Փաստ ինֆո

Գերծանրաբեռնված փաստաբանը ժամանակ գտնու՞մ եք ամանորյա նվերների համար՝ «Փաստինֆո»-ի հարցին ի պատասխան փաստաբան Արամ Վարդեւանյանն արձագանքեց՝ այլընտրանք չունի, պարտավոր է գտնել։

«Անգործությունն առնվազն իրավական հետևանքներ ունենալու է։ Անգործությունը խրախուսելի չի լինի և կարծում եմ՝ դա նաև այն ամենահաճելի պարտականություններից է, որ ցանկացած մարդ պարտադիր իրականացնում է մեծ հաճույքով։ Ինքս նվեր ընտրելու մեջ դժվարանում եմ, որովհետև ավելի շատ սիրում եմ կոնկրետ իմանալ անձն ինչ է ցանկանում և այդ նվերն անել։ Բայց մյուս կողմից դա էլ այդ անակնկալն է խաթարում։ Դրա համար այդ շրջանն ինձ մոտ միշտ դժվար է լինում»,- ասաց նա։

-Որևէ մեկին օգնության համար դիմու՞մ եք։

Որպես կանոն կնոջս եմ դիմում, և կինս այդ առումով ինձ մշտապես իրավական աջակցություն է ցուցաբերում։ Թե՛ կազմակերպչական, թե՛ այլ առումով այդ հարցերը հիմնականում իր կողմից են իրականացվում։

-Ինչպե՞ս եք նախընտրում Ամանորն անցկացնել։

Միանշանակ ընտանիքի հետ միասին՝ ծնողներիս, եղբորս ընտանիքի հետ։ Գտնում եմ՝ Ամանորը հենց իրենից ենթադրում է այդ ընտանեկան ոգու, ընտանիքով հավաքվելու, կարծիքներ, մտքեր փոխանակելու, մեծ եռանդով, ուրախությամբ, հույսերով լի Նոր տարին դիմավորելու։ Ես այդպես եմ տեսնում խորհուրդը։ Այն իրենից ենթադրում է առավելապես ընտանիքի արժևորումը։ Կարծում եմ՝ հայերս հենց դրանով ենք տարբերվում. Ամանորին մեծ ընտանիքով հավաքվելը շատ հայեցի երևույթ է, որը ես շատ սիրում եմ և հիմա նույն կերպ շարունակում եմ։

-Ո՞րն է եղել Ձեր ամենահետաքրքիր և ամենաարկածային Ամանորի գիշերը։

Երևի նույնիսկ ուսանողական տարիներին չեմ ունեցել։ Ես այդ առումով շատ պասիվ եմ եղել։ Միշտ Ամանորի գիշերն անցկացրել ու անցկացնում եմ ընտանիքիս հետ։ Արկածախնդրությունը երևի թե տղաս է ապահովում, որովհետև շատ ակտիվ է։ Այդ առումով երևի թե կնոջս գեներն իրեն փոխանցվել են։ Ինքը դրանով ամեն ինչ շատ աշխույժ է պահում։ Այսինքն իր հետևից վազելը և այլն միշտ առկա է։ Դրանով արկածախնդրության խնդիր չի լինում։ Ընդհանուր առմամբ ես սիրում եմ այդ ժամանակն ընտանիքիս հետ անցկացնել՝ հանգիստ միջավայրում։

-Ամանորյա տրամադրություն ստեղծող ի՞նչ ֆիլմեր եք դիտում։

Խորհուրդ կտամ շատ նոր ֆիլմ։ Ավելի շատ մուլտֆիլմ է, կոչվում է «Կլաուս»։ Հենց ամերիկյան մշակույթում հայտնի Սանտա Կլաուսի ամբողջ պատմությունն է, կարելի է ասել։ Ինչպես է ձևավորվել փոստատարի և Սանտա Կլաուսի փոխհարաբերությունները և փոխօգնությունը։ Խորհուրդ կտամ այն, ինչ բոլորը դիտում են՝ «Տանը միայնակ»։ Ինքս նոր տարվա օրերին սիրում եմ դիտել «Մեր բակը» ֆիլմերը՝ առաջինը և երկրորդը։ Դրանք դասական, մեր այս նոր ժամանակաշրջանի տարբեր խնդիրների և սխալ երևույթներին անդրադառնալու հոյակապ միջոց է։ Ինքս ֆիլմեր շատ եմ սիրում։ Դա կարելի է ասել իմ միակ հոբբիներից է։

-Եղե՞լ է դեպք, երբ Ձմեռ պապիկից ստանաք այն, ինչ չէիք խնդրել։

Ինձ թվում է՝ Ձմեռ պապիկի հետ հաղորդակցման մեջ ինձ մոտ ծանուցագրերի խնդիր կա, որովհետև կարծեք թե ծանուցագրերը հետվերադարձով գալիս են, նամակները երևի չի ստանում։ Ես կարծում եմ՝ իմ կյանքի ընթացքում Ձմեռ պապիկը մշտապես առաջնորդվել է իմ ցանկություներով, և գրեթե միշտ ստացել եմ այն, ինչ ցանկացել եմ։ Երևի շատ վաղ հասակում, միգուցե ուրիշ խաղալիք էի ուզում, ուրիշ եմ ստացել, բայց այդ ուրիշով էլ եմ ուրախացել։ Կարծում եմ՝ իրականում ոչ թե բուն, կոնկրետավորված նվերն է կարևոր, այլ իմաստը՝ նվեր տալը։ Նվեր տալն ու ստանալն ամենագեղեցիկ երևույթներից է մարդկային փոխհարաբերություններում, իհարկե, երբ այն անկեղծ է լինում։

Հեղինակ՝ Հասմիկ Կոշկարյան

Աղբյուր` Փաստինֆո