Փաստ ինֆո

Վարչապետ Նիկոլ Փաշինյանը շարունակում է նույն մարտավարությունը՝ անգամ արտաքին մարտահրավերները փորձելով ծառայեցնել իր ներքաղաքական նպատակներին։

«Փաստինֆո»-ի հետ զրույցում նման կարծիք հայտնեց քաղտեխնոլոգ Վիգեն Հակոբյանը՝ անդրադառնալով 2020 թվականի առաջին օրերի զարգացումներին։
Քաղտեխնոլոգը նկատի ունի «Դիանա Հարությունյան» անուն ազգանունով ֆեյք օգտատիրոջ բացահայտման պատմությունը, որը Փաշինյանի անունից կեղծ տեղեկություններ էր տարածել, իսկ ԱԱԾ կողմից հայտնաբերվելուց հետո կեղծ էջը վարողը հայտարարել էր, թե ունի ընդդիմադիր հայացքներ, իբր, անարդար է համարում Ռոբերտ Քոչարյանին կալանքի տակ պահելը։

«Այդ ամենը թե իրավական , թե քաղաքական, թե տրամաբանության տեսանկյունից, մեղմ ասած, անխոցելի չէ եւ համոզիչ էլ չէ։ Այդ ամենը շատ կանխատեսելի է եւ հարթ, ֆեյքի գործողություններն էլ շատ պարզունակ են, որովհետեւ, եթե նա միջազգային մասշտաբի ֆեյքային տեղեկություններ է տարածում, առնվազն այդ ֆեյքը պետք է ապահովեր իր իսկ անվտանգությունը՝ սկսած տեխնիկական միջոցներից, այսինքն, դրսում գրանցումից եւ այլն»,-ասաց քաղտեխնոլոգը։

Վիգեն Հակոբյանի խոսքով այս տեխնոլոգիաները դեռեւս որոշակիորեն ազդում են պայմանական ասած՝ պողոսների վրա, որովհետեւ, նախ, պատմական առումով հեղափոխությունից հետո շատ քիչ ժամանակ է անցել եւ կա մի զանգված, որը ուղղակի պատրաստ չէ կամ նույնիսկ ի վիճակի չէ լսել ու ընկալել որեւէ տրամաբանական բացատրություն։

«Ինչ թվեր էլ բերվեն, ինչ տրամաբանական մեկնաբանություններ արվեն իրենց համար դա որեւէ նշանակություն չունի, որովհետեւ նրանք որեւէ այլ կարծիք լսելու ոչ միայն պատրաստ չեն , այլեւ որոշ դեպքերում ունակ էլ չեն»,-ասաց Վիգեն Հակոբյանը։

Նույն կերպ, ըստ քաղտեխնոլոգի, տվյալ շերտի վրա ազդեցություն է թողել ՀՆԱ-ի վերաբերյալ վարչապետ Փաշինյանի գրառումը, որը հետո նա խմբագրեց։
Հիշեցնենք, Փաշինյանը Ֆեյսբուքի իր էջում գրել էր , թե 2019 թվականի ՀՆԱ-ի Հայաստանն անցել է Վրաստանին եւ Ադրբեջանին, ապա խմբագրել էր, թե 2020 թվականին կանցնենք Ադրբեջանին՝ ներողություն խնդրելով անճշտության համար։

«Այդ զանգվածը, որը պայմանական «պողոս» է անվանվում, միշտ եղել է եւ ազդվելու է նման գրառումներից։ Այդ զանգվածը միշտ եղել է, ՀՀՇ-ի օրոք օրինակ, նրանց կոչում էին ՀՀՇ-ի «բետեռ»-ներ, ՀՀԿ-ի ժամանակ՝ տատիկն էր, պարզապես, տեխնոլոգիաների զարգացմանը զուգահեռ, «բետեռ»-ների նոր սերունդը տեղափոխվել է Ֆեյսբուք սոցիալական ցանց։ Իհարկե,նրանց քանակը ժամանակի ընթացքում նվազել եւ կարծում եմ, նվազել է, բայց նրանք դեռ կան»,-ասաց քաղտեխնոլոգը։

Անդրադառնալով իշխանության գործելաոճին, մասնավորապես, ուղղված դատական համակարգը ենթարկեցնելու նպատակին, քաղտեխնոլոգն ասաց, որ նախ անհասկանալի է մեթոդոլոգիան, որը փորձում է կիրառել իշխանությունը։ «Մեկ գրոհ են իրականացնում, հետո հայտարարում են , որ վեթթինգի մեխանիզմն է լինելու, հետո հրաժարվում են այդ գաղափարից՝ ամեն բան դնելով ԲԴԽ-ի վրա։ Սա խոսում է այն մասին, որ հստակ մեխանիզմ, թե ինչպես է իշխանությունն ուզում ռեֆորմներ իրականացնել դատական համակարգում, ընդհանրապես չկա, բայց, որ դատական համակարգը մեզ մոտ անկատար է, դա փաստ է, բայց այն , թե ինչպես են փորձում նրանք խնդիրը լուծել, մեղմ ասած, հավատ ու վստահություն չի ներշնչում, որ արդյունքում չի լինի այնպիսի դատական համակարգ, որը հիմա էլ չի սպասարկի գործող իշխանությանը»,-կարծում է քաղտեխնոլոգը։

Ըստ Վիգեն Հակոբյանի, դեռ խորհրդային շրջանից ի վեր, մեծ հաշվով դատական համակարգը մշտապես սպասարկել է օրվա իշխանությանը, այնպես, ինչպես կոկորդիլոսասեր մարզպետն էր հայտարարում, թե ոստիկանությունը միշտ օրվա իշխանության հենարանն է եղել։
«Այն հարձակումը, որ արվում է դատական համակարգի վրա, ցույց է տալիս, որ պարզապես կա խնդիր այդ համակարգն էլ իրենց տակ դնել եւ վտանգը հենց այստեղ է, ոչ թե այն հարցում, թե պե՞տք է արդյոք բարեփոխել համակարգը»։

Ինչ վերաբերում է ՍԴ-ին, ապա այստեղ ըստ քաղտեխնոլոգի նպատակը հստակ է՝ փոխել ՍԴ նախագահին։ «Քանի որ այստեղ եւս չկա ընդհանուր գծված ստրատեգիա , այստեղ էլ հենց առաջին դիմադրության պարագայում, երբ որեւէ մեկը դիմադրում է, իշխանությունը միանգամից խառնվում է իրար, որովհետեւ չունի հստակ մեթոդոլոգիա։ Այս 1 տարի 7 ամսվա գործունեությունը ցույց տվեց, որ իշխանությունը այսպես ասած սպրինտեր է (արագավազորդ,-խմբ) , այլ ոչ թե ստայեր (երկար տարածությունների մրցորդ սպորտսմեն,-խմբ) եւ երբ հանկարծ բլից-կրիգը՝ միանգամից հախուռն պատին ծեփելը, ասֆալտին փռելը չի անցնում , իրենք են հետ քաշվում։ Հիմա տեսնում ենք, որ ՍԴ-ի շուրջ իշխանությունը եւս մեկ էլեմենտ է փորձում օգտագործել՝ վաղ կենսաթոշակի ուղարկելը, որը, եթե հանկարծ չստացվի, իշխանությանը մնում է գնալ ամենաերկար ճանապարհով՝ սահմանադրական փոփոխություններով»։

Ըստ քաղտեխնոլոգի, սահմանադրական փոփոխություններն ի սկզբանե, ամենատրամաբանական կարող էր լինել իշխանության համար, որը ցանկանում է ինստիտուցիոնալ փոփոխություններ, բայց գործող իշխանությանը այդ ճանապարհը ձեռնտու չէր, քանի որ նա ամեն ինչ «հիմա ու այս պահին» է ուզում ։

«Եթե այսօր տրամադրություն կա՝ հենց հիմա անել, դա այդ սպրինտերն է, բլից-կրիգը , որը եթե չի ստացվում, սկսվում է խառնաշփոթ, ճանապարհների ու նոր մեղավորների որոնում եւ դա վերաբերում է բոլոր ոլորտներին»,-նկատեց քաղտեխնոլոգը։

Աղբյուր` Փաստինֆո