Փաստ ինֆո

Փաստաբան Լևոն Բաղդասարյանն անընդունելի է համարում վերացական դատողություններով անձին կալանքի տակ պահելը։

Ըստ նրա՝ պետք է հատուկ ուշադրություն դարձնել այն գործերին, որտեղ խափանման միջոց է ընտրված կալանավորումը։ «Փաստինֆո»-ի հետ զրույցում փաստաբան Լևոն Բաղդասարյանն արձանագրեց, որ դա ծայրահեղ միջոց է և, եթե դատական իշխանությունը և գործադիր մարմինը համապատասխան հետևություններ չանեն, ապա դրա հետևանքները հետագայում կլինեն կործանարար։

«Վերացական դատողություններով անձին կալանքի տակ պահելն անթույլատրելի է։ Հատկապես՝ ՍԴ-ն հակասահմանադրական է ճանաչել, երբ գրավը կիրառվում էր՝ հաշվի առնելով ՀՀ քրեական դատավարության օրենսգրքի համապատասխան հոդվածների հետ կապված՝ քննությունից թաքնվելը, խոչընդոտելը »,- ասաց Բաղդասարյանը՝ հավելելով, որ պետք է հետագայում կարողանանք կիրառել գրավի ինստիտուտը։ Նրա խոսքով՝ գրավի կիրառումից հետո, եթե անձը կարող է որոշակի աղերս ունենալ տվյալ քրեական գործի հետ կապված, ապա գրավի գումարը դառնում է պետական սեփականություն , իսկ անձին կալանավորում են։ «Լիահույս եմ, որ հետագայում այդ իրավունքը կտան նաև նախաքննություն իրականացնող մարմիններին»,- նշեց փաստաբանը։

Ամփոփելով անցնող տարին՝ փաստաբանը խնդրահարույց համարեց նաև վարույթն իրականացնող մարմինների ծանրաբեռնվածությունը։ «Ծանրաբեռնված վարույթն իրականացնող մարմինը չի կարող օբյեկտիվ գործարքներ իրականացնել։ Դա խնդիր է։ Գործադիր իշխանության թիվ մեկ խնդիրը պետք է լինի հնարավորինս իր գործառույթներով բեռնաթափել ինչպես դատական իշխանության, այնպես էլ՝ նախաքննություն իրականացնող մարմինների գործառույթները։ Բազմաթիվ գործեր կան այսօր, որոնք հանգրվանում են դատարանում, որոնք կարող էին չլինել, եթե գործադիր մարմինը որոշակի ծրագիր մշակեր»,- ասաց Բաղդասարյանը՝ նշելով, որ նկատի ունի աշխատավարձերի դրվագը և դրանք այն գործերը չեն, որ պետք է հանգրվանեն դատական վարույթներում։

Բաղդասարյանն ընդգծեց, որ կա աշխատանք և համախմբված ուժերով պետք յուրաքանչյուրը դառնա այդ գործառույթների կրողը։

Հեղինակ՝ Իզաբել Սահակյան

Աղբյուր` Փաստինֆո