Փաստ ինֆո

«Ես չեմ բացառում իշխանությունների կողմից ցանկացած գործողություն՝ հաշվի առնելով այն քաղաքական կարեւորությունը, որ ունի խնդիրը իշխող քաղաքական ուժի համար»,-«Փաստինֆո»-ի հետ զրույցում անդրադառնալով ՍԴ-ի շուրջ ստեղծված իրավիճակին ասաց «Իրավական ուղի» ՀԿ համահիմնադիր Ռուբեն Մելիքյանը։

Նշենք, որ մինչեւ այս պահը ՍԴ դատավորներից եւ ոչ մեկը դրական չի արձագանքել ՍԴ դատավորներին վաղ կենսաթոշակի ուղարկելու օրենքին, որով նախատեսվում է մինչև 2020 թվականի հունվարի 31-ը ՍԴ դատավորի հրաժարական ներկայացնելու դեպքում լիազորությունները դադարելուց մինչև սահմանադրությամբ սահմանված պաշտոնավարման տարիքը լրանալը, ստանալ կենսաթոշակ՝ հրաժարականի պահին ստացած պաշտոնային դրույքաչափի և հավելաչափի չափով։ Փորձագիտական ու մասնագիտական շրջանակներն այս նախաձեռնությանը դիտարկում են որպես պետական մակարդակով կաշառքի առաջարկ։

«Սրա հետ կապված իմ դիրքորոշումը արտահայտել եմ, այն չի փոխվել, դա ուղղակի վիրավորական առաջարկ է եւ զարմանալ. որ ՍԴ դատավորները չեն համաձայնում վիրավորական առաջարկին, պետք չէ»,-ասաց իրավապաշտպանը։

Իրավապաշտպանը կիսում է արդարադատության նախկին Նախարար Դավիթ Հարությունյանի տեսակետն այն մասին, որ «պաշտոնավարության ժամանակավոր դադարեցում» խափանման միջոցը որևէ պարագայում չի կարող կիրառելի լինել Սահմանադրական դատարանի դատավորի նկատմամբ։

«Ես լիովին կիսում եմ այն մոտեցումը, որ այս պարագայում պաշտոնավարման ժամանակավոր դադարեցում հարկադրանքի միջոցը չի կարող կիրառելի լինել սկզբունքորեն։ Չեմ ուզում կրկնել փաստարկները, առավել քան ակնհայտ է, որ այս միջոցի կիրառումը չի կարող վերաբերել օրինակ, ՍԴ նախագահին, ասենք՝ ՀՀ վարչապետին, ԱԺ նախագահին։ Այս միջոցը առանձին դեպքերում պարզապես ֆունկցիոնալ չէ եւ սա այդ առանձին դեպքերից առավել ցայտուն է»,-«Փաստինֆո»-ի հետ զրույցում նշեց Ռուբեն Մելիքյանը։

Նշենք, որ ՍԴ նախագահ Հրայր Թովմասյանը մեղադրյալի կարգավիճակում է։ Նրան մեղադրանք է առաջադրվել 2019 թվականի դեկտեմբերի 27-ին՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնեական լիազորությունները չարաշահելու համար։ Նրան որպես մեղադրյալ ներգրավելու որոշումը կայացվել էր ՀՀ գլխավոր դատախազը՝ դեկտեմբերի 26-ին, ճիշտ այն նույն օրը, երբ ՀՀ նախագահ Արմեն Սարգսյանը ստորագրեց Սահմանադրական դատարանի դատավորներին վաղաժամ թոշակի ուղարկելու մասին օրենքը։

Իսկ Հրայր Թովմասյանը հայտարարել էր, որ մեղադրանքի առաջադրումն իր համար անսպասելի չէր եւ իրեն նախազգուշացրել էին 6 ամիս առաջ։

Աղբյուր` Փաստինֆո