Փաստ ինֆո

Իրանը վստահաբար պատասխան է տալու ԱՄՆ-ին, դրան հետևելու են ԱՄՆ-ի գործողությունները և հնարավոր չի լինելու խուսափել իրավիճակի էսկալացիայից։ Այս մասին այսօր «Փաստինֆո»-ի հետ զրույցում ասաց միջազգայնագետ Սուրեն Սարգսյանը։

Նա նշեց՝ Իրանի պատասխանը պետք է համարժեք լինի ԱՄՆ-ի կողմից իրականացված օպերացիային, որի արդյունքում մահացավ Իրանի ամենասիրված ռազմական գործիչներից մեկը. «Կարծում եմ, պատասխանը ԱՄՆ-ին տրվելու է հենց նույն մասշտաբով և նույն ոճով»։

Միջազգայնագետի խոսքով, էսկալացիայի տեսանկյունից տեղի ունեցողը ԱՄՆ-ին ձեռնտու չէ, քանի որ կարող է ծանր հետևանքներ ունենալ այդ երկրի համար։ «Նաև ԱՄՆ-ի ներքաղաքական իրավիճակը հաշվի առնելով, Մերձավոր արևելքում իրավիճակը հաշվի առնելով, իհարկե, հետևանքները կարող են բավականին ծանր լինել, արդեն իրավիճակը սկսել է լարվել Իրաք-ԱՄՆ հարաբերություններում։ Այնտեղից կոչ են անում դուրս բերել ռազմաբազան ու զորքերին։ Սա լրացուցիչ դիստաբիլիզացիոն հետևանքներ կունենա ամբողջ տարածաշրջանի համար, որովհետև ԱՄՆ-ն Իրաքում է հիմնականում տեռորիզմի դեմ պայքարելու համար»,-ասաց Սարգսյանն ու ավելացրեց, որ եթե ԱՄՆ-ի զորքերն Իրաքից դուրս գան, ապա տեռորիստական խմբավորումների ակտիվացում կլինի։

Սուրեն Սարգսյանի կարծիքով տեղի ունեցողը ԱՄՆ նախագահի իմպիչմենտի վրա ազդեցություն չի ունենա. «ԱՄՆ-ում իմպիչմենտի պրոցեսն արդեն կարելի է համարել ավարտված, նույնիսկ եթե հարցը սենատում լսվի, ապա հեռանկար չի ունենալու, այնպես որ Թրամփի գործողությունները իմպիչմենտի խնդրի հետ չէի կապի»։

Փոխարենը, միջազգայնագետը ստեղծված իրավիճակը պայմանավորեց ԱՄՆ-ի կողմից հակաիրանական շարունակական քաղաքականության հետ ու նշեց, որ սա Թրամփի քաղաքական գիծն է։

«Այս ամենն իրականում նպատակ ունի զսպել Իրանին, բայց կարծես թե գործընթացը ԱՄՆ-ի վերահսկողության տակից դուրս է գալու և ԱՄՆ-ն իր պլանն ավարտին չի հասցնելու»,-ասաց Սարգսյանը։

Անդրադառնալով աշխարհաքաղաքական զարգացումների՝ Արցախի, Հայաստանի վրա անդրադարձին, միջազգայնագետն ասաց, որ ամբողջ Մերձավոր Արևելքի վրա կարող է լուջ ազդեցություն ունենալ։ Չեմ բացառում, որ պատերազմներ կլինեն նաև Սիրիայի, Լիբանանի տարածքում։ Սա նաև կվնասի մեր համայնքին, այն հայերին, ովքեր բնակվում են Մերձավոր Արևելքում։ Սա լրացուցիչ լարվածություն է առաջացնելու ամբողջ Մերձավոր Արևելքում, նաև Հարավային Կովկասում, այստեղ խոշոր խաղացողներ կան, օրինակ՝ Թուրքիան, և բնական է, որ Թուրքիան էլ կփորձի օգտվել ստեղծված իրավիճակից ու իր շահերն առաջ կմղի թե՛ Սիրիական ուղղությամբ, թե՛ այլ ուղղություններով։ Այնպես որ, եթե իրավիճակը դուրս եկավ վերահսկողությունից՝ ամենածանր հետևանքները կարող են լինել»։

Հեղինակ՝ Սոնա Գեւորգյան

Աղբյուր` Փաստինֆո