Փաստ ինֆո

«5-րդ ալիք» ՀԸ սեփականատեր Արմեն Թավադյանի փաստաբանը միջնորդություն է ներկայացրել ՀՀ գլխավոր դատախազություն՝ նրա նկատմամբ ընտրված խափանման միջոցը կալանավորումն անձնական երաշխավորությամբ փոխարինելու վերաբերյալ։ Այս մասին «Փաստինֆո»-ին հայտնեց Արմեն Թավադյանի փաստաբան Հովհաննես Խուդոյանը։ Նրա փոխանցմամբ՝ ԶԼՄ ներկայացուցիչները՝ որպես հարգանքի դրսևորում իրենց գործընկերոջ նկատմամբ, պատրաստակամություն են հայտնել երաշխավորելու, որ պարոն Թավադյանը, գտնվելով ազատության մեջ, որևէ խոչընդոտ չի հանդիսանա քրեական գործի համար։

«Դա միջնորդությամբ հանձնել ենք ՀՀ գլխավոր դատախազություն, հասցեագրված է գլխավոր դատախազին»,- ասաց Հովհաննես Խուդոյանը։ Հարցին, թե արդյո՞ք միջնորդությունը մերժելու դեպքում կդիմեն դատարան, փաստաբանը պատասխանեց. «Ըստ էության՝ միջնորդության մերժումը բողոքարկելը մի փոքր խնդրահարույց կարող է դառնալ։ Ավելի արդյունավետ գործիքակազմը հենց միանգամից դատարան դիմելն է, այսինքն՝ ընտրված խափանման միջոց կալանավորումը վերացնելու պահանջով դիմելն է։ Եթե մի քիչ ավելի անկեղծ լինենք և փաստաթղթի նպատակը ներկայացնենք, ապա սա հնարավորություն է Դատախազությանը՝ իրենց թույլ տված կոպիտ սխալն ինքնուրույն ուղղելու համար»։

Նշենք, որ փաստաբանը չցանկացավ մանրամասնել, թե որ լրատվամիջոցների ներկայացուցիչներն են իրենց աջակցությունը հայտնել Արմեն Թավադյանին, որովհետև, նրա խոսքով, ցուցակը դեռևս համալրվում է։ «Բացի այդ՝ նկատի ունենալով, որ ցանկացած անձ, ով վերջին օրերին ինչ-որ դրական կերպ մեկնաբանում կամ միջնորդում է, հարձակումների թիրախ է դառնում։ Առաջիկայում ցանկն ամբողջությամբ կհրապարակենք»,- ասաց Խուդոյանը։ Նրա խոսքով՝ դեկտեմբերի 30-ը աշխատանքային օր է և ակնկալվում է, որ որոշումը կհրապարակվի դեկտեմբերի 30-ին։

Հիշեցնենք, որ «Մարտի 1»-ի գործով տուժողներին կաշառք առաջարկելու մեջ կասկածվող Վարուժան Մկրտչյանին մեղադրանք է առաջադրվել ՀՀ քրեական օրենսգրքի 340-րդ հոդվածի 4-րդ մասի 1-ին կետով, եւ ազատվել արգելանքից, իսկ նույն քրեական գործի շրջանակներում նույն հոդվածով Արմեն Թավադյանը նախ ձերբակալվել էր, ապա կալանավորվել։
Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, մերժել էր ձերբակալելու որոշման դեմ ներկայացված փաստաբանի բողոքը, իսկ Արմեն Թավադյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը՝ բավարարել։

Ոստիկանությունը տեսանյութ էր տարածել, ըստ որի Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։ Դեպքի առթիվ ոստիկանությունում քրեական գործ է հարուցվել, որով նախաքննությունը կատարվում է ՀՔԾ-ում։

«Փաստինֆո»-ն ավելի վաղ հայտնել էր, որ նախաքննական մարմինը ոստիկանության կողմից ներկայացված արարքը որակել է սուտ ցուցմունք տալու համար տուժողին կաշառելը, որ կատարվել է կազմակերպված խմբի կողմից։ Այսինքն՝ ըստ նախաքննական մարմնի «Մարտի 1»-ի գործով տվյալ տուժողին ենթադրյալ կաշառելը կազմակերպված բնույթ է կրել եւ ոչ թե կոնկրետ ենթադրյալ աջակցի նախաձեռնությունն է եղել։ Տարածված տեղեկատվությանն արձագանքել էր նաև

«Հայաստան» համահայկական հիմնադրամի նախկին գործադիր տնօրեն Արա Վարդանյանը` նշելով, որ ոստիկանական այս «օպերացիային» կարող են հաջորդել նոր ձերբակալություններ` չբացառելով նաեւ Ռ.Քոչարյանի որդիներից մեկի ձերբակալությունը: Լևոն Քոչարյանը հայտարարել է, որ երկու տարի շարունակ պնդել են, որ նպատակ չունեն գործի քննությանը խոչընդոտելու և ոչ էլ ցուցմունք կա, որը ցանկություն են ունեցել փոխելու։ Անդրադառնալով ոստիկանության տարածած տեսանյութին՝ նա նշել է երկու տարբերակ՝ կամ աջակիցն է երեք ամիս առաջ հայտնվել հատուկ նպատակով կամ էլ նրա մուտ ուղարկված մարդը։ Այսինքն՝ երկու դեպքում էլ նա նշել էր, որ դա կազմակերպված է եղել իշխանությունների կողմից։ «Աբսուրդ է, որ նման բան անի մի մարդ, ում ճանաչում ենք երեք ամիս»,- հայտարարել է Լեւոն Քոչարյանը։

Աղբյուր` Փաստինֆո