Փաստ ինֆո

Ինչ են մտածում Աժ «Իմ քայլը» խմբակցության պատգամավորները՝ նույն խմբակցության պատգամավորների միջեւ սոցցանցում դրսեւորված «հակամարտության», կին պատգամավորին՝ ամուսնանալու խորհուրդ տված նույն խմբակցության պատգամավորի վարքագծի մասին։ «Փաստինֆո»-ի հարցերին է պատասխանում «Իմ քայլը» խմբակցության պատգամավոր Հովիկ Աղազարյանը։

-Պարոն Աղազարյան, Ձեր խմբակցության 2 պատգամավորների միջև կոնֆլիկտ էր տեղի ունեցել, Կարեն Սարուխանյանը Սոֆիա Հովսեփյանին ասել էր՝ «Ամուսնացիր, կանցնի» և, ըստ էության, վիրավորել նրան։ Մտահոգիչ չէ՞, որ խմբակցությունում նման տրամադրություններ կան։

-Բայց ինչու՞ եք կարծում, որ այդպիսի տրամադրություններ կան։

-Երբ մի պատգամավորը մյուսին ասել է «Ամուսնացիր, կանցնի», այս կերպ չի՞ վիրավորել։

-Ես անձամբ չեմ կարդացել, թե Կարեն Սարուխանյանն ինչ է ասել։ Ընդհանուր առմամբ տեղյակ եմ, բայց մանրամասները չգիտեմ և հետևաբար ասենք նպատակահարմար չեմ գտնում երկու գործընկերների միջև ծագած այսպես փոքրիկ վիճաբանությունը գնահատել։

-Խմբակցությունում այս հարցը քննարկե՞լ եք, պարոն Աղազարյան։

-Չէ, չենք քննարկել, որովհետև դա երեկ էր եղել, և մենք այդ հարցը դեռ չենք քննարկել, որովհետև խմբակցության նիստ չենք ունեցել։ Ինքս էլ նպատակահարմար չեմ գտնում մեկնաբանել, որովհետև իմ գործընկերներն են, կարող է մի փոքր իրավիճակ է ստեղծվել, որը կպարզաբանվի հետագայում։

-Տիկին Հովսեփյանն ասաց, որ երեկ խմբակցությունում քննարկում եղել է, Լիլիթ Մակունցն էլ իրեն զանգահարել, հրավիրել է այդ քննարկմանը։

-Չէ, չէ, չէ։ Երևի Մակունցը հրավիրել է Սոֆիա Հովսեփյանին, որպեսզի որոշակի ճշգրտումներ մտցնի։ Խմբակցության նիստ չի եղել։

-Պարոն Աղազարյան, տղամարդ պատգամավորը վիրավորում է նույն խմբակցության կին պատգամավորին, որքանո՞վ է սա ճիշտ։

-Ես չեմ տարանջատում տղամարդ կամ կին պատգամավոր արտահայտություններ, բայց յուրաքանչյուրս պետք է պատասխան տանք մեր վարքագծի, արարքի համար, և չի բացառվում, որ երբեմն-երբեմն թույլ տանք որոշակի վրիպումներ, որոնց համար նաև պետք է պատասխան տանք։ Մարդկային է ամեն ինչը։ Հիմա տվյալ դեպքում հարմար չէ գնահատական տամ գործընկերներիս միջև ծագած փոքրիկ միջադեպին։ Ես կարծում եմ իրենք իրենց կհարթեն այդ հանգամանքը, երբ պարզեն ինչ է նկատի ունեցել պարոն Սարուխանյանը և ինչպիսի ռեակցիա է եղել Սոֆիա Հովսեփյանի կողմից։ Բոլոր դեպքերում, ես չեմ կարծում, որ տեղի է ունեցել շատ սարսափելի բան, որ դառնա խմբակցության քննարկման առարկա։

Հիշեցնենք, որ ԱԺ «Իմ քայլը» խմբակցության պատգամավոր Սոֆիա Հովսեփյանը ֆեյսբուքյան գրառում էր կատարել, թե Առողջապահության նախարարությունը որդեգրել է հիվանդանոցները փակելու վարքագիծ։ Այս գրառմանն արձագանքել էր Արսեն Թորոսյանի խորհրդական Աշոտ Սարգսյանն ու գրել. «Տիկին Սոֆյա Հովսեփյան, երբ դուք դեռ փոխմարզպետ էիք, կարող էիք զբաղվել բժիշկների կադրային քաղաքականությամբ, հագեցնեիք մասնագետներով Մարալիկի ծննդատունը, նրանց շնորհիվ ծնունդները կշատանային և բնականաբար աշխատավարձերն էլ կբարձրանար։ Շուտվանից գիտեիք նման խնդրի մասին, զբաղվեիք։ Ի վերջո` ծննդատունը մարզպետարանի ենթակայության տակ է գտնվում և մարզպետարանը ունի բուժվարչություն։ Կա պատճառ և կա հետևանք։ Այսօրվա առաջացած խնդիրը նաև ձեր չարածի հետևանք է»։

Գրառմանն այնուհետեւ արձագանքել է Սոֆյա Հովսեփյանը, մասնավորապես, նշելով․ «Այո, դուք ճիշտ եք՝ ես զբաղվել եմ, հիմա, քանի որ բաց, ապա բաց խոսեմ։ 18 աշխատակիցներին տրվեց ծանուցում, որ պետք է ազատվեն, որպեսզի գումար տնտեսեր, քանի որ ուռճացած հաստիքներ էին։ Երկու ամիս անց, երբ պետք է հրամանը լիներ ազատման, գործող մարզպետը կանխեց, քանի որ ըստ տնօրենի հավաստման՝ մի կրճատվողի որդի, որի մայրը ամենատարեցն էր, զանգել էր մարզպետին և գործը կանխվեց, մարզպետն առաջարկել էր գոնե այդ մեկին թողնեն, մնացածին կրճատեն, սակայն տնօրենը չէր արել, բոլորին պահել էր, թեև ես հորդորեցի, որ դա արատավոր երևույթի շարունակություն է, պահանջեցի կրճատել բոլորին ու առաջացավ բախում։ Խնդիրը ներկայացրել եմ թե՛ նախարարին, թե՛ մի շարք այլ անձանց։ Հաստատությունը դրա պատճառով ամսական շուրջ 1 մլն մինուս գնաց, սակայն տնօրենը վախեցած մարզպետի հրահանգից չկրճատեց։ Արդյունքում իմ և մարզպետի հարաբերությունները սրվեց։ Դրանից հետո ընտրվել եմ և եկել ԱԺ։ Այդ նույն հարցով մի քանի անգամ դիմել եմ նախարարի խորհրդականներին, փոխնախարարի, բայց զինվորական տղայի զանգը զորեղ էր։ Արդյունքը սա։ Վերջին հորդորս եղել է տնօրենին մեկ ամիս առաջ, ասեց՝ քննարկում կանեմ, քննարկման արդյունքը ծննդատան փակումն էր, և սա կփաստեն բոլոր աշխատակիցները, քանի որ այն ժամանակ նույնպես իմ ջանքերով պահվեց»։

Նույն գրառման տակ Սոֆյա Հովսեփյանին արձագանքել էր այն ժամանակ Շիրակի մարզպետ, այժմ «Իմ քայլը» խմբակցության պատգամավոր Կարեն Սարուխանյանը։ Նա մանրամասնել էր մարզպետարանի հետ կապված միջադեպը ապա գրել. «Իսկ Սոֆիային երկու խորհուրդ կտամ.

1. Հարգիր քո կարգավիճակը և այսուհետ խոսիր ոչ թե բամբասանքների լեզվով՝ այլ փաստերով և ապացույցներով։

2. Ամուսնացիր՝ կանցնի)))»։

Հեղինակ՝ Սոնա Գեւորգյան

Աղբյուր` Փաստինֆո