Փաստ ինֆո

Ե'վ հոգևոր առաջնորդի, և' նախագահի մակարդակով Իրանի Իսլամական Հանրապետությունը խոստացավ` պատասխան են տալու այն բոլոր ուժերին, որոնք իրականացրել են «Իսլամական հեղափոխության պահապանների կորպուսի» «Ղոդս» հատուկ ստորաբաժանման ղեկավար, գեներալ Ղասեմ Սուլեյմանիի սպանությունը: Իրանագետ Գոհար Իսկանդարյանի կարծիքով, սակայն, չի լինի այնպիսի պատասխան, որն Իրանի Իսլամական Հանրապետությանը կներքաշի պատերազմի մեջ:

«Փաստինֆո»-ի հետ զրույցում նա ասաց` չի կարծում, որ Իրանի պատասխանը շատ կուշանա, բայց միևնույն ժամանակ վստահ է` նրանք չեն էլ շտապելու: Իրանագետի խոսքով Իրանի Իսլամական Հանրապետությունում մանրակրկիտ կերպով կպատրաստվեն, կմտածեն ու կխորհեն` ինչպես պետք է արժանի պատասխան տան, որպեսզի և' իրենց դեմքը պահեն, և' լուրջ խնդիրների մեջ չներքաշվեն. «Կանխատեսում եմ` դրանք ավելի շատ կլինեն պրոքսի հարվածներ: Այսինքն ոչ Իրանի տարածքում, Իրանից դուրս: Դա կարող է լինել Սիրիայում, Եմենում, Իրաքում և կարող է լինել բոլոր այն շարժումների ձեռքով, որոնք համագործակցում են Իրանի Իսլամական Հանրապետության հետ»,-նշեց իրանագետը` ընդգծելով` որքան էլ Իրանը համարվում է տարածաշրջանի հզոր երկիր, այնուամենայնիվ Իրանի և ԱՄՆ-ի ռազմական պոտենցիալները տարբեր են, հետևապես Իրանն իր նախաձեռնությամբ նման լուրջ խնդրի մեջ չի ներգրավվի:
Նրանք կփորձեն ամերիկյան որոշակի հետաքրքրությունների, ռազմաբազաների նկատմամբ կամ նրանց զինվորական հրամանատարների նկատմամբ ինչ-որ գործողություններ իրականացնել, բայց չեմ կարծում, որ կանցնեն այն կարմիր գիծը, որը պատերազմական գործողությունների կբերի»,-հավելեց Գոհար Իսկանդարյանը:

Վերջինս նկատեց` առաջինը կարմիր գիծը հատել է Միացյալ Նահանգները և այժմ Իրանը երկու տարբերակ ունի կա'մ ոչինչ չանել, իբրև թե ոչինչ չի եղել, կա'մ անել մի բան, որը շատ խոցելի չլինի ԱՄՆ-ի համար: Իրանագետի խոսքով Սուլեյմանին կենդանի լեգենդ էր և Իրանում նրան շատ էին սիրում, հետևապես Իրանն ինչ-որ բան պետք է անի. «Նուրբ իրավիճակ է. և' պետք է պատասխան տան, և' դա այնպես պետք է անեն, որպեսզի խուսափեն լուրջ ռազմական գործողություններից»,-նկատեց իրանագետը:

Այս ամենն ԱՄՆ-ի կողմից արվում է` մեծ պատերազմ հրահրելու նպատակով, թե ոչ, դա ապագան ցույց կտա, սակայն իրանագետը կասկածում է` Դոնալդ Թրամփը նախագահական ընտրություններից 11 ամիս առաջ կմտնի լուրջ պատերազմական գործողությունների մեջ. «Նրան ձեռնտու չէ, որովհետև չգիտի` ինչ տեղի կունենա: Բնականաբար, եթե բախումներ լինեն, մեծ քանակի զոհեր կլինեն: Արդյոք Միացյալ Նահանգների հանրույթը պատրաստ է այդքան զոհեր ստանալ և դրանից հետո ներել ու նորից վերընտրել Թրամփին: Այստեղ Թրամփի հեղինակությունը բավական լուրջ վայրէջք կարող է ունենալ: Այլ հարց է, երբ Թրամփը վերընտրվի, իր դիրքերն ամրապնդի։ Այդ պարագայում խոսակցությունը, վստահաբար, այլ բնույթ կունենա»,-նշեց Գոհար Իսկանդարյանը` հավելելով` Իրանի պատասխանից պարզ կդառնա` արդյոք Թրամփը կկարողանա ժամանակավորապես խոհեմություն դրսևորել, թե այնուամենայնիվ կփորձի լուծել ԱՄՆ-ի համար շուրջ 40 տարի լուրջ խնդիր համարվող հարցը:

Հեղինակ` Հասմիկ Կոշկարյան

Աղբյուր` Փաստինֆո