Փաստ ինֆո

«Եթե համադրում ենք վարչապետի հայտարարությունն ու համատարած պարգեւատրումների փաստը, իհարկե, հարցեր են առաջանում»,-«Փաստինֆո»-ի հետ զրույցում ասել է Քաղծառայության խորհրդի նախկին նախագահ Մանվել Բադալյանը՝ անդրադառնալով Վարչապետ Նիկոլ Փաշինյանի այն հայտարարությանը, որ պետական համակարգը ընդդիմանում է հեղափոխությանը եւ այն փաստին, որ ի հեճուկս այս հայտարարության, պետական բյուջեից նույն այդ համակարգի աշխատողները շարունակում են պարգեւատրումներ ստանալ։

Հիշեցնենք, պետական համակարգում միլիոնների հասնող պարգեւատրումների առաջին տեղեկությունը վերաբերում է ՊԵԿ-ին, որին հաջորդեցին նաեւ Ֆինանսների նախարարության, Երեւանի քաղաքապետարանի վճարած պարգեւատրումների մասին ինֆորմացիաները։ Ապա` լրատվամիջոցներում տեղեկություն տարածվեց, որ ԱԺ պատգամավորները 10 ամսվա ընթացքում 14 անգամ պարգևատրվել են, իսկ «Փաստինֆո»-ն տեղեկացրել է մարզպետարաններում պարգեւատրումների եւ դրամական օգնության տրամադրման փաստերի մասին, յուրաքանչյուր մարզում տրվել է  միջինը 150 մլն դրամ խրախուսում։

« Նախ, չեմ հասկանում , թե ինչ է նշանակում դիմադրել , որտե՞ղ ու ո՞վ է դիմադրում եւ ինչպե՞ս։ Երկրորդ, եթե դիմադրում են, ապա դիմադրողները պետական միջոցներից չպետք է խրախուսվեին»,-մեզ հետ զրույցում տարակուսանք հայտնեց Մանվել Բադալյանը։

Քաղծառայության խորհրդի նախկին նախագահն ասում է՝, թե նախկինում, թե հիմա այն կարծիքին է, որ պարգեւատրման փոխարեն պետական ծառայողների աշխատավարձը համապատասխան օրենքով բարձրացվի եւ հստակ համակարգի աշխատողների վարձատրության չափը չթողնվի կամայական ու հայեցողական որոշումներին։

«Քաղաքական իշխանությունը՝ լինի նախկին, ներկա, թե ապագա, պետք է քաղաքական կամք դրսեւորի եւ հասարակությանը բացատրի ու հիմնավորի, որ պետական պաշտոնյաներին պետք է նորմալ աշխատավարձ վճարել։ Չի կարելի չլուծված հարցերը փորձել լուծել այսպես մանեւրելով »,-նշեց Բադալյանը։

Անդրադառնալով հետհեղափոխական Հայաստանում պետական համակարգի գործունեության արդյունավետության խնդրին, մասնագետն ասաց՝ այն գործում է իներցիայով։ Բադալյանը չի կիսում վարչապետ Նիկոլ Փաշինյանի այն կարծիքը, թե Հայաստանը գտնվում է ինստիտուցիոնալ կաթվածահար վիճակում, ինչի մասին 2019 թվականի օգոստոսի 5-ին հայտարարել էր Նիկոլ Փաշինյանը՝ հղում անելով իր ձեռքի տակ եղած գաղտնի փաստաթղթին։

«Ինստիտուցիոնալ ճգնաժամ չկա եւ պետական ինստիտուտների իներցիոն աշխատանքի շնորհիվ է, որ այսօր շատ , թե քիչ պետական կառավարման համակարգը դեռ գործուն վիճակում է։ Այդ ինստիտուտները կան եւ գործում են եւ դրանց իներցիայի հաշվին է, որ մեր երկրում տարբեր ոլորտներում կոլապսի առջեւ չենք կանգնել՝ թե անվտանգային, թե տնտեսական »։

Մանվել Բադալյանը շեշտում է՝ պետական կառավարման համակարգը նուրբ օրգանիզմ է, որի հետ պետք է զգույշ վարվել եւ առհասարակ, հասկանալ, թե ինչ է նշանակում պետական համակարգը։

Ըստ Բադալյանի, երկրի ղեկավարի մակարդակով հնչող վերոհիշյալ հայտարարությունները բացասաբար կարող են ազդել պետական համակարգի գործունեության արդյունավետության վրա։ «Եթե անընդհատ ասվի՝ մենք կփշրենք, կջախջախենք պետական կառավարման համակարգը, որը դիմադրում է, չեմ կարծում, թե այդ նույն համակարգում ընդգրկված մարդկանց մոտ՝ սկսած նախարարներից հարցեր չառաջանան։Ես մի առիթով արդեն ասել եմ, որ այդ հայտարարությունից հետո հարցեր պետք է առաջանային հենց կառավարության անդամների մոտ, որովհետեւ դա կնշանակի՝ բոլորը ձախողել են իրենց աշխատանքը»,-շեշտեց Բադալյանը։

Հիշեցնենք, որ 2019 թվականի դեկտեմբերի 12-ին վարչապետ Փաշինյանը կառավարության նիստին հայտարարել էր. «Ամբողջ պետական համակարգը դիմադրում է հեղափոխությանը, և այդ դիմադրությունը ջարդելու եմ»։

Իսկ ահա հունվարի 3-ին Նիկոլ Փաշինյանն Իրան–ԱՄՆ հարաբերությունների սրման ֆոնին փորձագիտական շրջանակների վերլուծություններին, Ֆեյսբուքում իր ձեւակերպմամբ «տնայնագործ գեոպոլիտիկներին» զգուշացրել էր, որ «Հայաստանի Հանրապետությունում կան ինստիտուտներ, ովքեր ի վիճակի են հետեւել իրավիճակին, վերլուծել զարգացումները, անհրաժեշտության դեպքում իրականացնել իրավիճակից բխող քայլեր եւ անհրաժեշտ բոլոր հանձնարարականները տրված են»։

Վերջին հայտարարության անդրադառնալով Մանվել Բադալյանն ասաց. «Ես ուրախ եմ, որ պետական ինստիտուտները գործում են, եթե կազմալուծված են ու ձախողված են եղել»։

 Շիրակի մարզպետարանի աշխատակիցներին տրվել է շուրջ 187 մլն դրամի խրախուսում

Գեղարքունիքի մարզպետարանի աշխատակիցներին տրվել է ավելի քան 113 մլն դրամի պարգեւավճար

Աղբյուր` Փաստինֆո