրա համար արդեն մի փոքր ավել պետք է վճարել։

20 կգ կամ ավել ճամպրուկի ցանկության դեպքում խոսքը կրկին այլ գումարի մասին է։ Եթե ուզում եք իմանալ, որ հստակ տեղ է պահված, դա կրկին գումար է։ Բայց ընդհանրապես այն գինը, որը տեսնում եք կայքում բուն ավիատոմսի գինն է։ Պետք է հաշվի առնել, որ կարող է գումարն ավելանալ»,-նշեց Տաթևիկ Ռևազյանը։

Վերջինս նկատեց՝ լոուքոսթերների մուտքը Եվրոպայում փոփոխեց մարդկանց մտածելակերպը։ Եթե նախկինում նրանք մեծ ճամպրուկներով մեկնել հանգստի, ապա այժմ սովորել են ուսապարկերով ճամփորդել. «Անիմաստ բեռ չեն տանում իրենց հետ, երբ ճամփորդում են։ Հայաստանում դեռ ժամանակ է պետք, որ փոխվի այդ մտածելակերպը»,-հավելեց Տաթևիկ Ռևազյանը՝ հորդորելով ուշադիր լինել, թե առաջարկվող գինն ինչ է ներառում իր մեջ։

Հեղինակ՝ Հասմիկ Կոշկարյան

Աղբյուր` Փաստինֆո