Փաստ ինֆո

Այնպես չէ, որ մենք քնում-արթնանում ենք հենց միայն Սահմանադրական դատարանի խնդրի մասին մտածելով, և մեր գերնպատակն է Հրայր Թովմասյանին հեռացնել իր պաշտոնից։ Այս մասին այսօր լրագրողների հետ ճեպազրույցում ասաց ԱԺ նախագահ Արարատ Միրզոյանը։

Հարցին, եթե Հրայր Թովմասյանը հրաժարական տար, իր հետ կապված քրեական գործը լինելու՞ էր, Միրզոյանը պատասխանեց. «Լինելու էր, եթե իրավապահներն այս նույն ճանապարհով գնային ՝բացահայտումներ անելու էին, քրեական գործը պայմանավորված չէ իր պաշտոնավարմամբ»։

Միրզոյանն ընդգծեց՝ Հրայր Թովմասյանի կամ որեւէ այլ անձի երբեւէ կատարած առերեւույթ կամ մեղսագրվող հանցագործությունը, օրենքի խախտումը կապ չունի այս պահին կամ երբեւէ նախկինում ունեցած պաշտոնի հետ:

«Որեւէ զբաղեցրած պաշտոն չի ենթադրում, որ հիմա մենք ինչ-որ գործողություններ ենք անում, այսինքն` քաղաքական հետապնդումների մասին խոսք լինել չի կարող»,-ասաց ԱԺ նախագահը։

Անդրադառնալով մամուլի տեղեկություններին, որ իշխանությունները ՍԴ անդամների անձնական կյանքի, արտամուսնական կապերի վերաբերյալ տեղեկություններ են հավաքում, որպեսզի նրանց ստիպեն վաղաժամ թոշակի գնալ, Արարատ Միրզոյանն արձագանքեց. «Եկել անհեթեթությունների մասին ինձ հարցեր եք տալիս: Ես այդքան ժամանակ չունեմ, որ որեւէ մտացածին վարկածներ մեկնաբանեմ»:

Լրագրողները հետաքրքրվեցին նաև՝ արդյոք Սուրբ ծննդյան պատարագի ժամանակ, որին մասնակցում էր նաեւ Հրայր Թովմասյանը, նա որեւէ ձեւով բարձրաձայնե՞լ է իր մտահոգությունները: Արարատ Միրզոյանն ասաց. «Չէ, մենք մեկ-երկու կատակ արեցինք, այդքան բան»:

Աղբյուր` Փաստինֆո