Փաստ ինֆո

Քրեական իրավունքը չի կարող մոտավոր կիրառվել. ի տարբերություն իրավունքի մյուս ճյուղերի այն մեկնաբանման շատ ավելի խիստ կանոններ է ենթադրում՝ հաշվի առնելով անձի համար դրա ծանր հետեւանքները։ «Փաստինֆո»-ի հետ զրույցում նման կարծիք հայտնեց «Իրավական ուղի» ՀԿ համահիմնադիր, իրավապաշտպան Ռուբեն Մելիքյանը ՝ անդրադառնալով «Դիանա Հարությունյան» ֆեյսբուքյան էջի կեղծ օգտատիրոջը առաջադրված մեղադրանքին։

Հիշեցնենք, «Փաստինֆո»-ն ԱԱԾ լրատվական ծառայությունից տեղեկացել էր «Դիանա Հարությունյան» ֆեյսբուքյան էջի կեղծ օգտատիրոջը մեղադրանք է առաջադրվել ՀՀ ՔՕ 226-րդ հոդվածի 2-րդ մասի 1-ին կետով, այն է՝ ազգային, ռասայական կամ կրոնական թշնամանք հարուցելը՝ հրապարակայնորեն կամ լրատվության միջոցներ օգտագործելով և 254-րդ հոդվածի 1-ին մասով՝ համակարգչային տեղեկատվությանն ապօրինի տիրանալը։

Քրեական օրենսգրքի 226-րդ հոդվածին անդրադառնալով, Ռուբեն Մելիքյանը շեշտեց՝ այստեղ շատ կարեւոր է դիտավորությունը. «Արդյո՞ք անձը ունեցել է դիտավորություն, որպեսզի հայերիս նկատմամբ ազգային թշնամանք հրահրվի, օրինակ Իրանի Իսլամական Հանրապետությունում։ Առաջադրված մեղադրանքը նշանակում է, որ մեր իրավապահ մարմինները գտնում են, որ այդ դիտավորությունը առկա է եղել»։

Ինչ վերաբերում է 254-րդ հոդվածին, այն, ըստ իրավապաշտպանի, որեւէ կապ չունի ԱԱԾ –ի հրապարակած տեսանյութում ներկայացված փաստերի հետ։ «Ամենայն հավանականությամբ դա նշանակում է, որ այստեղ այլ փաստերի մասին է խոսքը։ Չեմ կարծում, որ դրանք կապված են այն հանգամանքների հետ, որոնք տեսանյութում ներկայացված են։ Ես չեմ տեսնում անգամ տեսական հնարավորություն՝ ներկայացված հանգամանքների շրջանակներում արարքը որակելու, հետեւաբար այստեղ մենք կարող ենք գործ ունենալ այլ փաստերի հետ, որոնք այս պահին հրապարակայնացված չեն»,-ասաց Ռուբեն Մելիքյանը։

Հիշեցնենք, որ հունվարի 3-ին, «Դիանա Հարությունյան» ֆեյսբուքյան էջում կեղծ տեղեկատվություն էր հրապարակվել, որ, իբր, ՀՀ վարչապետ Նիկոլ Փաշինյանը շնորհավորել է ԱՄՆ նախագահին՝ Իրանի բարձրաստիճան զինվորականի նկատմամբ կատարված գործողության կապակցությամբ։ Կեղծ լուրը տարածում էր ստացել նաև ադրբեջանական և իրանական ԶԼՄ-ներում։ Հունվարի 5-ին, ԱԱԾ-ն հայտարարեց, որ պարզել են «Դիանա Հարությունյան» ֆեյսբուքյան կեղծ էջը վարողի ինքնությունը։ Վերջինս բերման էր ենթարկվել և պարզաբանում ներկայացրել՝ իր կատարած գործողությունների վերաբերյալ։ Ըստ ԱԱԾ-ի տեսանյութի՝ ձերբակալվածն ասել է, որ ունի ընդդիմադիր հայացքներ, իբր, անարդար է համարում Ռոբերտ Քոչարյանին կալանքի տակ պահելը։

Իրավապաշտպանը միեւնույն ժամանակ շեշտում է՝ չպետք է մոռանալ, որ ԱԱԾ տեսանյութը հստակ ընդգծված քաղաքական բովանդակություն ուներ եւ իրենից ներկայացնում էր իշխող քաղաքական ուժի քաղաքական ընդդմադիրների դեմ ուղղված տեքստ, որը Ռուբեն Մելիքյանի խոսքով, շատ վառ ձեւով ինքնությունը չբացահայտված անձը, որն արդեն մեղադրյալ է, հրապարակայնացրեց՝ ձայնը փոխված եւ դեմքը քողարկված հանգամանքներում։

«Կարեւոր էր նաեւ այն հանգամանքը, որ փաստաբանի մասին խոսք չէր գնում ։ Ինչպես նշել եմ, հիմա էլ կրկնում եմ, որ այս հանգամանքները հաշվի առնելով, հանրությունը կարող է ավելի մեծ կասկածանքով վերաբերվել ներկայացված փաստերին, քան այլ իրավիճակում, եթե օրինակ քաղաքական որեւէ տեքստ չլիներ եւ հարցը բացառապես գտնվեր ԱԱԾ տիրույթում»։

Ինչ վերբերում է վերը նշված գաղտնիությանը եւ հանգամանքին, որ հանրությանը հայտնի չէ մեղադրյալի ինքնությունը, իրավապաշտպանն ասաց՝ այստեղ 2 մրցակցող արժեքների հետ գործ ունենք։

«Առաջինը վերաբերում է ազգային անվտանգության ոլորտին, որը միջազգային փաստաթղթերով,մարդու իրավունքներին վերաբերող միջազգային ստանդարտներով պետությունը ավելի մեծ հայեցողության շրջանակ է տրամադրում՝ տեղեկատվությունը չհրապարակայնացնելու հարցում, մյուս կողմից, գործ ունենք իրավիճակի հետ, երբ ոչ միայն տեսանյութը, այլեւ երկրի վարչապետի կողմից դրան նախորդող եւ հաջորդող գրառումները ունեին քաղաքական բովանդակություն, իսկ քաղաքական բովանդակության պարագայում ցանկացած քրեական հետապնդման դեպքում հակառակը՝ հասարակությունը իրավունք ունի մի բան էլ ավելին տեղեկացված լինել եւ ես այն կարծիքին եմ, որ այստեղ այս երկու արժեքները պետք է հավասարակշռվեն եւ այս հարցը մենք դիտենք սովորական դեպքի հանգամանքով։ Այլ կերպ ասած՝ քաղաքական բնույթը հակակշռում է ազգային անվտանգության շահին»,-շեշտեց Ռուբեն Մելիքյանը։

Վերը նշված հանգամանքները հաշվի առնելով, իրավապաշտպանը պատահական չի համարում կարծիքները, որոնք առհասարակ կասկածի տակ դրեցին տվյալ անձի գոյությունն ընդհանրապես եւ հարց առաջացավ, թե արդյո՞ք այդ անձը նույն անձն է եղել, որը այդ ֆեյք օգտահաշիվը կառավարել է։

Աղբյուր` Փաստինֆո