Փաստ ինֆո

Մոտենում են տոները և տնային տնտեսուհիներին մտահոգող թերևս միակ հարցը՝ դա տոնական ինչ կերակուր պատրաստելն է։  Իրականում ինչպես ամանորյա, այնպես էլ այլ տոնական օրերի համար մեր ազգային խոհանոցում կան բազմաթիվ տոնածիսական կերակրատեսակներ։ Մեր նախնիների շնորհիվ դրանք պահպանվել են և տոնածիսական կերակրատեսակներից գրեթե 60-70-ը փոխանցվել է մեզ։

«Փաստինֆո»-ի հետ զրույցում «Հայ խոհարարական ավանդույթների զարգացում և պահպանում» ՀԿ-ի նախագահ Սեդրակ Մամուլյանը նշեց՝ տոնածիսական կերակուրներն աղոթքներ են հղված առ Բարձրյալը։ Սեդրակ Մամուլյանն ամանորյա կերակուրներից առանձնացրեց Նավասարդի հարիսան. «Այն սովորական հարիսայի բաղադրությունն ունի, ձավար է և միս, բայց գառան միս, բայց պատրաստման եղանակն այլ է։ Չի հարվում, չի խառնվում։ Դրվում է համապատասխան քանակի ձավար, համապատասխան քանակի միս։ Նախկինում իջեցվում էր թոնրի մեջ, հիմա կարելի է պահել նաև կրակի վրա և առանց խառնելու, առանց հարելու հասցվում է պատրաստի վիճակի։ Չի հարվում, որպեսզի գալիք տարին խառնակ չլինի, պատերազմներ չլինեն»,-նշեց խոհարարը։

Որպեսզի գալիք տարին անուշ և գեղեցիկ լինի, Սեդրակ Մամուլյանը խորհուրդ է տալիս պատրաստել նաև «Անուշ» կոչվող ապուրը։ Այն պատրաստվում է ամենատարբեր չրերով, նման է կոմպոտի, բայց իր մեջ կարող է պարունակել  ձավար, սիսեռ, ոսպ, լոբի, կանաչի, ավելուկ կամ վայրի այլ ուտելու բույսեր։

Խոհարարը համաձայն չէ այն մտքին, որ եթե որևէ կենդանու տարի է, ապա սեղանին նրան հաճոյացող կերակրատեսակ պետք է լինի։ Սեդրակ Մամուլյանի խոսքով դա սննդի համակարգի հետ որևէ կապ չունի. «Ազնվորեն եմ ասում, որքան մենք ուսումնասիրում ենք, իսկ մենք դրանով զբաղվում ենք վերջին 15 տարին որպես հայ խոհարարական ավանդույթների զարգացման և պահպանման հասարակական կազմակերպություն, մենք որևէ դեպք չգիտենք, որ եթե գոմեշի տարի է, ապա պետք է գոմեշ դնենք սեղանին կամ եթե կոկորդիլոսի տարի է, սեղանին կոկորդիլոս դնենք։ Մեր ավանդույթների մեջ նման բան չենք տեսել» ,-նշեց Սեդրակ Մամուլյանը։

Եվ չնայած դրան, բոլոր այն մարդկանց, որոնք հավատում են, որ մկան տարին պետք է դիմավորել նրա սիրելի ուտեստներով, խոհարարը խորհուրդ տվեց սեղանին դնել բոված աղանձ, ինչպես նաև հայկական պանրի տեսականի. «Ընդհանրապես ամեն ինչ դրեք հայակական։ Ամանորն էլ ընտանեկան տոն է և շատ լավ կլինի՝ տանը լինեք և շատ լավ կլինի՝ Ձեր տուն եկած հյուրին չստիպեք, որ այս կամ այն բանն ուտի։ Դա դեմ է էսթետիկայի և էթիկայի կանոններին։ Կերեք չափավոր, հյուրասիրեք չափավոր»,-հավելեց խոհարարը։

Մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո