Փաստ ինֆո

Մարալիկի ծննդատան աշխատանքները ժամանակավորապես դադարեցվել են: Հիվանդանոցը մինչև հունվարի 7-ը ծնունդներ չի ընդունելու: Սպասում են Առողջապահության նախարարության համապատասխան որոշմանը, որից պարզ կլինի` կշարունակի ծննդատունը գործել, թե ոչ:

«Փաստինֆո»-ի հետ զրույցում Մարալիկի առողջության կենտրոնի տնօրեն Վռամ Մելիքյանն ընդգծեց` ծննդատունն աշխատեցնելու որոշումն իր ձեռքում չէ, պետք է վերադասի կողմից փաստաթուղթ լինի: Տնօրենի խոսքով ծննդատան աշխատանքները կասեցնելու հիմնական պատճառներից մեկը ծննդկանների թվի նվազումն է. «Ծննդկանները քիչ են: Անիի շրջանն է սա, որն էլ սահմանամերձ գոտի է: Ծնելիությունն ընկած է, ժողովուրդն արտագաղթում է: Մարդիկ չեն կարողանում ապրել: Ոմանք Երևան են գնում, ոմանք ուրիշ մարզեր: Այնպես չէ, որ հիմա չեն գնում, գնում են»,-ասաց Վռամ Մելիքյանը:

Նրա փոխանցմամբ 2018 թվականին ծննդատունն ընդունել է 126 ծնունդ, իսկ 2019 թվականին` 106. «Անցած տարի այս նույն կարգավիճակն էր. ֆինանսավորում չկար: Ես եմ պայքարել, որ ծննդատունը գործել է: Նախարարին, մարզպետին եմ ասել, մարդկանց եմ դիմել, որոնք ֆինանսապես աջակցել են»,-նշեց Վռամ Մելիքյանը:

Մարալիկի առողջության կենտրոնն ունի ընդհանուր 95 աշխատակից, իսկ ծննդատունը` 12 աշխատակից: Տնօրենը նշեց` եթե հունվարի 7-ին որևէ փաստաթուղթ չլինի, շարունակելու են իրենց բնականոն աշխատանքը, իսկ թե ինչպես են հոգալու ծննդատան ծախսերը, Վռամ Մելիքյանն նկատեց` կտեսնեն` ինչպես են ֆինանսավորում գտնում:

Մարալիկի ծննդատան աշխատանքների կասեցումը, միանշանակ, բացասաբար կազդի տարածաշրջանի բնակիչների համար. «Մի քանի անգամ դիմել եմ, որ ավելի լավ կլինի` պետությունը 5 մլն սուբսիդավորում տա: Մարդիկ այստեղ վատ են ապրում, թող օգնեն ժողովրդին, որ ծննդատունը մնա: Տարեկան 5 մլն դրամը չգիտեմ ինչ գումար չէ, որ պետությունը չկարողանա սուբսիդավորել»,-նշեց Վռամ Մելիքյանը` ևս մեկ անգամ վերահաստատելով, որ եթե տարեկան 5 մլն դրամով սուբսիդավորեն, ապա հանգիստ կկարողանան պահել ծննդատունը:

Հեղինակ` Հասմիկ Կոշկարյան

Աղբյուր` Փաստինֆո