Փաստ ինֆո

«Իրավական ուղի» իրավապաշտպան հասարակական կազմակերպությունը պետական մարմիններից արձագանք չի ակնկալում Արցախում 2019թ. սեպտեմբերին կայացած ՏԻՄ ընտրություններին դիտորդական առաքելություն իրականացնելու նպատակով «Իրազեկ քաղաքացիների միավորման Ստեփանակերտի գրասենյակ»-ին և «Թրանսփերենսի ինթերնեյշնլ» հակակոռուպցիոն կենտրոնին կառավարության կողմից համապատասխանաբար 16 միլիոն 200 հազար և 17 միլիոն 480 հազար ՀՀ դրամ տրամադրելու վերաբերյալ ՀԿ-ի տարածած հայտարարության առնչությամբ:

«Մենք այն կարծիքին ենք, որ առաջին հերթին կարեւոր է այս հարցերը բարձրացնելը եւ հանրայնացնելը։ Մենք չունենք մեծ լավատեսություն այն տեսանկյունից, որ իրավապահ մարմիններն այսօր ունակ են բազմակողմանի, լրիվ եւ ամենակարեւորը՝ օբյեկտիվ վերաբերվել նմանաբնույթ հարցին։ Այդ հարցերը պետք է ներկայացվեն ու հանրայնացվեն՝ գուցե ավելի հարմար ժամանակներում կարող ենք ավելի մեծ ակնկալիքներ ունենալ, որ իսկապես, այս հարցը քննարկման առարկա դառնա»,-«Փաստինֆո»-ի հետ զրույցում ասաց «Իրավական ուղի» ՀԿ համահիմնադիր Ռուբեն Մելիքյանը։

Նա շեշտեց՝ իրենք ոչ թե հայտարարել, այլ փորձել են փաստերով ցույց տալ, որ դրսեւորվել է ընտրողական վերաբերմունքը ։

Հիշեցնենք, «Իրավական ուղի» ՀԿ-ն պաշտոնապես ցանկություն էր հայտնել Արցախի Հանրապետությունում առաջիկայում կայանալիք նախագահական և խորհրդարանական ընտրություններին հանդես գալ դիտորդական առաքելությամբ՝ ակնկալելով բյուջետային աջակցություն նույն պայմաններում, ինչ վերը նշված երկու կազմակերպությունները, սակայն մերժվել էր՝ հիմնավորումով, թե ՀԿ-ն հիմնադրվել է 2019թ-ին եւ չի համապատասխանում որոշման ընդունման հիմք հանդիսացած վերոնշյալ կազմակերպությունների պարագայում չափորոշիչներից առնվազն հիմնականի, այն է՝ չունի դիտորդական առաքելության կազմակերպման փորձ կամ առնվազն չի ներկայացրել վերոնշյալ չափորոշիչներին համապատասխանության համար համապատասխան հիմնավորումներ։

ՄԻեւնույն ժամանակ «Իրավական ուղի» ՀԿ—ն ներկայացրել էր փաստեր , որ նշված երկու կազմակերպությունների «ընտրության համար մրցույթ չի անցկացվել», իսկ Կառավարության կողմից մեզ ներկայացված չափորոշիչները «որևէ իրավական ակտով սահմանված չեն», ուստի հանրության ու շահագրգիռ կազմակերպությունների համար հասանելի չեն եղել։ «Ծանրակշիռ հիմքեր կան ենթադրելու, որ այդ երկու կազմակերպություններն ընտրվել են՝ հաշվի առնելով դրանց նկատմամբ իշխող քաղաքական ուժի ունեցած ազդեցությունը եւ հատուկ վերաբերմունքը»,-հայտարարության մեջ նշել էր նշել էր «Իրավական ուղի» ՀԿ -ն։

« Դա թողել ենք հանրության դատին, քրեաիրավական գնահատական տալու հանգամանքը նույնպես։ Դա մեր մոտեցումն է, որ որպեսզի մեր հանրությունը կարողանա ներկայացված փաստերի հիման վրա անկախ դատողություններ անել »,-ընդգծեց Ռուբեն Մելիքյանը ՝ շեշտելով , որ «Իրավական ուղի» իրավապաշտպան հասարակական կազմակերպության համար առաջնային նշանակություն ունի բուն խնդիրը ՝ Արցախի Հանրապետությունում վստահելի դիտորդական առաքելության ապահովումը։

Ռուբեն Մելիքյանը շեշտեց իրենց հայտարարության վերջին հատվածի կարեւորությունը, որտեղ վերահաստատվում է վճռականությունը՝ այդ առաքելությունն իրականացնել. «Դա կարող է լինել առանձին, այլ կազմակերպությունների հետ համագործակցության ձեւով, բայց սա մեզ համար ունի առաջնային կարեւորություն»։

Աղբյուր` Փաստինֆո