Փաստ ինֆո

Նորայր Փանոսյանին կալանավորելու մասին դատարանի որոշումը իրավական առումով փաստարկված չէ։ Այս մասին «Փաստինֆո»-ի հետ զրույցում ասաց ՍԴ նախագահ Հրայր Թովմասյանի սանիկ Նորայր Փանոսյանի պաշտպանական թիմի անդամ Հովսեփ Սարգսյանը։ Նրա խոսքով՝ Փանոսյանին առաջադրված մեղադրանքի լրացման հանգամանքը բավարար հիմք չի կարող հանդիսանալ կալանավորման համար։

«Այս պարագայում դատավորը պետք է քններ հիմքերն ու պայմանները։ Մեր կարծիքով հիմքերը և պայմանները, որպես այդպիսին, չկային։ Փոփոխված մեղադրանքը ևս բավարար չէր, որովհետև այն ոչինչ չէր տալիս »,- նշեց փաստաբանը՝ հավելելով, որ Փանոսյանին ազատ արձակելու պահից առ այսօր որևէ քրեադատավարական հիմք չկար նրան կալանավորելու համար։ Փաստաբանն ընդգծեց, որ պատրաստվում են դիմել Վերաքննիչ քրեական դատարան։ Նշենք, որ Վերաքննիչ քրեական դատարանը նոյեմբերի 6-ին կայացրած որոշմամբ՝ ազատ էր արձակել Նորայր Փանոսյանին կալանքից։ Փաստաբան Հովսեփ Սարգսյանի խոսքով՝ մեղմ է ասված, որ դատարանը վերացրել էր Փանոսյանին կալանավորելու մասին որոշումը.

«Երբ առաջին կալանավորման ժամանակ առաջին ատյանի դատարանը խափանման միջոց կալանավորումը թույլատրելի համարեց, մենք բողոքարկեցինք վերաքննության կարգով և Վերաքննիչ քրեական դատարանը հիմնավոր կասկածի և հիմքերի բացակայության առումով բավարարեց բողոքը։ Բացի այդ՝ Նորայր Փանոսյանին ձերբակալելու մասին որոշումը ևս ոչ իրավաչափ ճանաչեց՝ նշելով, որ հիմնավոր կասկածի հիմքերը և ձերբակալման հիմքերը եղել են ոչ իրավաչափ և օրինաչափ»։

Պաշտպանը նշեց, որ փաստաբանները միշտ էլ դատարանից ակնկալում են թափանցիկ արդարադատություն, այսինքն՝ իրավական առումով իրավական ակտերի կայացում և այդ ակնկալիքով էլ պատրաստվում են այս անգամ ևս բողոքարկել Նորայր Փանոսյանին կալանավորելու մասին դատարանի որոշումը։ Դիտարկմանը, որ Նորայր Փանոսյանի փաստաբաններից Տիգրան Աթանեսյանը հայտարարել էր, որ Նորայր Փանոսյանին փորձում են դատել միայն այն պատճառով, որ նա Հրայր Թովմասյանի սանիկն է և արդյո՞ք դա չի կարող ազդեցություն ունենալ նաև հետագա գործընթացների և դատարանի որոշման վրա, փաստաբանն ասաց, որ քրեական գործով որպես մեղադրյալ է ներգրավված նաև Հրայր Թովմասյանը, իսկ Նորայր Փանոսյանը նրա սանիկն է. «Մեկնաբանությունները թողնում եմ ձեզ»։ Հարցին, թե արդյո՞ք պաշտպանական խումբը պատրաստվում է դատավոր Գագիկ Պողոսյանին կարգապահական պատասխանատվության ենթարկելու մասին միջնորդություն ներկայացնել, քանի որ դատավորը հանդիսանում է Հրայր Թովմասյանի սանիկ Նորայր Փանոսյանի դեմ սույն գործով ցուցմունք տալու դիմաց կալանքից ազատված Տարոն Թովմասյանի մտերիմ ընկերը, փաստաբանն ասաց, որ այդ հիմքով դատավորին ինքնաբացարկ հայտնելու միջնորդություն չեն ներկայացրել, քանի որ այս պահին այդ տեղեկատվությունը հաստատող փաստական տվյալներ չկան, սակայն ունենալու դեպքում կներկայացնեն, եթե դրա կարիքը լինի.«Պետք է փաստեր ունենալ ձեռքի տակ։ Նման լրատվություն տարածվել էր և մենք ծանոթ ենք այդ տեղեկատվությանը»։

Ավելի վաղ տեղեկացրել ենք, որ Երևանի ընդհանուր իրավասության դատարանը՝ դատավոր Գագիկ Պողոսյանի նախագահությամբ, բավարարեց ՍԴ նախագահ Հրայր Թովմասյանի սանիկ Նորայր Փանոսյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Հիշեցնենք, որ Նորայր Փանոսյանին առաջադրված մեղադրանքը լրացվել էր՝ նրան մեղադրանք է առաջադրվել ՀՀՔՕ-ի 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ եւ կրկին կալանավորելու միջնորդություն ներկայացվել։

Հեղինակ՝ Իզաբել Սահակյան

Աղբյուր` Փաստինֆո