Փաստ ինֆո

Սեւ- սպիտակի, յուրայինի եւ ընդդիմադիր հեղափոխականի եւ «սաբոտաժնիկի» բաժանումը շարունակվեց նաեւ 2019 թվականին։
Լրագրողների հետ հանդիպմանը ամփոփելով անցած տարին, հայտարարեց քաղտեխնոլոգ Վիգեն Հակոբյանը։ Ըստ նրա, իշխանության այս մարտավարությունը կառուցողական աշխատանքով զբաղվել ցանկացողների համար արդյունավետ չէ։

Քաղտեխնոլոգը սրանով է պայմանավորում, որ տնտեսության արդյունքները տպավորիչ չէին, որքան էլ վարչապետը վիճակագրական տվյալներ հրապարակի։ Ըստ քաղտեխնոլոգի սեւ-սպիտակի բաժանման մթնոլորտը վանում է ներդրողներին։

«2020 թվականի սկիզբը ցույց տվեց, որ ներքաղաքական իշխանական մարտավարությունը նույնն է, փորձ է արվում նույնիսկ արտաքին քաղաքական համաշխարհային մասշտաբի պրոբլեմը պրոյեկտել ներքաղաքական կյանքի վրա»,-կարծիք հայտնեց Վիգեն Հակոբյանը։

Քաղտեխնոլոգը հիշեցրեց «տնայնագործ գեոպոլիտիկների», «Դիանա Հարությունյան» ֆեյքի մասին հայտարարությունները։

Վիգեն Հակոբյանը շեշտեց՝ 2020 թվականին կիսվում է իշխանությանը Սահմանադրությամբ տված ժամկետը, ինչը նշանակում է, որ 2023 թվականը, որպես ընտրական տարի, սարերի հետեւում չէ եւ քաղաքական դաշտում ու, մասնավորապես ընդդիմադիր դաշտում վերաֆորմատավորման պրոցես է սկսվում։
Վիգեն Հակոբյանի խոսքով, ընդդիմադիր դաշտի մի սեգմենտը նախկին իշխանությունն է լինելու, երկրորդ սեգմենտը կլինեն նոր ձեւավորվող քաղաքական ուժերը։ Մյուսը այն քաղաքական ուժերն են, որոնց նկատմամբ 2019 թվականից սկսած սպասումներ են առաջացել, օրինակ` Արթուր Վանեցյանը, որը ըստ քաղտեխնոլոգի, բավականին հստակ ու էտապային է փորձում մտնել քաղաքական դաշտ։

Մյուս սեգմենտը, ըստ քաղտեխնոլոգի ՀԿ սեկտորից ձեւավորված ուժերն են, որոնք ի սկզբանե հեղափոխության կողքին էին, բայց հիմա իրենց օրթոդոքս հեղափոխական են համարում եւ ուզում են հեղափոխությունը պաշտպանվել ոչ միայն «հակահեղափոխականներից», այլեւ Փաշինյանի թիմից։

Անդրադառնալով պետական համակարգի դիմադրության մասին Փաշինյանի հայտնի հայտարարությանը, քատեխնոլոգն ասաց. «Արդյո՞ք պետք է պետական համակարգ մի կառավարման համակարգի, որտեղ որոշումը ընդունում է մի մարդ։ Էֆեկտիվ պետական համակարգի կարիք չկա, բոլորը գիտեն, որ դա չի խրախուսվում , հակառակը՝ գուցե նախաձեռնողականությունը պատժելի դառնա»։

Ըստ Վիգեն Հակոբյանի, եթե ամբողջ պետական համակարգը դիմադրում է, այդ դեպքում ո՞վ է ապահովում այն արդյունքները, որոնց մասին անընդհատ թմբկահարվում է.«Վարչապետը միշտ ներկայացնում է այնպիսի թվեր, որոնց դիմացը գրված է՝ աննախադեպ, աշխարհում չտեսնված...եւ, կարծես թե, դժգոհություններ չկան»,-նկատեց քաղտեխնոլոգը։

Վիգեն Հակոբյանը նաեւ ասաց, որ հարավամերիկյան սրացումների ընթացքում քարոզչական տեսանկյունից Հայաստանը պարտվեց։

Աղբյուր` Փաստինֆո