Փաստ ինֆո

ԱՄՆ-ի և Իրանի միջև քաղաքական էսկալացիայի հետևանքով արդեն իսկ ֆոնդային բորսաներում կան որոշակի ներվային շարժումներ, ջղաձգումներ։ «Փաստինֆո»-ի հետ զրույցում ասաց «Հայացք» վերլուծական կենտրոնի փորձագետ, տնտեսագետ Լիլիա Ամիրխանյանը՝ անդրադառնալով ԱՄՆ-Իրան լարված հարաբերությունների ազդեցությանը համաշխարհային տնտեսության վրա։

«Նավթի համաշխարհային գներն արդեն իսկ գրանցել են աճ և եթե լինի հետագա էսկալացիա, կարող ենք ունենալ նավթի գների ռեկորդային աճ, նույնիսկ համաշխարհային վերջին ճգնաժամի արդյունքներին գերազանցող։ Սա, իհարկե, համաշխարհային տնտեսության, այդ թվում տարածաշրջանի և Հայաստանի տնտեսության վրա կունենա մեծ ազդեցություն, որովհետև փոփոխության կենթարկվի նաև դոլարի փոխարժեքը»,-նշեց փորձագետը։

Նա ընդգծեց, որ Իրաքից և Մերձավորարևելյան մյուս տարածաշրջաններից ամերիկյան զորքերի հնարավոր դուրսբերումը միանշանակ բացասական ազդեցություն կթողնի դոլարի փոխարժեքի վրա. «Դոլարի փոխարժեքն անկում կապրի։ Դա, իհարկե, լուրջ և բացասական հետևանքներ կունենա համաշխարհային տնտեսության վրա։ Մյուս կողմից Մերձավոր Արևելքում հնարավոր ռազմական զարգացումները փախստականների դեպի արևմտյան երկրներ նոր հոսքերի հավանականություն է առաջացնում։ Սա նույնպես սոցիալական և տնտեսական մեծ խնդիրների պատճառ կարող է հանդիսանալ, որն, անշուշտ, կածանցվի նաև մեր տնտեսության վրա»,-ասաց Լիլիա Ամիրխանյանը։

Անդրադառնալով այս իրադարձությունների տարածաշրջանային հետևանքներին՝ Լիլիա Ամիրխանյանը չբացառեց՝ ինչպես նախորդ կոնֆլիկտների, սրացումների, այնպես էլ այս ժամանակ Հայաստան-Իրան տնտեսական հարաբերություններում փոփոխություններ կլինեն. «Այսինքն` բացասական ֆոնը միանշանակ է։ Միևնույն ժամանակ, պետք է նշել, որ ցանկացած կոնֆլիկտ ռիսկերից ու մարտահրավերներից բացի ունի նաև որոշակի հնարավորություններ, որովհետև անկախ ամեն ինչից Իրանն իր տնտեսության բնականոն հունը և ընթացքն ապահովելու է և այս իմաստով ուղղությունը կփոխվի առավելապես այն երկրներ, որտեղ խնդիրներ չկան, այդ թվում՝ Հայաստան»,-նշեց փորձագետը։

Վերջինս ընդգծեց, որ Հայաստանի կողմից դիվանագիտական շատ ճկուն և նուրբ քաղաքականություն պետք է իրականացվի, քանի որ մի կողմում բարեկամ Իրանն է, մյուս կողմից գործընկեր ԱՄՆ-ն. «Անկախ ամեն ինչից Իրանի հետ մենք ունենք տնտեսական ակտիվ կապեր, ունենք մի շարք ծրագրեր, որոնք պետք է կյանքի կոչվեին և ցանկացած քաղաքական և այլ լարվածությունների պարագայում Իրանն այդ ծրագրերը կասեցնում է, որոշակի ժամկետով սառեցնում։ Այս անգամ ևս չի բացառվում, որ նման սառեցումներ կգրանցվեն՝ Մեղրիի ՀԷԿ-ի, բարձրավոլտ էլեկտրահաղորդման երրորդ գծի հետ կապված»,-ասաց փորձագետը՝ հավելելով՝ պետք է հնարավորինս ճիշտ դիվանագիտություն, ճիշտ արտաքին քաղաքականություն իրականացնել։

Հեղինակ՝ Հասմիկ Կոշկարյան

Աղբյուր` Փաստինֆո