Փաստ ինֆո

Մի կողմից Նիկոլ Փաշինյանը դժգոհում է պետական կառավարման համակարգի աշխատանքի արդյունավետությունից, մյուս կողմից` այստեղ համատարած պարգևավճարներ են բաժանում։ Վարչապետը գիտի այդ մասին, բայց հանդուրժում է։ Եվ ոչ միայն հանդուրժում է, այլև ինքն էլ իր կողմից է խրախուսում բարձրաստիճան պաշտոնյաներին։ 

Մինչդեռ, թվում էր, թե հակառակը պիտի աներ։ Եթե համակարգը այդքան վատ է աշխատում, ինչպես ինքն է ասում, ավելին, դիմադրում է հեղափոխության արժեքներին ու առաջընթացին, ինչի՞ համար են այդ պարգևատրումները։ Մինչև այժմ ընդունված է եղել աշխատողին պարգևատրել կամ խրախուսել այն դեպքում, երբ նա պատշաճ կատարում է իր աշխատանքային պարտականությունները։ Բայց դատելով վարչապետի հայտարարություններից` պետական կառավարման համակարգում մարդիկ ուղղակի ժամանակ են սպանում։

-Կառավարությունն այս տարի ինչ արդյունքներ արձանագրել է, տնտեսական բոլոր ցուցանիշները, հաջողությունները՝ արվել են ի հեճուկս պետական կառավարման համակարգի և ի հեճուկս նախարարությունների։ Ունենք մեծ նախարարություններ՝ շատ պարապ մարդկանցով, որոնց միակ կարիքը հետևյալն է՝ ժամը երբ է լրանում, որ գնան տուն: Պետական համակարգին այսօր բրթում ենք, որ գնան խնդիրը լուծեն,-ոչ վաղ անցյալում հայտարարում էր վարչապետը։

Ու այդքան վատ աշխատող պետական համակարգում համատարած պարգևավճարներ են բաժանվում։ Եվ դա արվում է վարչապետի գիտությամբ, ով ևս չի վարանում պետական բյուջեի հաշվին նախարարներին ու մյուս բարձրաստիճան պաշտոնյաներին միլիոնավոր դրամների հասնող պարգևավճարներ տալ։ Այն էլ ամեն ամիս։

Հազիվ թե կարելի է կարծել, որ պարգևավճարներ ստացող պաշտոնյաները միշտ լավ են աշխատում, որ արժանանում են խրախուսանքի։
Պարզ է, որ այդպես չէ։ Բայց դա չի խանգարում, որպեսզի նրանք ամեն ամիս պարգևավճարներ ստանան։ Իրականում թեև դա ոչ այնքան պարգևավճար է, որքան քողարկված աշխատավարձ։

Բնավ զարմանալի չէ, որ պետական համակարգում միջին աշխատավարձի աճի տեմպը շատ ավելի բարձր է, քան մասնավորում։ Այն դեպքում, երբ հինգերորդ տարին անընդմեջ այստեղ աշխատավարձերի բարձրացում տեղի չի ունեցել։ Աշխատավարձի բազային չափը, որի նկատմամբ կիրառվում են համապատասխան գործակիցները` պաշտոնյաների աշխատավարձերը սահմանելու համար, ինչպես իշխանափոխությունից առաջ եղել, այնպես էլ հիմա 66,1 հազար դրամ է։
Ու այդ պայմաններում պետական համակարգում միջին աշխատավարձի աճը ավելի քան կրկնակի բարձր է մասնավորից։ Գաղտնիքը, եթե կարելի է այդպես ասել, թաքնված է պարգևավճարների տակ։

Անցած տարվա ընթացքում պետական համակարգում բաժանված պարգևավճարների ընդհանուր գումարը հասնում է տասնյակ միլիոնավոր դոլարների։ Կասկած չկա, որ նույնը լինելու է նաև այս տարի։

Պարզվում է, պաշտոնյաների պարգևավճարների համար բյուջեում փող միշտ էլ կա, իսկ երբ հարցը հասնում է ասենք` կենսաթոշակառուներին` փող չկա։ Այնինչ` այն գումարներով, որոնք հատկացվում են որպես պարգևավճար, կարելի էր ըստ էության կրկնապատկել թոշակների բարձրացումը։ Ու կստացվեր այնպես, որ մի կողմից վարչապետի ասած` վատ աշխատող պետական համակարգը անիմաստ կամ չպատճառաբանված միլիոնների պարգևատրումներ չէր ստան, մյուս կողմից` թոշակի բարձրացումը գոնե մի քիչ մարդավայել կլիներ։

Աղբյուր` Փաստինֆո