Փաստ ինֆո

Վարչապետ Փաշինյանին պատկանող կայքում հրապարակվեց ԱԱԾ նախկին տնօրեն Արթուր Վանեցյանին վատաբանող նյութ, որի տարածման գործում ակտիվ մասնակցություն էր ունենում նաեւ Փաշինյանի ավագ դուստրը՝ անմիջականորեն զբաղվելով ԱԱԾ նախկին տնօրենի հակաքարոզչությամբ ու փորձելով նրա հետ մտնել հեռակա բանավեճի մեջ։

«Մարիամ ջան, աղջիկս, մի մտիր խնդրում եմ մեծերի անհասկանալի խաղերի մեջ», –ինստագրամում գրեց Ա.Վանեցյանը, ինչին կրկին արձագանքել էր Մարիամ Փաշինյանը՝ նրան դիմելով անունով։ Վարչապետի դստեր կողմից դրսեւորվող քաղաքական ակտիվության շուրջ «Փաստինֆո»-ի հարցերին է պատասխանում քաղտեխնոլոգ Արմեն Բադալյանը։

-Պարոն Բադալյան, ինչպես բացատրել Փաշինյանների ընտանիքից ավագ դստեր ակտիվ մասնակցությունը Վանեցյանի հետ հեռակա բանավեճին։

-Բացատրությունը մի քանի պատասխաններ ունի, բայց հիմնական պատճառն, ըստ իս, այն է, որ վերջերս՝ երբ իրանցի հայտնի գեներալը սպանվեց, ԱԱԾ նախկին տնօրեն Վանեցյանը գնաց Հայաստանում Իրանի իսլամական հանրապետության դեսպանատուն և իր ցավակցությունը հայտնեց։ Այդ փաստը՝ որպես PR պրոդուկտ, շատ ավելի ընկալելի էր, ընդունելի էր ու ավելի լավ էր պատրաստված, լավ ներկայացվեց, քան իշխանությունների կողմից ցավակցություն հայտնելու գործընթացը, որին չմասնակցեց ո՛չ Արտաքին գործերի նախարարը, ոչ պրոֆիլային նախարարը, այլ նախարար և պատգամավորներից մեկը, ինչը կարգավիճակով շատ ցածր էր։ Եվ այս տարբերությունները ցույց են տալիս, որ Արթուր Վանեցյանի վարկանիշի որոշակի բարձրացում կա, և պատահական չէ, որ դրանից հետո ինչ-որ սև PR տեխնոլոգիաներ սկսեցին կիրառել Վանեցյանի դեմ, հայտնի կայքում հոդվածներ գրվեցին, որ այսպես-այսպես, այսինքն սա սև տեխնոլոգիայի կիրառումն էր, հիմնական նպատակն այլ էր՝ չեզոքացնել այն դրական ընկալումը, որը տեղի է ունեցել այս հունվարի իրադարձություններից հետո։

Այս հոդվածով փորձ արվեց ԱԱԾ նախկին տնօրենին կապել նախկին իշխանությունների որոշ շրջանակների հետ՝ ցույց տալու, որ նա ինքնուրույն չէ։ Փորձեցին նրա կերպարը կոտրել, սակայն դա չհաջողվեց, որովհետև շատ վատ էր կազմակերպված և տվյալ դեպքում շատ սխալ էր նման գործողություն իրականացնելը։ Իսկ ինչի համար օգտագործվեց ընտանիքի անդամը, ինչպես օգտագործվեց, որովհետև տեսնում ենք, որ երբ մարդուն անունով դիմում ես, դա ցույց է տալիս՝ փորձում ես դիմացինի կերպարն իջեցնել քո մակարդակին։ Սա նույնպես հարց է, որը տեղավորվում է PR-ի տեխնոլոգիաների մեջ, այսինքն` այս ամենը նպատակ ուներ իջեցնել, զրկել, չեզոքացնել այդ դրական գնահատականը, որ կար ԱԱԾ տնօրենի վերաբերյալ և նրա մակարդակն ավելի ցածր իջեցնել, ինչին, ի դեպ, շատ գրագետ պատասխանեց ԱԱԾ տնօրենը, որը մերժեց ընտանիքի անդամին օգտագործելը քաղաքականության մեջ։ Այսինքն` հարվածեց հենց այն կետին, որը տվյալ դեպքում իրեն բարձրացրեց, դիմացինին ցածրացրեց միաժամանակ խորհուրդ տալով չխառնվել մեծերի խաղերի մեջ։

-Բայց աղջիկը պատասխանեց, ավելին՝ ասաց, եթե ասելիք ունենայիք՝ կխոսեիք։

-Խնդիրը դա է, որ այդ աղջիկն անընդհատ ուզում է քաշի, որպեսզի բանավեճը լինի իր և ԱԱԾ նախկին տնօրենի մեջ։ Փորձում է բանավեճի մակարդակն իջեցնել։

Լիդերը չի կարող 20 տարեկան աղջկա հետ այդպես խոսել։ Նպատակը դա էր՝ ներքաշել, որպեսզի ցույց տալ, որ իր բանավեճի մակարդակը աղջկա մակարդակին է։

-Աշխատու՞մ են նման տեխնոլոգիաները հասարակության տրամադրության վրա։

-Եթե տեխնոլոգիան սխալ ես կիրառում, դա քո դեմ է աշխատում, որովհետև թեկուզ անգամ սև PR-ը կիրառելուց պետք է իմանաս՝ ինչու ես կիրառում, ինչ նպատակով ես կիրառում ու մասնագիտական, գրագետ ձևով դա օգտագործես։ Եթե պարամետրերը չես պահպանում, ապա դա կամ առնվազն արդյունք չի տալիս, կամ քո դեմ է աշխատում։ Արթուր Վանեցյանի դեմ այդ տեխնոլոգիան՝ ինչ նպատակ որ ուներ, այդ արդյունքը չեղավ։

Աղբյուր` Փաստինֆո