Փաստ ինֆո

Խմբակցությունը տեղյակ է իմ և պարոն Սարուխանյանի միջև տեղի ունեցած միջադեպից, և ես կարծում եմ այս թեման երեկ արդեն քննարկել են, պարզապես ես ներկա չեմ եղել։ Այս մասին այսօր «Փաստինֆո»-ի հետ զրույցում ասա ԱԺ «Իմ քայլը» խմբակցության պատգամավոր Սոֆիա Հովսեփյանը։

Հիշեցնենք, որ ԱԺ «Իմ քայլը» խմբակցության պատգամավոր Սոֆիա Հովսեփյանը ֆեյսբուքյան գրառում էր կատարել, թե Առողջապահության նախարարությունը որդեգրել է հիվանդանոցները փակելու վարքագիծ։ Այս գրառմանն արձագանքել էր Արսեն Թորոսյանի խորհրդական Աշոտ Սարգսյանն ու գրել. «Տիկին Սոֆյա Հովսեփյան, երբ դուք դեռ փոխմարզպետ էիք, կարող էիք զբաղվել բժիշկների կադրային քաղաքականությամբ, հագեցնեիք մասնագետներով Մարալիկի ծննդատունը, նրանց շնորհիվ ծնունդները կշատանային և բնականաբար աշխատավարձերն էլ կբարձրանար։ Շուտվանից գիտեիք նման խնդրի մասին, զբաղվեիք։ Ի վերջո` ծննդատունը մարզպետարանի ենթակայության տակ է գտնվում և մարզպետարանը ունի բուժվարչություն։ Կա պատճառ և կա հետևանք։ Այսօրվա առաջացած խնդիրը նաև ձեր չարածի հետևանք է»։

Գրառմանը արձագանքել է Սոֆյա Հովսեփյանը, մասնավորապես, նշելով․ «Այո, դուք ճիշտ եք՝ ես զբաղվել եմ, հիմա, քանի որ բաց, ապա բաց խոսեմ։ 18 աշխատակիցներին տրվեց ծանուցում, որ պետք է ազատվեն, որպեսզի գումար տնսեսվեր, քանի որ ուռճացած հաստիքներ էին։ Երկու ամիս անց, երբ պետք է հրամանը լիներ ազատման, գործող մարզպետը կանխեց, քանի որ ըստ տնօրենի հավաստման՝ մի կրճատվողի որդի, որի մայրը ամենատարեցն էր, զանգել էր մարզպետին և գործը կանխվեց, մարզպետն առաջարկել էր գոնե այդ մեկին թողնեն, մնացածին կրճատեն, սակայն տնօրենը չէր արել, բոլորին պահել էր, թեև ես հորդորեցի, որ դա արատավոր երևույթի շարունակություն է, պահանջեցի կրճատել բոլորին ու առաջացավ բախում։ Խնդիրը ներկայացրել եմ թե՛ նախարարին, թե՛ մի շարք այլ անձանց։ Հաստատությունը դրա պատճառով ամսական շուրջ 1 մլն մինուս գնաց, սակայն տնօրենը վախեցած մարզպետի հրահանգից չկրճատեց։ Արդյունքում իմ և մարզպետի հարաբերությունները սրվեց։ Դրանից հետո ընտրվել եմ և եկել ԱԺ։ Այդ նույն հարցով մի քանի անգամ դիմել եմ նախարարի խորհրդականներին, փոխնախարարի, բայց զինվորական տղայի զանգը զորեղ էր։ Արդյունքը սա։ Վերջին հորդորս եղել է տնօրենին մեկ ամիս առաջ, ասեց՝ քննարկում կանեմ, քննարկման արդյունքը ծննդատան փակումն էր, և սա կփաստեն բոլոր աշխատակիցները, քանի որ այն ժամանակ նույնպես իմ ջանքերով պահվեց»։

Նույն գրառման տակ Սոֆյա Հովսեփյանին արձագանքել էր այն ժամանակ Շիրակի մարզպետ, այժմ «Իմ քայլը» խմբակցության պատգամավոր Կարեն Սարուխանյանը։ Նա մանրամասնել էր մարզպետարանի հետ կապված միջադեպը ապա գրել. «Իսկ Սոֆիային երկու խորհուրդ կտամ.

1. Հարգիր քո կարգավիճակը և այսուհետ խոսիր ոչ թե բամբասանքների լեզվով՝ այլ փաստերով և ապացույցներով։

2. Ամուսնացիր՝ կանցնի)))»։

Հովսեփյանը մեզ հետ զրուցում նշեց, որ երեկ իրեն զանգահարել է խմբակցության ղեկավար Լիլիթ Մակունցը և հրավիրել քննարկմանը, պարզապես նա չի կարողացել գնալ. «Ֆորմատը չգիտեմ, խմբակցության քննարկում պետք է լիներ, ես ուղղակի զբաղվածության պատճառով չհասցրի պարզել։ Այս թեմայով ոչ մի քննարկում չեմ նախաձեռնելու, եթե քննարկում նախաձեռնեն, ապա բնականաբար պարզ է, որ պետք է քննարկենք»։
Հովսեփյանը շեշտեց, որ Սարուխանյանի վարքագիծը նորություն չէ և իրեն անհայտ չէ. «Այս վարքագիծը միայն իմ հանդեպ չէ, այն հաճախ է դրսևորվում։ Եթե ուշադիր լինեն տվյալ պատգամավորի վարքագծին, նոր բան չէ, զարմացնող չէ, պարզապես պետք է հաշվի առնել, թե ով կա մեր կողքին և որքանով է մեր արժեհամակարգը կրող ու տարածող անձ»։

«Իմ քայլը» պատգամավորը հայտնեց, որ գրառումից հետո պատգամավորի հետ չի զրուցել և չի էլ պատրաստվում։
«Այնպես չէ որ երբևէ ջերմ հարաբերություններ եմ ունեցել, զուտ գործընկերային հարաբերություններ են եղել. «Բարև Ձեզ, ինչպես եք» այդքանից ավել չի եղել։

Ես ոչինչ չունեմ կիսելու իր հետ, բացի այն, որ այսօր երկուսիս է տրված է որոշողի կարգավիճակ, որն ամբողջ ազգի համար է։ Ես մնում եմ իմ սկզբունքայնության մեջ, իսկ ինքը թող մտածի ինչպես է հետագայում նայելու իր ընտրողների աչքերին»,-ասաց «Իմ քայլը» պատգամավորը։

Հեղինակ՝ Սոնա Գեւորգյան

Աղբյուր` Փաստինֆո