Փաստ ինֆո

Բյուրեղավանի քաղաքապետ Հակոբ Բալասյանի վերաբերյալ քրեական գործը կարճվել է։

«Փաստինֆո»-ին այս մասին տեղեկացրեց Բյուրեղավան համայնքի քաղաքային պոլիկլինիկայի նախկին տնօրեն Արմեն Մոսիկյանի փաստաբան Վահան Հովհաննիսյանը։ Փաստաբանը համոզված է, որ նախաքննական մարմինը երկակի ստանդարտներ է կիրառում։

«Այսօր այդ քաղաքապետը իշխանություններին ձեռնտու քաղաքապետ է, քանի որ շարունակում է պաշտոնավարել։ Այն , ինչ կատարվեց մյուս ՀՀԿ-ական քաղաքապետերի նկատմամբ, նրա նկատմամբ չի կատարվել, քանի որ նա այսօր իշխանություններին հաճո քաղաքապետ է»,-ասաց փաստաբան Վահան Հովհաննիսյանը։
Նրա խոսքով, իրավիճակը հետեւյալն է՝ առկա է 2 անձի կողմից տրված հաղորդում, որոնք նախազգուշացվել են ՀՀ քրեական օրենսգրքի 333-րդ հոդվածով նախատեսված պատասխանատվության մասին եւ տվել հաղորդում, առկա է 2 անձի ցուցմունք եւ 2 առերեսում, որոնք Բյուրեղավանի քաղաքապետի դեմ պնդել են իրենց կողմից տրված ցուցմունքները։ «Միաժամանկ ունենք այն փաստական հանգամանքները, որ իրենց գործունեությունը թիրախավորվել է քաղաքապետի եւ քաղաքապետարանի կողմից , կոնկրետ այդ անձանց կաբինետներում կատարվել են այնպիսի ստուգումներ, որոնք չեն կատարվել համանման այլ կաբինետներում կամ հիմնարկներում»,-ասաց փաստաբանը։
Ավելի վաղ «Փաստինֆո»-ն տեղեկացրել էր, որ Բյուրեղավանի քաղաքապետ Հակոբ Բալասյանը հարցաքննվել է ։

Հիշեցնենք, որ խոսքը պաշտոնատար անձի կողմից կաշառք ստանալու դեպքի առթիվ հարուցված քրեական գործի մասին է, որը հարուցվել էր մեկ այլ քրեական գործով մեղադրյալ, Բյուրեղավան համայնքի քաղաքային պոլիկլինիկայի նախկին տնօրեն Արմեն Մոսիկյանի հայտարարության հիման վրա, ըստ որի Բյուրեղավան համայնքի ղեկավարը իրենից որպես կաշառք ամսական 250.000 ՀՀ դրամ գումար է պահանջել։

Փաստաբան Վահան Հովհաննիսյանն ուշադրություն է հրավիրում այն հանգամանքի վրա, որ այսօր , մասնավորապես, քաղաքական հնչեղության գործերի պարագայում, մեկ անձի ցուցմունքով անձինք գտնվում են կալանքի տակ կամ նրանց նկատմամբ քրեական հետապնդում է իրականացվում, իսկ այս դեպքում, հաշվի առնելով գործում առկա հանգամանքները, ըստ փաստաբանի, ակնհայտ խտրական վերաբերմունք եւ ընտրողական մոտեցում է կիրառվում։

«Այլ գործերով անգամ մեկ ցուցմունքը բավարար է համարվում, որպեսզի անձին մեղադրանք ատռաջադրվի, գործը ուղարկվի դատարան, անձը գտնվի կալանքի տակ, այս դեպքում, մենք ունենք 2 ամրագրված ցուցմունք, որոնք պնդում են այդ հանգամանքը, ունենք այլ փաստական հանգամանքներ, որ այդ կաշառքը չտալու պարագայում իրենց նկատմամբ իրականացվել է քրեական հետապնդում եւ ունենք իրավիճակ, որ քննիչը գտնում է, որ այդ ապացույցները բավարար չեն , որպեսզի գործը ուղարկվի դատարան։ Այլ բան, քան ընտրողական վերաբերմունք, ես չեմ կարող գնահատել»,-ասաց փաստաբան Հովհաննիսյանը։

Վահան Հովհաննիսյանը նաեւ տեղեկացրեց, որ կարճման որոշումն ստանալուց հետո պատրաստվում է սահմանված ընթացակարգով բողոքարկել այն։

Աղբյուր` Փաստինֆո