Փաստ ինֆո

Նոր տարվա առաջին կառավարության նիստն, ըստ էության փաշինյանական իշխանության նախորդ տարվա վերջին կառավարության նիստի շարունակությունն էր: Եթե 2019 թվականը Փաշինյանն ավարտեց ամանորյա տոնի նշման և գաստրոնոմիական թեմաներով՝ ապա նոր տարին էլ նույն տրամաբանությամբ՝ տոնն ու տոնականությունը ամփոփելով ՝ զուգարանների թեմայով սկսեց, ինչն ընդհանրության մեջ բնավ տարօրինակ չպետք է թվար: 

Ի վերջո, հենց կենցաղապետության ղեկավարի կերպը նրան լավագույնս հնարավորություն է տալիս խուսանավել երկրի համար կարևորագույն արտաքին մարտահրավերների մասին անդրադարձներից, իսկ ներքին կյանքում ձնագնդի պես մեծացող ատելության դոզայի վերաբերյալ իրական և ճշգրիտ գնահատական տալուց: Ախտորոշմանը և գնահատական տալուն է /ինչը չի արվում/, որ պիտի հաջորդի խնդիրը պետական մակարդակով կարևորելու և լուծման մեխանիզմներ գտնելու ցանկությունն ու հանձնառությունը: Այլապես, սոցիալական հարթակներում մարդկային կյանքեր են կործանվում՝ մարդիկ զոհ են դառնում ուրիշ, օտար մարդկանց ատելության ու տգիտության մսաղացին:

Ասել, թե անկարևոր բաներից էր խոսք գնում, իհարկե ճիշտ չի լինի, բայց որքանով կառավարության նիստին քննարկվելիք են փողոցում թքելու, ծխուկը գետնին նետելու, ընդհանրապես, քաղաքակրթական և էթիկայի տարրական կանոններից հեռու հանրային դրսևորումները:

Այսօրվա կառավարության նիստը, թերևս, վարչապետի ամանորյա դիտարկումների արդյունք էր և ըստ էության, հասարակության ամենօրյա կենցաղին վերաբերող տգեղ ու մերժելի դրսևորումները նիստի մակարդակով կարևորելու պոպուլիստական քայլ, որին իրականում ոչինչ էլ չի հաջորդելու: Քանզի այն պարզապես հստակ օրակարգ չունենալու հետևանք էր:

ՀԴՄ-ների թեման վաղուց պիտի կառավարության նիստերի մակարդակից դուրս այլ մակարդակներում ընթացք ստացած և արդեն կյանք մտած լիներ, բայց եկեք տեսեք, այն Նոր տարվա նյութ է դառնում:

Ընդհանուր առմամբ, ուշագրավ էր, որ ԱԺ ամբիոնից տարիներ շարունակ անդրադառնալով մեկ աղբյուրից գնմամբ և առանց մրցույթի իրականացվող զանազան ծրագրերում առկա կոռուպցիոն ռիսկերին, այդ թվում նաև՝ տոնական միջոցառումների շրջանակում իրականացվող, Փաշինյանը մեկուկես տարի անց վերջապես կարևորեց, որ իր պաշտոնավարման ողջ ընթացքում մրցույթներ ուղղակի չեն եղել: Եվ չեն եղել առանց հիմնավոր պատճառի: Մեկուկես տարի օրենքը ոտնահարելուց հետո կառավարության նիստում վարչապետը հարց է բարձրացնում:

Տեսնենք՝ այն որքանով կառավարության տարբեր օղակներում հանձնարարականի և պարտադիր պահանջի կվերածվի:

Հեղինակ՝ Մարինե Մինասյան

Աղբյուր` Փաստինֆո