Փաստ ինֆո

«5-րդ ալիք» ՀԸ սեփականատեր Արմեն Թավադյանի փաստաբան Հովհաննես Խուդոյանը վերաքննիչ բողոք է ներկայացրել։ Այս մասին «Փաստինֆո»-ին հայտնեց Հովհաննես Խուդոյանը։ Նրա փոխանցմամբ՝ ներկայացված բողոքում վիճարկվում է Երևանի ընդհանուր իրավասության դատարանի որոշումը, որով դատարանը բավարարել էր Արմեն Թավադյանին կալանավորելու մասին ՀՔԾ քննիչի միջնորդությունը, միևնույն ժամանակ մերժել փաստաբանի բողոքը որով վիճարկվում էր Թավադյանին ձերբակալելու որոշման իրավաչափությունը և Արմեն Թավադյանի նկատմամբ գրավ կիրառելու վերաբերյալ միջնորդությունը։

 «Օրենքը նախատեսում է, որ ձերբակալման և կալանքի միջնորդությունները միասին են քննվել, ուստի՝ դատարանը մեկ որոշում է կայացրել՝ երկու միջնորդությունների մասով, իսկ գրավ կիրառելու միջնորդությունը դատարանն այսպես, թե այնպես քննարկում է կալանավորման միջնորդության հետ։ Դատարանը մեկ որոշման մեջ անդրադարձել է երեք տարբեր հարցերի»,- ասաց փաստաբանը։

Հիշեցնենք, որ դեկտեմբերի 19-ին ոստիկանությունը տեսանյութ էր տարածել, ըստ որի Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։ Դեպքի առթիվ ոստիկանությունում քրեական գործ է հարուցվել, որով նախաքննությունը կատարվում է ՀՔԾ-ում։

«Փաստինֆո»-ն ավելի վաղ հայտնել էր, որ նախաքննական մարմինը ոստիկանության կողմից ներկայացված արարքը որակել է սուտ ցուցմունք տալու համար տուժողին կաշառելը, որ կատարվել է կազմակերպված խմբի կողմից եւ մեղադրանք առաջադրել ՀՀ երկրորդ նախագահ Ռոբերտ Քոչարյանի ենթադրյալ աջակից՝ ավելի վաղ ձերբակալված Վ.Մկրտչյանին՝ ՀՀ քրեական օրենսգրքի 340-րդ հոդվածի 4-րդ մասի 1-ին կետով, եւ նրան ազատել արգելանքից։ Փոխարենը նույն օրը ձերբակալվել է հեռուստաընկերության սեփականատեր Արմեն Թավադյանը, ապա նաեւ կալանավորվել՝ նույն մեղադրանքով։

Դեկտեմբերի 27-ին Հովհաննես Խուդոյանը հայտարարել է, որ ԶԼՄ ներկայացուցիչները՝ որպես հարգանքի դրսևորում իրենց գործընկերոջ նկատմամբ, պատրաստակամություն են հայտնել երաշխավորելու, որ պարոն Թավադյանը, գտնվելով ազատության մեջ, որևէ խոչընդոտ չի հանդիսանա քրեական գործի համար եւ համապատասխան միջնորդությունը նույն օրն առձեռն փոխանցել դատախազություն։ Դատախազությունն այսօր մերժել է «5-րդ ալիք» ՀԸ սեփականատեր Արմեն Թավադյանի նկատմամբ ընտրված խափանման միջոցը կալանավորումն անձնական երաշխավորությամբ փոխարինելու վերաբերյալ փաստաբանի միջնորդությունը՝ անհիմն լինելու պատճառաբանությամբ։

 Երեւանի ընդհանուր իրավասության դատարանի որոշման դեմ վերաքննիչ բողոք ներկայացնելով փաստաբանը պահանջում է փոխել հեռուստաընկերության սեփականատեր Արմեն Թավադյանի խափանման միջոցը եւ նրան ազատել կալանքից, կամ թույլատրելի համարել գրավի կիրառումը։ Ընդ որում, գրավի չափը փաստաբանը թողել է դատարանի հայեցողությանը։

Հեղինակ՝ Իզաբել Սահակյան

Աղբյուր` Փաստինֆո