Փաստ ինֆո

Ավագանու «Լույս» խմբակցության ղեկավար Դավիթ Խաժակյանն այսօր Հատուկ քննչական ծառայությանն է ներկայացրել պաշտոնեական կեղծիքի գործով փաստաթուղթ։

«Այս փաստաթուղթը իմ կողմից բարձրաձայնած քաղաքապետի լիազորություններն անցնելու և պաշտոնեական կեղծիքին է առնչվում, որի հետ կապված պարբերաբար նոր հանգամանքներն են ի հայտ եկել։ Ես հրապարակել էի մի փաստաթուղթ, որտեղ երևում էր, թե ինչպես է քաղաքապետը առաջին տեղակալ Հրաչյա Սարգսյանին հանձնարարում գործուղման մեկնելու դեպքում քաղաքապետի ԺՊ նշանակել մյուս տեղակալ Հայկ Սարգսյանին»,-այս մասին այսօր լրագրողների հետ ճեպազրույցում ասաց Խաժակյանն ու ավելացրեց, որ քաղաքապետը նման լիազորություն չունի  և քաղաքապետին փոխարինել կարող է միայն նրա առաջին տեղակալը։

Խաժակյանը պատմեց, որ քաղաքապետարանից պարզաբանել են, թե պրոցեսը տեղի է ունեցել երկու ձեռքով, այսինքն` նախ քաղաքապետը հանձնարարել է Հրաչյա Սարգսյանին լիազորություններ վերապահել, ապա Հրաչյա Սարգսյանը լիազորությունները տվել է Հայկ Սարգսյանին։

«Ես ցույց էի տվել այն կարգադրությունները, որոնք, ըստ էության, կեղծված էին, և մեզ նաև ասում էին՝ այն, ինչ ցույց է տալիս Դավիթ Խաժակյանը, դա աշխատանքային տարբերակ է։ Ես կարծում եմ, որ այդ հեքիաթները կարող են պատմել այլ վայրում, բայց ոչ հանրությանը կամ իրավապահներին, որովհետև կնքված և ստորագրություն դրված, համարակալված փաստաթուղթը չի կարող լինել սևագիր, ուստի փաստաթուղթ կեղծելու հանգամանքը թող դրանով չքողարկեն»,-նշեց Խաժակյանը։

Նա ընդգծեց, որ իր ձեռքի տակ փաստաթուղթ է, որը բացահայտ վկայում է՝ քաղաքապետի առաջին տեղակալ Հրաչյա Սարգսյանը ինչ-ինչ պատճառներից ելնելով իրականում քաղաքապետի տեղակալ Հայկ Սարգսյանին չի նշանակել Երևանի քաղաքապետի պաշտոնակատար և Հայկ Սարգսյանի կողմից ստորագրված 70 և ավելի իրավական ակտերն առ ոչինչ են։

Խաժակյանը վստահ է, որ գործ ունենք պաշտոնական լիազորությունների չարաշահման և ինքնիրավչության հոդվածների հետ։

«Երեկ ՀՔԾ-ում էի, ինձ ուղղել էին մի շարք հարցեր, որոնց բնույթն ինձ համար ոչ այնքան հասկանալի էր, այդտեղ որոշակի բացասական միտում եմ տեսնում։ Նախ` ինձ հարցնում են՝ ինչու չեք դիմել դատարան, որովհետև  օրենքով ես որպես խմբակցության ղեկավար կարող էի վիճարկել քաղաքապետի գործողությունները դատարանում։ Ես ՀՔԾ ներկայացուցչին  ներկայացրի իմ տեսակետն առ այն, որ եթե խոսում ենք պաշտոնական լիազորություններն անցնելու և պաշտոնական կեղծիքի հետ, որոնք քրեական գործողություններ են, ապա դա դատարանը, որպես զուտ իրավական խնդիր չէր կարող քննել, ուստի իմ լիազորությունների վերաբերյալ այդ հարցը տալն անտեղի է»,-պատմեց նա։

Խաժակյանը նշեց՝ գիտի թե քաղաքապետարանից, որ ուղղությամբ են փորձելու շտկումներ անել, և եթե փորձեն նոր, կեղծ փաստաթղթեր ստեղծել, ապա ինքն ունի այս խաղի «ջոկերը», որը վերջնականապես կտա հարցերի պատասխանները։

«Բայց, եթե գործ ունենք ՀՔԾ-ի հետ, որն առաջնորդվում է գործի հանգամանքներով և ոչ թե քաղաքական նպատակահարմարություններով, ապա համոզված եմ, որ այդ ջոկերն ինքնուրույն գործի մեջ ի հայտ կգա այն ժամանակ, երբ ՀՔԾ-ն ցուցաբերի անկողմնակալություն և գործը պատշաճ կերպով քննի»,-ասաց «Լույս» խմբակցության ղեկավարը։

Հեղինակ՝ Սոնա Գեւորգյան

Աղբյուր` Փաստինֆո