Փաստ ինֆո

Զույգ տղա երեխաները ծնվել են 7 ամսականում, հինգ օր շարունակ մայրը նրանց կերակրել է, բժիշկները ոչ մի դժգոհություն չեն հայտնել, նույնիսկ ասել են՝ քաշը մի փոքր ավելացել է, բայց 6-րդ օրը հայտնել են երեխաների մահվան մասին։ Անգամ նրանց դիակները ցույց չեն տվել։ Լրագրողների հետ զրույցում պատմեց երեխաների տատիկը։

Հիշեցնենք, որ այս պահին երեխաների ապօրինի որդեգրման գործով տուժող մայրերը դատախազության առջև բողոքի ակցիա են իրականացնում։ Նրանք պահանջում են՝ Հանրապետական հիվանդանոցի տնօրեն Ռազմիկ Աբրահամյանի կալանավորումը։ Մայրերից մի քանիսն այժմ հանդիպում են ՀՀ գլխավոր դատախազ Արթուր Դավթյանի հետ։

Զույգ տղա երեխաների տատիկը պատմեց, որ դեպքը տեղի է ունեցել 1999 թվականի փետրվարին, սակայն ոչ մի հիվանդանոցում նրանց այդպես էլ չի հաջողվել գտնել երեխաների դիակները։ Մինչև անգամ մահվան վկայականը ծնողներին տվել են երեխաների մահից 9 ամիս անց՝ նոյեմբերի 11-ին. «Երեխաների մարմինները ցույց չեն տվել, հետո էլ ասացին՝ դա էլ մեր լավությունը, որ կապտած երեխաներին ցույց չենք տվել։ Ըստ մահվան վկայականի երեխաներից մեկը մահացել է փետրվարի 16-ին, մյուսը՝ փետրվարի 17-ին։ Բայց ինչու՞ պետք է 9 ամիս հետո մահվան թուղթ տային, չէ՞ին կարողանում գրել»,-նշեց երեխաների տատիկը։

Վերջինս հավելեց՝ դեպքից հետո դիմել են Արդարադատության նախարարություն, սակայն նրանցից 15 հազ դոլար գումար են ուզել՝ գործը բացահայտելու համար. «Այդ տարիներին այդքան գումար ոչ մեկ չէր կարողանա տալ։ Ասացին՝ այսքան գումար է պետք, որ գործը բացահայտեն։ Այսինքն՝ ձեններդ կտրեք, սուս մնացեք, եթե փող չունեք։ Արդարադատությունից վերև էլ ի՞նչ ատյան պետք է դիմեինք»,-հավելեց տատիկը։

Աղբյուր` Փաստինֆո