Փաստ ինֆո

Որևէ լրացուցիչ տեղեկություն չունեմ։ Իմ տեղեկությունը հրապարակային տեղեկատվությունն է։ Լրագրողների հետ զրույցում այս մասին ասաց Արցախի նախկին ՄԻՊ Ռուբեն Մելիքյանը՝ անդրադառնալով ՍԴ նախագահ Հրայր Թովմասյանի հարցաքննությանը։

Ռուբեն Մելիքյանը նկատեց՝ սա պարզապես հարցաքննություն չէ. «Մենք ունեցանք ավելի լայն կտրվածքով ՍԴ-ի նկատմամբ ճնշումների մի ամբողջ շղթա, որը վերջին շրջանում կարծեք թե դադարել էր, բայց պարզվեց՝ ժամանակավորապես էր դադարել։ Մենք իրականում ունեինք այն լավատեսությունը, որ կարծեք թե մեր իշխանությունները որոշակի հետևություններ են արել տեղի ունեցած գործողություններից։

Իշխանությունները երևի վերջապես ընկալել են իշխանությունների տարանջատման, զսպումների և հակակշիռների կարևորությունը և 2019 թվականի կարևոր ձեռքբերումներից շատերը նշում են, որ այնպես ստացվեց՝ այսօր ունենք ընկալում, որ մեր ՍԴ-ն կախված չէ ներքաղաքական իշխանություններից։ Բայց մենք հիմա նորից այս արժեքը կորցնելու վտանգի տակ ենք, որովհետև երեկ անմիջապես Հանրապետության նախագահի կողմից վաղ կենսաթոշակի անցնելու մասին օրենքը ստորագրելուց անմիջապես հետո սկսվեցին նոր գործողություններ ՍԴ-ի հետ կապված, մասնավորապես Հրայր Թովմասյանի սանիկներից մեկին մեղադրանք առաջադրելը և կալանքի տանելը, այն պարագայում, երբ դատարանը կալանքից ազատել էր հիմնավոր կասկածի բացակայությամբ»,-նշեց Ռուբեն Մելիքյանը՝ ընդգծելով, որ այդ գործողությունները չէին կարող ուղղակի փոխկապակցված չլինել։

Նրա կարծիքով երեկ տեղի ունեցած գործողություններն ուղղակիորեն պայմանավորված են օրենքը ստորագրելու հետ. «Մենք տեսանք՝ ինչպես են իշխանություններն ընկալում կամավորությունը»,-հավելեց Ռուբեն Մելիքյանը։
Նա ընդգծեց, որ այս ամենն ուղղված է ՍԴ դատավորներին, որոնց «Իմ քայլ» դաշինքը ձեռք է մեկնել. «Պարզվում է՝ գուցեև ձեռք է մեկնել, բայց մյուս ձեռքում էլ դագանակ է։ Այսպես պետականություն չեն կառուցում»,-նշեց Ռուբեն Մելիքյանը։

Աղբյուր` Փաստինֆո