Փաստ ինֆո

Երբ նախկին իշխանությունը պետական տոների, այս կամ այն ոլորտի միջոցառումն  ու ծրագրերն իրականացնելիս առաջնորդված էր  լինում  մեկ անձից գնման սկզբունքով,  ներկա իշխանության ներկայացուցիչները, այդ թվում նաև՝ վարչապետ Փաշինյանը Ազգային ժողովի ամբիոնից միանգամից նրանց մեղադրում էին առանց մրցույթի կոռուպցիոն մեխանիզմներով աշխատելու մեջ:

Նախորդները գնացին ու եկան նրանք, ովքեր փրփուրը բերաններին մեղադրում էին նախորդներին  մեկ աղբյուրից գնման մեթոդով առաջնորդվելու համար: Բայց եկեք-տեսեք՝ այսօր՝ ավելի քան երբևէ  իշխանությունը դիմում է մեկ աղբյուրից գնման մեթոդին: Իսկ մրցույթներ, եթե հայտարարվում էլ են, ապա դրանք ձևական բնույթ են կրում, քանի որ երբ ուսումնասիրում ես, արդեն ակնհայտ է դառնում, որ գործել է ԽԾԲ սկզբունքը: Ասենք, մեկ էլ արձանագրում ես, որ մրցույթից մի քիչ առաջ ստեղծված և տվյալ ոլորտում չլսված, անհայտ մի կազմակերպություն, որը շահել է մրցույթը, ուղիղ կապ ունի ներկա իշխանության օրենսդիր կամ գործադիր ներկայացուցիչների հետ՝ քպական էսինչ պատգամավորի էնինչն է, քաղաքապետի ընկերը կամ բարեկամը, մի խոսքով՝ պատահական մեկը չի: Այսինքն, մրցույթ եղած-չեղած՝ մի հաշիվ է:

Նույն սկզբունքով և նույն ձեռագրով արդեն իսկ իրականացվել են և՛ Քաղաքացու տոնը, և՛ Անկախության տոնը, և Երևանի օրը:

Բնականաբար, Ամանորը Քաղաքացու օրը չէ, որ ասեն՝ նորաստեղծ տոն է, ժամանակը քիչ է և այլն և այս համատեքստում մեկ աղբյուրից գնման սկզբունքը կիրառելն  ուղղակի ոչ մի կերպ արդարացնել չի կարելի:  Տեսեք,  այդպիսով ոչ միայն տուժել են բոլոր այն մասնագետները, որ կարող էին մասնակցել մրցույթին ու հետաքրքիր առաջարկներ ներկայացնել՝ ընտրության հնարավորություն ստեղծելով, այլև  բազմաթիվ «բայցեր» պարունակող այս գործարքի արդյունքում Երևանի քաղաքապետարանի նախընտրելի  կազմակերպությունը Հանրապետության հրապարակը վեր է ածել անճաշակության տոնավաճառի:  Ահավասիկ մի դրվագ՝ ոսկեգույն ցանկապատով,  դրա դիմաց՝ հոլանդական տների տարօրինակ  միկրոցուցադրությամբ, ի հավելումն,  հրապարակի հարակից շենքերից մեկի  գլխին տնկած՝ ինչ-որ ապակե գնդերով:  Մի տեսակ զավեշտալի է այս ամենը: Այնքան զավեշտալի, որքան վարչապետի այսօրվա վարած կառավարության նիստը, որի ընթացքում կառավարության բոլոր անդամներն իրենց բուն գործառույթները մոռացած՝ մեծ սիրով տրվել էին մի կողմից  գաստրոնոմիական թեմաներին, մյուս կողմից էլ՝ այդ թեմաների ժխտմանը: Վերջինս, իհարկե, մեր վարչապետի պարագայում մի տեսակ անհասկանալի էր, քանի որ մենք հո գիտենք, որ առանց քաբաբ ու խորովածի չի կարող, նույնիսկ խորովածին ձոնած  զեղումնալից տողեր ունի:

Այսօր սոցցանցերում արդեն իսկ քննարկման առարկա էր հրապարակի ձևավորումը, մարդիկ փնտրում ու պատասխան չէին գտնում, թե ինչու մեր հրապարակի ամանորյա դիզայնը  շատ հեռու է գեղարվեստից ու ճաշակից:

Հեղինակ` Մարինե Մինասյան

Աղբյուր` Փաստինֆո