Փաստ ինֆո

Իշխանությունները հայտնվել են իրենց իսկ լարած թակարդը` ճիշտ ինչպես  Հովհաննես Թումանյանի «Սուտասանը» հեքիաթի թագավորը, որը հայտարարեց մի օր՝ «Ով էնպես սուտ ասի, որ ես ասեմ՝ սուտ է, իմ թագավորության կեսը կտամ նրան»:

Հիմա, օրերս բոլորն  իմացան չէ՞, որ ՀՀ վարչապետ Նիկոլ Փաշինյանը գաղտնի հանդիպում է ունեցել ուժային բոլոր կառույցների ղեկավարների հետ և մեկ շաբաթ ժամանակ է տվել ՍԴ դատավորներին իրենց պաշտոնավարման ժամկետից շուտ հեռացնելու հարցը լուծելու համար: Քանի որ ժամանակը սուղ է` մնացել է 19 օր` օրենքի գործողության ժամկետին, բայց ՍԴ ոչ մի դատավոր կամավոր չի ընդունել պետականորեն ներկայացված կոռուպցիոն առաջարկն ու վաղ կենսաթոշակի գնալու ցանկություն չի հայտնել: 

Վարչապետի այս հանձնարարականից հետո, փաստորեն, ուժայինները մտածե՜լ-մտածե՜լ են ու գտել՝ ՍԴ անցանկալի դատավորներից ազատվելու եղանակը: Ըստ այդմ, պարզվում է՝ հատկապես նրանցից երկուսի հանդեպ ճնշումն ավելի մեծ է լինելու, այնքան մեծ, որ վերջիններս ուղղակի իրենց կամքով անցնելու են կենսաթոշակի: Ինչու՞, ինչպե՞ս, կհարցնի ընթերցողը: Իշխանության սիրած եղանակով. Վերջինս նրանց դեմ կոմպրոմատների փաթեթ ունի և եթե կամավոր դուրս չգան, ուղղակի կհրապարակի դրանք:

Ոստիկանության 7-րդ վարչությունը, պարզվում է, նեղ անձնական բնույթի տեղեկություններ է հավաքագրել նշված երկու դատավորների վերաբերյալ. խոսքը վերաբերում է նախկինում այդ դատավորների ունեցած արտամուսնական կապերի մասին 7-րդ վարչության ձեռք բերած որոշակի տվյալներին, որոնցով այժմ ուժային կառույցները փորձելու են շանտաժի ենթարկել նրանց՝ սպառնալով, որ եթե առաջիկա շաբաթվա ընթացքում հրաժարական չներկայացնեն, ապա դոսյեներում եղած տվյալները կուղարկվեն նրանց ընտանիքներին և կհայտնվեն համացանցում:

Ի դեպ, այսօրինակ կոմպրոմատներով հայրենի իրավապահների աշխատանքը նորություն չէ` հիշենք ՕԵԿ նախկին ղեկավար Արթուր Բաղդասարյանի ինտիմ կյանքի մասին տեղեկատվությունը, որը հրապարակվեց այն ժամանակ ընդդիմադիր համարում ունեցող «Հայկական ժամանակ»-ում:

Նախկինի վատ ավանդույթները շարունակվում են` անկողնային կոմպրոմատների պայքարը` եւս: Տվյալ պարագայում անելանելի իրավիճակում են հայտնվել դատավորները` եթե հիշյալ երկու դատավորները սպառնալիքների ազդեցության տակ հրաժարական ներկայացնեն` պարզ կլինի, որ կոմպրոմատները հենց նրանց են վերաբերում:

Ասել է, թե՝  կունենանք այն նույն իրավիճակը, որի մեջ հայտնվեց «Սուտասանը» հեքիաթի թագավորը: Հիշու՞մ եք, չէ

… Ներս է մտնում մի աղքատ գյուղացի, կոտը կռնատակին։

— Դո՞ւ ինչ ես ուզում, ա՛յ մարդ,– հարցնում է թագավորը։

— Ինձ մի կոտ ոսկի ես պարտ, եկել եմ տանեմ։

— Մի կոտ ոսկի՞– զարմանում է թագավորը։ Սո՛ւտ ես ասում, ես քեզ ոսկի չեմ պարտ։

— Թե որ սուտ եմ ասում, թագավորությանդ կեսը տուր։

— Չէ՛, չէ՛, ճշմարիտ ես ասում,― խոսքը փոխում է թագավորը։

— Ճշմարիտ եմ ասում՝ մի կոտ ոսկին տուր։

Հիմա, չստացվե՞ց, որ թումանյանական հեքիաթի թագավորի պես իր իսկ լարած ծուղակն ընկավ ներկա իշխանությունը:  

Աղբյուր` Փաստինֆո