Փաստ ինֆո

Քաղտեխնոլոգ Վիգեն Հակոբյանը կարծում է, որ 2020 թվականը լինելու է մի տարի, որի ընթացքում ակտիվորեն ձեւավորվելու է ընդդիմադիր դաշտը։

«Փաստինֆո»-ի հետ զրույցում քաղտեխնոլոգն ասաց՝ անկախ այն հանգամանքից, առաջիկա համապետական ընտրությունները կլինեն հերթական /2023 թվականին/, թե զարգացումների բերումով՝արտահերթ, քաղաքական դաշտը սկսելու է նախապատրաստվել դրանց։

«Ընդդիմադիր քաղաքական դաշտն սկսելու է ակտիվորեն ձեւավորվել, կարծում եմ՝ տրանսֆորմացիաներ կլինեն, նոր քաղաքական ուժերը, որոնք արդեն ստեղծված են, կսկսեն ավելի ակտիվորեն ու համառորեն իրենց տեղը որոնել արեւի տակ։ Չեմ բացառում, որ կձեւավորվեն նաեւ նոր քաղաքական ուժեր»,-ասաց Վիգեն Հակոբյանը։

Ըստ քաղտեխնոլոգի, այն ուժերը , որոնք 2018 թվականի տեղի ունեցած թավշյա հեղափոխությունից հետո մեխանիկորեն տրանսֆորմացվեցին ընդդիմության, բնականաբար, փորձելու են ավելի ակտիվանալ եւ ավարտին հասցնել իմիջային ու կառուցվածքային փոփոխությունները, որոնք, ընդհանուր առմամբ դանդաղ ու անհաջող են անում։

Իշխանության մարտավարությունն էլ, ըստ քաղտեխնոլոգի, բխելու է վերը նշված զարգացումներից։ «Պարզ է՝ երբ ասում ենք իշխանություն, գործ ունենք կոնկրետ վարչապետի հետ, որն իր վրա է քաշել ամբողջ իշխանության բեռն ու պատասխանատվությունը։ Նա հասկանում է, որ ամեն դեպքում, վարկանիշի անկում էլի է լինելու»։

Վիգեն Հակոբյանի խոսքով, պարզ է, որ 2018 թվականից ի վեր Նիկոլ Փաշինյանի վարկանիշն անկում է ապրել, ինչը տեսանելի է անգամ սոցիոլոգիական հարցումներով, որոնց կարող ենք ոչ միանշանակ վերաբերվել։ «Պարզ է, որ էլի է լինելու վարկանիշի անկում։ Հեղափոխությունից հետո որոշակի ժամանակաշրջան հասարակությունը բավականին բարեհաճ է վերաբերվում հեղափոխությունից հետո իշխանության եկած ուժերին եւ այսպես ասած, քաղաքական կարանտինի շրջան է լինում, որը կարծում եմ, արդեն բավականին երկար է ձգվում եւ չի կարող անվերջ ձգվել, որովհետեւ այն գերսպասումները , որ առաջանում են, շատ դժվար է կյանքի կոչել»,-բացատրում է քաղտեխնոլոգը՝ շարունակելով, որ հենց այս պատճառով Նիկոլ Փաշինյանը հիմնականում զբաղված է սեփական փիարով։

«Յուրաքանչյուր օր մենք տեսնում են նման փիար դրսեւորումները՝ հիմնականում վարչապետի լայվերի միջոցով»,-շեշտեց քաղտեխնոլոգը։
Վիգեն Հակոբյանն ասաց՝ համաձայն է Նիկոլ Փաշինյանի այն հայտարարության հետ, թե պետական ինստիտուտները չեն գործում. «Ինքը դա խոստովանեց եւ ստիպված է ամեն ինչ ինքնուրույն անել, անգամ Նոր Տարվա օրերին ինքն էր ստիպված իրանյան ճգնաժամի շուրջ հայտարարություններ անել, իր ոճով խոսել «տնայնագործ գեոպոլիտիկների մասին», որովհետեւ իրականում որեւէ այլ ինստիտուտ, որի մասին ինքը խոսում է, այդ ժամանակ չէին գործում եւ պարզ է , որ իշխանության այսօրվա գործելաոճի , պետական ինստիտուտների մակարդակի պայմաններում վարկանիշի նվազումն անխուսափելի է, իսկ այդ իրավիճակում պարարտ հող է ստեղծվում ընդդիմադիր ու այլընտրանքային ուժերի համար»։

Ամփոփելով, քաղտեխնոլոգն ասաց, որ ընդհանուր առմամբ, գործող իշխանությունը 2020 թվականին փորձելու է ադապտացվել ընդդիմադիր դաշտի ինստիտուցիոնալիզացման իրողությանը, ներքաղաքական լուրջ փոփոխություններ հնարավոր են՝ արդեն արտաքին քաղաքական գործոններով պայմանավորված։

«Մենք տեսանք, որ 2020 թվականը շատ բուռն սկսվեց, ընդ որում հենց մեր սահմաններին մոտ, ինչը էապես կարող է փոփոխել բոլոր խաղաքարտերն ու կանխատեսումները, որովհետեւ պատերազմական իրավիճակը, ընդ որում, համաշխարհային մասշտաբով, պահանջում է նաեւ համապատասխան կարողություններ ցանկացած երկրի իշխանությունից, առավել եւս մի երկրի իշխանությունից, որը գտնվում է այդ վտանգների կիզակետում »,-եզրափակեց քաղտեխնոլոգը։

Աղբյուր` Փաստինֆո